نەسيەسى بار قازاقستاندىقتارعا جاڭا قارىز بەرىلمەيدى: ماماندار زاڭدى ءتۇسىندىردى

None
None
نۇر-سۇلتان. قازاقپارات – قارجى نارىعىن رەتتەۋ جانە دامىتۋ اگەنتتىگى وكىلى نەسيە بەرۋگە قاتىستى زاڭناماعا ەنگىزىلگەن وزگەرىستەردى ءتۇسىندىردى.

12-شىلدەدە مەملەكەت باسشىسى قاسىم-جومارت توقايەۆ «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ساقتاندىرۋ نارىعىن جانە باعالى قاعازدار نارىعىن، بانك قىزمەتىن رەتتەۋ مەن دامىتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭعا قول قويدى.

وسى زاڭنىڭ باسقا تارماقتارى اراسىندا قارجىلىق ينستيتۋتتاردىڭ ءوز كليەنتتەرىنىڭ نەسيە تاريحتارىن ۇسىنۋ مەرزىمدەرىنە قاتىستى وزگەرىستەر بار. قارجى نارىعىن رەتتەۋ جانە دامىتۋ اگەنتتىگى وكىلىنىڭ ايتۋىنشا، جاڭا تۇزەتۋلەر تابىسى تومەن، بەرەشەگى بار كليەنتتەردىڭ جاڭا نەسيە الۋىن قاراستىراتىن ولقىلىقتاردى جويادى.

قولدانىستاعى زاڭدارعا سايكەس بارلىق نەسيە بويىنشا جيىنتىق تولەمدەر سوماسى قارىزدىق جۇكتەمە كوەففيتسيەنتىنەن اسپاۋى كەرەك. بۇل نەسيە تولەمدەرى جالپى كىرىستىڭ 50 پايىزىنان اسپاۋى كەرەك دەگەندى بىلدىرەدى.

مىسالى، 200 مىڭ تەڭگە جالاقىسى بار ادام جالپى تولەم سوماسى 100 مىڭ تەڭگەدەن جوعارى نەسيە الا المايدى. ەگەر كىرىس مولشەرى قازىردىڭ وزىندە از بولسا جانە وعان قوسا الەۋەتتى قارىز الۋشىنىڭ قامقورلىعىندا كامەلەتكە تولماعان بالالار بولسا، وندا نەسيەلەر بويىنشا تولەمدەردىڭ جالپى سوماسىنىڭ قالدىعى ەڭ تومەنگى كۇنكورىس دەڭگەيىنەن (شامامەن 37389 تەڭگە) جانە 0,5 (18 مىڭ تەڭگە) ءار بالاعا ەڭ تومەنگى كۇنكورىس دەڭگەيىنەن تومەن بولماۋى كەرەك.

تابىسى قارىز جۇكتەمەسىنىڭ 50 پايىزىنان اساتىن ادامدارعا زاڭ جاڭا نەسيە الۋعا كەدەرگى بولمايتىنى اتاپ ءوتىلدى.

«بۇعان دەيىن قارجى ۇيىمدارى، بانكتەر مەن ميكروقارجى ۇيىمدارى نەسيە تۋرالى اقپاراتتى نەسيە بيۋروسىنا 15 كۇن ىشىندە ۇسىنۋى كەرەك ەدى. وسىلايشا، تابىسى جەتكىلىكسىز ازامات، مىسالى، ميكروقارجى ۇيىمىنان نەمەسە ونلاين رەجيمىندە ءبىر نەسيە الا الادى. وسى ۋاقىتتا نەسيە بيۋروسىنداعى اقپارات جاڭارتىلعانعا دەيىن وعان بانكتەن دە نەسيە بەرىلۋى مۇمكىن. ناتيجەسىندە ونىڭ نەسيەلەرىنىڭ جالپى سوماسى قارىز جۇكتەمەسىنىڭ كوەففيتسيەنتىنەن اسىپ كەتەدى. ايتالىق، 200000 تەڭگە جالاقىمەن ول نەسيەسىنە 150000 تەڭگە تولەسە، وسىنىڭ ءبارى ازاماتتاردىڭ قارىز جۇكتەمەسىن اۋىرلاتىپ، وعان قوسا كەشىكتىرىلگەن جاعدايدا ايىپپۇلدار مەن ءوسىمپۇلدار وندىرىلگەن.

ەندى جاڭا زاڭعا سايكەس، بارلىق قارجى ينستيتۋتتارى، ءتىپتى لومباردتار نەمەسە ونلاين شاعىن نەسيە بەرۋ ورتالىقتارى ءبىر جۇمىس كۇنى ىشىندە اقپارات بەرۋگە مىندەتتى، بۇل قارىز الۋشىلارعا تابىسىنىڭ 50 پايىزىنان اساتىن تولەمدەرمەن بىرنەشە نەسيە الۋدى قيىنداتادى»، - دەدى قارجى نارىعىن رەتتەۋ جانە دامىتۋ اگەنتتىگىنىڭ سىرتقى كوممۋنيكاتسيالار ءبولىمىنىڭ وكىلى دميتريي اكمايەۆ.

اكمايەۆتىڭ ايتۋىنشا، بانكتەردىڭ كوپشىلىگى كليەنتتەردىڭ نەسيەلىك تاريحى تۋرالى اقپاراتتى ونسىز دا جەدەل جەتكىزگەن. الايدا كوپتەگەن ميكروقارجى قۇرىلىمدارى مەن لومباردتار بۇعان نەمقۇرايلىق تانىتىپ، نەسيە الۋ مۇمكىندىگىن تۋدىرادى. ەندى ولاردىڭ ءبارى ءبىر كۇن ىشىندە نەسيە بيۋروسىنا نەسيە العان كليەنت تۋرالى نەگىزگى اقپاراتتى - ونىڭ تەگى، اتى، اكەسىنىڭ اتى، نەسيە سوماسى، وتەۋ مەرزىمى جانە ت. ب. تاپسىرۋى ءتيىس. ءبىرىڭعاي دەرەكتەر بازاسىنىڭ كومەگىمەن كەز كەلگەن قارجى ۇيىمى كەزەكتى نەسيەنى الۋ كەزىندە كليەنتتىڭ نەسيەلىك ليميتىنە جەتكەن- جەتپەگەنىن بىردەن ءبىلىپ، بۇل جاعدايدا ودان باس تارتا الادى.


سوڭعى جاڭالىقتار