ەلىمىزدە ەكى كاسىبي مەرەكە پايدا بولۋى مۇمكىن

نۇر-سۇلتان. قازاقپارات - قازاقستاندا ەكى كاسىبي مەرەكە رەسمي تۇردە بەكىتىلمەك، دەپ حابارلايدى قازاقپارات ءتىلشىسى.

«قازاقستاندا 1,6 ميلليوننان استام شاعىن جانە ورتا بيزنەس سۋبەكتىلەرى بار. ولاردىڭ بارلىعى ەل ەكونوميكاسىنىڭ دامۋىنا ەلەۋلى ۇلەس قوسۋدا. اسىرەسە، سوڭعى ەكى جىل قيىن بولدى. پاندەميا قىسقارتۋعا، وڭتايلاندىرۋعا، باسقارۋ مودەلدەرىن، بيزنەس فورماتتارىن وزگەرتۋگە ءماجبۇر ەتتى. وسىعان بايلانىستى جاڭا مەرەكەلىك كۇن - قازاقستان كاسىپكەرلەرى كۇنىن 9- قىركۇيەككە بەكىتۋ ۇسىنىلادى. قازاقستان كاسىپكەرلەرى كۇنىن ەنگىزۋ جۇزدەگەن مىڭ قازاقستاندىق ءۇشىن شىن مانىندە وزەكتى جانە ماڭىزدى. سونىمەن قاتار قازىرگى ۋاقىتتا جارناما سالاسىنىڭ ماماندارى تانىمال. ولار الەۋمەتتىك بەلسەندىلىك پەن كاسىپكەرلىكتىڭ دامۋىنا ۇلكەن ۇلەس قوسىپ ءجۇر. بۇگىندە قازاقستاندا 2000 عا جۋىق جارناما ۇيىمى جۇمىس ىستەيدى. ولاردا شامامەن 100000 مامان ەڭبەك ەتەدى. سوندىقتان جاڭا كاسىبي مەرەكەنى «جارناما تۋرالى» زاڭنىڭ قابىلدانعان كۇنىنە ورايلاستىرۋ ۇسىنىلادى»، - دەلىنگەن ۇكىمەت قاۋلىسىندا.

قاۋلىدا اتالعان مەرەكەلەردى بەكىتۋ - تاۋەلسىزدىكتىڭ 30 جىلدىعى قارساڭىندا ۇيىمداستىرىلىپ وتىرعانى جازىلعان.

ەسكە سالساق، بۇعان دەيىن قازاقستاندا تۇرعىن ءۇي-كوممۋنالدىق شارۋاشىلىعى سالاسىنىڭ قىزمەتكەرلەرى كۇنى بەلگىلەنۋى مۇمكىن ەكەنىن حابارلاپ ەدىك.