جەمقورلىقپەن كۇرەسەمىز دەپ حالىقتىڭ ءۇنىن ۇمىتتىق - ولجاس بەكتەنوۆ

None
None
نۇر- سۇلتان. قازاقپارات - سىبايلاس جەمقورلىققا قارسى ءىس- قيمىل اگەنتتىگىنىڭ جۇمىسى حالىقتىڭ جاعدايىن جاقسارتۋعا باعىتتالۋى ءتيىس.

بۇل تۋرالى اتالعان ۆەدومستۆونىڭ باسشىسى ولجاس بەكتەنوۆ ايتتى، دەپ حابارلايدى قازاقپارات ءتىلشىسى.

«جەمقورلىقپەن كۇرەسەمىز دەپ، باستىسى حالىقتىڭ ءۇنىن ۇمىتتىق. حالىق نە دەپ جاتىر؟ حالىق نەنى تالاپ ەتىپ جاتىر؟ مۇنىڭ ءبارىن قاپەردەن شىعاردىق. وتكەن عاسىرلاردا جازىلعان قاسىم حاننىڭ قاسقا جولىندا، ەسىم حاننىڭ ەسكى جولىندا، تاۋكە حاننىڭ جەتى جارعىسىندا، قازىرگى زامانداعى ەلىمىزدىڭ اتا زاڭىندا ەڭ قىمبات قازىنا - ادام»، - دەدى ولجان بەكتەنوۆ ۆەدومستۆونىڭ القا وتىرىسىندا.

سوندىقتان، ول اگەنتتىك قىزمەتكەرلەرىنىڭ ءاربىر ءىسى حالىققا پايداسى بار ما، حالىق قاناعاتتانا ما، قۇپتاي ما دەگەن باعىتتا بولۋ كەرەكتىگىن باسا ايتتى.

«جۇمىسىمىزدىڭ ناتيجەسى تولىقتاي حالىقتىڭ الەۋمەتتىك، ەكونوميكالىق جاعدايىن جاقسارتۋعا باعىتتالۋى كەرەك. جەمقورلىقپەن كۇرەس مۇلدەم وزگەشە بولۋى قاجەت. ونى بۇگىن كورسەتتىك، تالقىلادىق. ەندى ىسكە كىرىسىپ، تەز ارادا ناتيجە كورسەتەيىك»، - دەدى اگەنتتىك ءتوراعاسى.

سىبايلاس جەمقورلىققا قارسى ءىس- قيمىل اگەنتتىگىنىڭ ستاتيستيكاسىنان گورى حالىقتىڭ دەنساۋلىعى مەن ءال- اۋقاتى ماڭىزدى.

«باستىسى - بيۋدجەت قاراجاتى ەسەبىنەن تۇرعىزىلاتىن نىساننىڭ ساپالى سالىنۋى جانە بەلگىلەنگەن مەرزىمدە پايدالانۋعا بەرىلۋى. ادامدار اۋىز سۋدى ۋاقىتىلى الىپ، ساپالى جولدارمەن جۇرەدى، جاڭا پاتەرلەرگە قونىستانادى. ولار ءۇشىن ەڭ باستىسى وسى ەمەس پە؟ ازاماتتاردىڭ دەنساۋلىعى مەن ءال- اۋقاتى نەمەسە ءبىزدىڭ ستاتيستيكا - قايىسىسى ماڭىزدى؟ مەنىڭشە، جاۋاپ ايقىن»، - دەدى ول ۆەدومستۆونىڭ القا وتىرىسىندا. ولجاس بەكتەنوۆ اگەنتتىك نەعۇرلىم تەزىرەك ارەكەت ەتسە، سوعۇرلىم جاقسى بولاتىندىعىن باسا ايتتى.

«قىلمىستىق ءىستى قوزعاۋ ماڭىزدى ەمەس. ەڭ باستىسى - بيۋدجەت ەسەبىنەن سالىنىپ جاتقان نىساننىڭ ساپالى سالىنىپ، بەلگىلەنگەن مەرزىمدە تاپسىرىلۋ. ءبىزدىڭ ستاتيستيكامىزدان گورى حالىقتىڭ دەنساۋلىعى مەن ءال- اۋقاتى ماڭىزدى. بۇل ورايدا اتالعان ءادىس جەمقورلىقپەن كۇرەستى الىسىرەتپەيدى. كەرىسىنشە، بىزگە الدىن وراي قيمىلداپ، بارىنشا ءتيىمدى ارەكەت ەتۋگە باعىتتايدى»، - دەدى اگەنتتىك ءتوراعاسى.

اۆتور: مارلان جيەمباي

سوڭعى جاڭالىقتار