اتىراۋ تۇرعىنى جايىق وزەنىنەن الىپ جايىن ۇستادى
اتىراۋلىق اۋەسقوي بالىق اۋلاۋشىنىڭ ءبىرى - لەنار مۋبوراكشايەۆ. بىرنەشە جىلدان مۇنايلى شاھاردى قاق جارا اعىپ جاتقان جايىق وزەنىنەن بالىق اۋلايدى. جاقىندا ونىڭ قارماعىنا الىپ جايىن ءتۇستى. «بالىق اۋلاۋدىڭ وزىندىك قىزىعى كوپ. بىرىنشىدەن، تازا اۋادا دەمالاسىڭ. ەكىنشىدەن، ۋاقىتىڭدى ءتيىمدى وتكىزەسىڭ. وزەنگە قارماق سالعان بالىقشىلار الىپ بالىق ۇستاعاندى قالايدى. الايدا، بۇل - سيرەك كەزدەسەتىن جايت» - دەيدى لەنار مۋبوراكشايەۆ.
اۋەسقوي بالىقشى جايىق وزەنىنەن اۋلاعان جايىننىڭ سالماعى - 30 كيلو، ۇزىندىعى - 1,5 مەتردەن استام. سارعىش ءتۇستى الىپ جايىن الىستان قاراساڭىز، التىن تۇسكە بويالعانداي. جايىندى جايىقتان تارتىپ شىعارۋ وڭاي بولمادى. دەگەنمەن، سۋدان مارجان ءسۇزۋدىڭ قىر-سىرىن جەتىك مەڭگەرگەن لەنار مۋبوراكشايەۆ قارماعىنا تۇسكەن ولجاسىنان ايىرىلعان جوق.
«قازىر جايىق وزەنىندە سازان، جايىن، وزگە دە قارا بالىقتار بار. ءبىراق بۇرىنعىداي ەمەس، بالىق مۇلدەم ازايعانى بايقالادى. كەيدە قارماققا ەشتەڭە تۇسپەۋى مۇمكىن. بالىق تا اركىمنىڭ نەسىبەسىنە قاراي قارماققا تۇسەدى. وسىنداي الىپ بالىق قارماقتى قابۋى عاجاپ ەمەس. جايىندى جايىق وزەنىنىڭ قالانىڭ ورتالىعىنداعى بولىگىنەن اۋلادىم»، - دەيدى لەنار مۋبوراكشايەۆ.
بيىلعى كوكتەمدە اتىراۋ بالىقشىلارى 200 كەلى تارتاتىن الىپ قورتپا اۋلاعان ەدى. الىپ قورتپانى مەملەكەتتىك تاپسىرىستى ورىنداۋ ماقساتىندا 19-ساۋىردە «امانگەلدى اتىنداعى» ج ش س-نىڭ بالىقشىلار بريگاداسى جايىق وزەنىندەگى «كىشى دامبى» تارتىمىنان اۋلادى. باعالى بالىقتى اۋلاۋعا «جايىق- اتىراۋ بەكىرە بالىق ءوسىرۋ زاۋىتى» ر م ق ك-نىڭ قىزمەتكەرلەرى دە قاتىستى. سۋ مارجانىنىڭ سالماعى شامامەن 200 كەلىگە جۋىق. باعالى قورتپا بەكىرە بالىقتارىن ءوسىرۋ زاۋىتىنا جەتكىزىلدى. كەيىن ودان تابيعي مەكەن ەتۋ ورتاسىنا جىبەرۋ ءۇشىن ورتاشا سالماعى 15 گراممدى قۇراعان 729 مىڭ شاباق الىندى.
ەسكە سالا كەتەلىك، بۇدان بۇرىن اتىراۋدا جايىق وزەنىنە 3,5 ميلليون بەكىرە تۇقىمداس بالىق شاباعى جىبەرىلدى.