اقتوبەلىك وقۋشى حالىقارالىق وليمپيادادا التىن مەدال جەڭىپ الدى

اقتوبە. قازاقپارات - اقتوبەلىك وقۋشى سانجار حاميتوۆ بۇل جولى IGeO-2022 حالىقارالىق وليمپياداسىندا التىن مەدال جەڭىپ الدى. بۇل ونىڭ ەكىنشى ۇلكەن جەڭىسى، دەپ حابارلايدى قازاقپارات ءتىلشىسى.

IGeO-2022 حالىقارالىق گەوگرافيا وليمپياداسى كەزىندە نازاربايەۆ زياتكەرلىك مەكتەبىنىڭ وقۋشىسى سانجار حاميتوۆتىڭ التىن مەدال جەڭىپ العانى بەلگىلى بولدى. بۇل وسى وليمپياداداعى ەكىنشى ۇلكەن جەڭىس. پاريجدە قاشىقتان ۇيىمداستىرىلعان زياتكەرلىك جارىسقا الەمنىڭ 54 ەلىنەن 216 جاس گەوگراف قاتىسقان. قاتىسۋشىلار جازباشا ءارى مۋلتيمەديالىق تەستىلەۋدەن جانە كارتوگرافيالىق بەينەلەۋ تاپسىرمالارىنان ءوتتى. ناتيجەسىندە قازاقستان ۇلتتىق قۇراما كومانداسىنىڭ اتىنان قاتىسقان اقتوبەلىك وقۋشى IGeO-2022 جارىسىنىڭ جەڭىمپازى اتاندى.

« IGeO-2022 حالىقارالىق وليمپياداسىنا قاتىسۋ ارمانىم ەدى. ءسويتىپ 9-سىنىپتان باستاپ تىنباي ەڭبەكتەندىم. كەيدە ءوز- وزىمە كوڭىلىم تولماي، سەنىمسىزدىك تانىتتىم. ءبىراق وقۋدى، ىزدەنۋدى توقتاتقان ەمەسپىن. ال وليمپياداداعى جەڭىسكە كەلەر بولسام، مۇلدە جۇلدە الامىن دەپ ويلامادىم. قازىر «دايىندىعىم تياناقتى بولدى» دەپ ويلاپ وتىرمىن. ادام العا قويعان ماقساتقا تاباندىلىعىمەن جەتە الادى»، - دەدى سانجار حاميتوۆ.

ول گەوگرافيا ءپانىن ەرەكشە جاقسى كورىپ وقيدى. ەسكە سالساق، سانجار حاميتوۆ بۇعان دەيىن EGeО – 2022 ەۋروپالىق وليمپيادادا جەڭىمپاز اتانعان بولاتىن. ول جوعارى ليگانىڭ 16-19 جاس ارالىعىنداعى قاتىسۋشىلارى اراسىندا ءابسوليۋتتى جەڭىمپاز اتاندى.

«مينيستر اسحات ايماعامبەتوۆ وليمپيادا جەڭىمپازدارى العاش رەت اقشالاي سىيلىق الاتىنىن اتاپ ءوتتى. سونىمەن قاتار، مەكتەپىشىلىك وليمپيادا جەڭىمپازدارى ۇ ب ت- دان وتپەي- اق وتاندىق جوعارى وقۋ ورىندارىنا تۇسۋگە مۇمكىندىك الادى. ماسەلەن، التىن مەدال العان وقۋشىعا 4,5 ميلليون، كۇمىس مەدالعا 3 ميلليون، قولا مەدالعا 1,5 ميلليون تەڭگەدەن استام اقشالاي سىيلىق بەرىلەدى. مەكتەپ وقۋشىلارىن جارىسقا دايىنداعان ۇستازدار دا ماراپاتتالاتىنىن مينيسترلىك حابارلادى»، - دەدى اقتوبەدەگى نازاربايەۆ زياتكەرلىك مەكتەبىنىڭ باسپا ءسوز قىزمەتى.