قازاقستاندا جاستاردىڭ بيزنەس- باستامالارىن جۇزەگە اسىرۋ ءۇشىن گرانت بولىنەدى - ەڭبەك مينيسترلىگى

نۇر-سۇلتان. قازاقپارات – ق ر ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا نۇر- سۇلتان قالاسىنىڭ جاستار ۇيىمدارىنىڭ بەلسەندى وكىلدەرىمەن جانە جاس كاسىپكەرلەرمەن كەزدەستى، دەپ حابارلايدى قازاقپارات مينيسترلىكتىڭ باسپا ءسوز قىزمەتىنە سىلتەمە جاساپ.

مينيستر مەملەكەت باسشىسىنىڭ جاستاردى جۇمىسپەن قامتۋعا قاتىستى بەرگەن تاپسىرمالارىن ورىنداۋ بويىنشا مينيسترلىك جۇرگىزىپ جاتقان جۇمىس باعىتتارى جانە جاس كاسىپكەرلەردىڭ بيزنەس- باستامالارىن قولداۋ جونىندە ايتتى. جاستار ۇيىمدارىنىڭ بەلسەندى وكىلدەرىمەن كەزدەسۋدە تامارا دۇيسەنوۆا مەملەكەت جاستاردى جۇمىسپەن قامتۋ بويىنشا بىرنەشە باستامانى جۇزەگە اسىرىپ جاتقانىن ايتتى.

قازىر ەلەكتروندىق ەڭبەك بيرجاسىندا 105 مىڭنان استام بوس جۇمىس ورنى ۇسىنىلعان. سونداي- اق بيرجادا ۇلتتىق جوبالار بويىنشا بوس جۇمىس ورىندارىنىڭ ءبىرىڭعاي پلاتفورماسى ىسكە قوسىلعان. مينيستر جۇمىسپەن قامتۋعا باعىتتالعان تاعى ءبىر ماڭىزدى شارا - جاستاردى ءىرى وندىرىستىك كاسىپورىندارعا جۇمىسقا ورنالاستىرۋ جوباسى تۋرالى ايتتى.

وعان العاش بولىپ ERG كومپانيالار توبى قوسىلىپ، بوس جۇمىس ورىندارىنىڭ ءتىزىمىن ەلەكتروندىق ەڭبەك بيرجاسىنا ورنالاستىردى. الداعى ۋاقىتتا بيرجادا بوس جۇمىس ورىندارىن ۇسىناتىن كومپانيا سانى ارتادى.

«وتكەن ايدا ەلەكتروندىق ەڭبەك بيرجاسىندا قازاقستانداعى العاشقى ونلاين ەڭبەك جارمەڭكەسىن وتكىزدىك. شارا 35 جاسقا دەيىنگى جاستاردى جۇمىسقا ورنالاستىرۋعا باعىتتالعان. جارمەڭكەگە 23 ءىرى كومپانيا، بانك جانە ساۋدا جەلىسى قاتىسىپ، 1330 بوس جۇمىس ورنىن ۇسىندى. 3,5 مىڭ رەزيۋمە كەلىپ ءتۇستى. قازىر جۇمىس بەرۋشىلەر ۇمىتكەرلەردى ىرىكتەپ جاتىر. جارمەڭكە تۇراقتى تۇردە ۇيىمداستىرىلادى»، - دەدى تامارا دۇيسەنوۆا.

جاس كاسىپكەرلەرمەن كەزدەسۋدە مينيستر ەڭبەك نارىعىنا 2000 -جىلداردىڭ باسىندا دۇنيەگە كەلگەن بۋىننىڭ شىعا باستاعانىن ايتتى. الداعى ۋاقىتتا جىل سايىن 300-400 مىڭ جاس مامان ەڭبەككە ارالاسادى. وسىلايشا جۇمىس كۇشىنىڭ قۇرىلىمى وزگەرىپ كەلەدى. قازىر جاستار يكەمدى جۇمىس كەستەسىن جانە جەكە دامۋ مۇمكىندىگىنە كوبىرەك ءمان بەرەدى. تامارا دۇيسەنوۆا مەملەكەت باسشىسى ۇكىمەتتىڭ كەڭەيتىلگەن وتىرىسىندا جاستاردى جۇمىسپەن قامتۋعا قاتىستى بەرگەن تاپسىرمالارى بويىنشا مينيسترلىك 8 باعىت بويىنشا جۇمىس جۇرگىزىپ جاتقانىن ايتتى.

«جاستاردى جۇمىسپەن قامتۋ بويىنشا جۇرگىزىلىپ جاتقان جۇمىستىڭ تاعى ءبىر ماڭىزدى باعىتى - كاسىپكەرلىكتى دامىتۋ جونىندەگى ۇلتتىق جوبا شەڭبەرىندە جاس كاسىپكەرلەردى قولداۋ بولىپ تابىلادى. جاستارعا ءوز كاسىبىن باستاۋ ءۇشىن جەڭىلدىكپەن (%2,5) نەسيە بەرىلەدى. سونداي- اق جاستاردىڭ بيزنەس- باستامالارىن جۇزەگە اسىرۋ ءۇشىن گرانت بولىنەدى»، - دەدى مينيستر. كەزدەسۋ بارىسىندا جاستار ۇيىمدارىنىڭ وكىلدەرى وزدەرىن قىزىقتىرعان ساۋالدارىن قويىپ، ەڭبەك نارىعىن دامىتۋعا قاتىستى ۇسىنىستارىن ءبىلدىردى.

ءوز كەزەگىندە تامارا دۇيسەنوۆا كەزدەسۋگە قاتىسۋشىلارعا جۇمىسقا ورنالاسۋ مۇمكىندىگىنە قاتىستى وزەكتى اقپاراتتى قۇرداستارىنا جەتكىزۋدى ۇسىندى. ال جاس كاسىپكەرلەردى مينيستر سيفرلاندىرۋ، يكەمدى جۇمىس كەستەسى جانە وزگە دە ماسەلەلەر بويىنشا بىرلەسكەن جوبالاردى جۇزەگە اسىرۋعا شاقىردى. تامارا دۇيسەنوۆا، جاستار ۇيىمدارىنىڭ كوشباسشىلارى جانە جاس كاسىپكەرلەر وسىنداي كەزدەسۋلەردى تۇراقتى تۇردە وتكىزۋگە كەلىستى.