قازاقستاندا جاس جۋرناليستەر مەكتەبى اشىلماق
الەۋمەتتىك جوبا جاس جۋرناليستەردىڭ كاسىبي قۇزىرەتتىلىك دەڭگەيىن ارتتىرۋعا، كوممۋنيكاتسيا قۇرۋعا ارنالعان جاڭا الاڭداردى قالىپتاستىرۋعا، جاس جۋرناليستەردىڭ شىعارماشىلىق جانە قوعامدىق بەلسەندىلىگىن ىنتالاندىرۋعا باعىتتالعان.
«جوبانىڭ ماڭىزدى مىندەتتەرىنىڭ ءبىرى - جاس جۋرناليستەردىڭ كاسىبي قۇزىرەتتىلىگىن ارتتىرۋ. مەديا ماماندارىنا ونلاين فورماتتا جۇمىس ىستەۋ ىڭعايلى بولعاندىقتان، ءبىز ەلەكتروندى پلاتفورمانا دايىندايتىن بولامىز. مۇندا جوبا قاتىسۋشىلارى ءۇشىن وقىتۋ كۋرستارى مەن جاڭالىقتار پورتالى قولجەتىمدى بولادى»، - دەيدى «قازاقستان جاستار كونگرەسى» ز ت ب ديرەكتورىنىڭ ورىنباسارى كاميلا امۋرتايەۆا.
جوبا اياسىندا كونكۋرستىق نەگىزدە جاس جۋرناليستەرگە 20 شاعىن گرانت بولىنەدى. جالپىلاي العاندا، كاسىبي ءبىلىم الۋ جانە ۇزدىك پراكتيكالارمەن الماسۋ باعىتىنداعى وقىتۋدان كەمىندە 300 جاس قازاقستاندىق وتەدى. سونداي-اق نۇر-سۇلتان، شىمكەنت جانە اقتوبە قالالارىندا جاستارعا ارنالعان پىكىرتالاس الاڭدارى جۇمىس ىستەيدى.
«فورۋمدار ءۇش كۇندىك وقىتۋ فورماتىندا وتەدى. ءبىز جۋرناليست بولۋدى ارماندايتىن جاس ازاماتتاردى جۋرناليستيكا فاكۋلتەتتەرىنىڭ ستۋدەنتتەرىن، جاس مامانداردى جينايمىز. فورۋم قاتىسۋشىلارى تەوريالىق قانا ەمەس، پراكتيكالىق تۇرعىدا ءبىلىم الۋى ءۇشىن مەديا سالاسىنىڭ ساراپشىلارى مەن كاسىپقويلارى جوباعا ترەنەرلەر رەتىندە شاقىرىلادى»، - دەدى كاميلا امۋرتايەۆا.