اقمولادا كۇدىكتىنى ۇستاۋ ءۇشىن العاش رەت ايەلدەردىڭ ارنايى جاساعى تارتىلدى

كوكشەتاۋ. قازاقپارات - اقمولا وبلىسىندا ەسىرتكى دايىنداۋ جانە وتكىزۋ بويىنشا كۇدىكتىلەر ۇستالدى. كۇدىكتى ايەلدى پوليتسياعا جەتكىزۋ ءۇشىن العاش رەت ايەلدەردىڭ ارنايى جاساعى تارتىلدى، دەپ حابارلايدى قازاقپارات ءتىلشىسى.

وبلىستىق پوليتسيا دەپارتامەنتى باسپا ءسوز قىزمەتىنىڭ مالىمەتىنشە، اتباسار قالاسىنداعى ەسىرتكى قىلمىسىنا قارسى ءىس- قيمىل باسقارماسىنىڭ قىزمەتكەرلەرى «قاراسورا - 2022» جەدەل الدىن الۋ شاراسى بارىسىندا گاشيش مايىن دايىندادى جانە ساتۋىمەن اينالىستى دەگەن كۇدىكپەن ازاماتتىق نەكەدەگى ەرلى- زايىپتىلاردى ۇستادى.

«انىقتالعانداي، 38 جاستاعى ەر ادام مەن ونىڭ 37 جاستاعى ايەلى ۇيدە قاراسورادان كاننابيس سىعىندىسىن جاساپ، ودان الىنعان پرەپاراتتى ساتقان. سونداي- اق، ەر ادام بۇرىن ەسىرتكى زاتتارىنىڭ زاڭسىز اينالىمىنا بايلانىستى قىلمىستارى ءۇشىن سوتتالىپ، ەسىرتكىنى ءوزى قولدانىپ كەلگەن»، - دەدى ۆەدومستۆودان.

كۇدىكتىلەردى ۇستاۋ كەزىندە ولاردان 4 گرامنان استام گاشيش مايى الىندى، وسىعان ۇقساس زات ەرلى- زايىپتىلاردىڭ مەكەنجايىن ءتىنتۋ كەزىندە تاركىلەندى. ۇستالعان كەزدە ايەل پوليتسەيلەرگە قارسىلىق كورسەتىپ، ءتارتىپ ساقشىلارىنىڭ زاڭدى تالاپتارىنا باعىنبادى. كۇدىكتىنى ۇستاۋ جانە كەيىننەن پوليتسيا بولىمىنە جەتكىزۋ ءۇشىن العاش رەت ايەلدەردەن قۇرالعان جەدەل ارەكەت ەتۋ ارنايى جاساعىنىڭ قىزمەتكەرلەرى تارتىلدى.

پوليتسيا قىزمەتكەرلەرىنىڭ كاسىبي ءىس- ارەكەتىنىڭ ارقاسىندا كۇدىكتى ۇستالدى. «قازىرگى ۋاقىتتا وسىعان بايلانىستى قىلمىستىق كودەكستىڭ 297 - بابىنىڭ 3-بولىگى «ەسىرتكى قۇرالدارىن زاڭسىز وتكىزۋ» بويىنشا سوتقا دەيىنگى تەرگەۋ امالدارى جۇرگىزىلۋدە. كۇدىكتىلەر ۋاقىتشا ۇستاۋ يزولياتورىنا قامالدى»، - دەپ تولىقتىردى ۆەدومستۆودان.

ايتا كەتسەك، بۇدان بۇرىن استانا تۇرعىنى كوكشەتاۋدا ەسىرتكى زاتىن جاسىرۋ كەزىندە ۇستالعان ەدى.