جەكەمەنشىك بالاباقشا يەلەرىنە ليتسەنزيالاۋدان قورقۋدىڭ قاجەتى جوق - ايماعامبەتوۆ
بۇل تۋرالى ق ر وقۋ-اعارتۋ ءمينيسترى اسحات ايماعامبەتوۆ ايتتى، دەپ حابارلايدى قازاقپارات ءتىلشىسى.
«ليتسەنزيا بەرۋ - مەكتەپكە دەيىنگى ءبىلىم ساپاسىن قامتاماسىز ەتۋدىڭ ماڭىزدى قۇرالى بولعانىمەن، جالعىز تەتىگى ەمەس. ءبىز پەداگوگتەردىڭ بىلىكتىلىگىن ارتتىرۋ، جان باسىنا قارجىلاندىرۋدى دامىتۋ، باعدارلامالاردى جەتىلدىرۋ جانە باسقا دا جۇمىستاردى جۇرگىزىپ جاتىرمىز. قازىرگى ۋاقىتتا ەلىمىزدە مەكتەپ، كوللەدج، جوعارى وقۋ ورىندارى دەڭگەيى بويىنشا ليتسەنزيا بەرۋ بار. مىسالى، سوڭعى ءۇش جىلدا جەكەمەنشىك مەكتەپتەردىڭ سانى بىرنەشە ەسە ءوستى. ول نەنى بىلدىرەدى؟ ول ليتسەنزيا بەرۋدىڭ جەكەمەنشىك مەكتەپتەر اشۋ ءۇشىن ەشقانداي دا كەدەرگىسى جوق ەكەنىن جانە تالاپتى ورىنداۋعا بولاتىنىن بىلدىرەدى. سوندىقتان ءبىز ءدال وسى ءتارتىپتى ەندى بالاباقشالارعا قايتادان ەنگىزىپ جاتىرمىز. بالاباقشالاردىڭ قۇرىلتايشىلارى مەن يەلەرىنە دۇرلىگىپ، قورقۋدىڭ قاجەتى جوق. سەبەبى ەلىمىزدەگى بارلىق بالاباقشا ءبىر كۇندە نەمەسە ءبىر ايدا ليتسەنزيا بەرۋ تارتىبىنەن وتەدى دەپ ايتىپ جاتقانىمىز جوق. ءبىرىنشى كەزەكتە جاڭادان اشىلىپ جاتقان جەكەمەنشىك، مەملەكەتتىك بالاباقشالار ليتسەنزيا الادى. كەلەسى كەزەڭدە تاۋەكەلى كوپ ۇيىمدارعا ليتسەنزيا بەرۋ جۇمىسى جۇرگىزىلەدى»، - دەدى اسحات ايماعامبەتوۆ.
ءمينيستردىڭ اتاپ وتۋىنشە، بالاباقشالار بىرلەستىكتەرىنىڭ باسىم كوپشىلىگى ليتسەنزيا بەرۋ جۇيەسىن قايتا ەنگىزۋدى قولداپ وتىر. سەبەبى ساپاسىز بالاباقشالار مەن بالالاردى ۇرىپ-سوعۋ فاكتىلەرىن ەشكىم جوققا شىعارا المايدى. بالاباقشا قۇرىلتايشىلارى بالالاردىڭ مۇددەسىن ءبىرىنشى ورىنعا قويىپ، بارىنشا اشىق، ءادىل جانە بارلىعىنا بىردەي مۇمكىندىك بولعانىن دۇرىس دەپ سانايدى.
«ليتسەنزيا تالاپتارى جوعارى بولمايدى. ەگەر بالاباقشا وسى مينيمالدى تالاپتارعا سايكەس كەلەتىن بولسا، وندا قيىندىقسىز، وتە قىسقا مەرزىمدە، ەلەكتروندى فورماتتا ليتسەنزيا الادى. سوندىقتان بۇل ايتارلىقتاي ۇلكەن ماسەلە تۋعىزبايدى. ءبىزدىڭ مۇددەمىز - بالالاردى ساپالى بالاباقشامەن قامتۋ»، - دەدى وقۋ-اعارتۋ ءمينيسترى.
ەسكە سالايىق، كەشە اتالعان مينيسترلىك بالاباقشالارعا قاتىستى اتا-انالاردان كەلىپ تۇسەتىن شاعىمدار تۋرالى حابارلاعان بولاتىن.
ولاردىڭ اراسىندا تاربيەشىنىڭ بالانى ۇرىپ-سوعۋ، داۋىس كوتەرۋ، ءتىپتى تۇنشىقتىرۋ جاعدايلارى بار.