جالعىز سيىردىڭ وقيعاسى

نۇر- سۇلتان. قازاقپارات - نۋ ورمان اراسىندا جاياۋ كەلە جاتقان فيلوسوف پەن ونىڭ شاكىرتى ءومىر ساپارىندا كەزىگەتىن كەيبىر كەزدەيسوق ىستەردىڭ كەيدە ارتى جاقسىلىققا اينالىپ كەتەتىن تۇستارى دا بولاتىندىعى جونىندە اڭگىمە قوزعايدى.

اڭگىمەنىڭ قىزىعىمەن ەكەۋى جۇرە- جۇرە ءبىر شاعىن ەگىس الاڭىنداعى ەسكى ءۇيدىڭ الدىنان ءبىر- اق شىعادى. بۇل ەگىس الاڭىنىڭ ورنى جاقسى بولعانىمەن، اينالاسى قاڭىراپ بوس جاتىر. ونداعى مىنا ءۇيدىڭ دە ابدەن توزىعى جەتكەن. ەكەۋى ەسكى ءۇيدىڭ ەسىگىن قاعادى. ءۇي يەسى ەسىگىن اشىپ، ولاردى ۇيىنە كىرگىزەدى. جۇتاپ تۇرعان بۇل ۇيدەگى ەرلى- زايىپتىلار مەن ءۇش بىردەي بالانى كورەدى. - نۋ ورمان اراسىندا وتىر ەكەنسىز. ءتىپتى، اينالاڭىزدا بىرەر دۇكەن دە كورىنبەيدى. سوندا نەمەن جان باعىپ وتىرسىزدار؟ - دەيدى وتاعاسىنا فيلوسوف.

- وي، قاراعىم، نەمەن جان باعادى دەيسىڭ. جار دەگەندە جالعىز سيىرىمىز بار. سونى ساۋىپ، ءىشىپ وتىرمىز. اۋزىمىزدان اسقانىن وسى ماڭداعى اۋىلعا اپارىپ، ازىق- تۇلىككە ايىرباستاپ كەلەمىن. قالعان سۇتتەن ىرىمشىك جاساپ، ايران ۇيىتىپ دەگەندەي. كۇن كورىسىمىز مىنە، وسىلاي. ولار وتاعاسىمەن قوشتاسىپ، اينالاسىنا ءبىراز قاراپ تۇرادى دا، جولدارىنا تۇسەدى.

ۇزاي بەرە، فولوسوف شاكىرتىنە:

- سەن انا سيىردى جەتەلەپ اپار دا، قۇزدان قۇلاتىپ جىبەر، - دەيدى.

- ءبىر ءۇيلى جاندى باعىپ وتىرعان سيىردى جاردان ۇشىرىپ جىبەرگەنىمىز قالاي بولار ەكەن؟ - دەيدى شاكىرتى تاڭدانىپ. ۇستازى جۇمعان اۋىزىن اشپايدى. ۇستازىنىڭ ءسوزىن جەرگە تاستامايتىن جىگىت امالسىزدان ونىڭ ايتقانىن ىستەيدى. سيىردى جاردان قۇلاتىپ جىبەرەدى. ارادا كوپ جىل وتكەنىمەن، الگى جىگىت بۇل ءىستى ۇمىتا المايدى. ءوزى ساۋدا جاساپ، اۋقاتتانىپ قالعانىمەن، ءبىر ءۇيلى جاننىڭ وبالىنا قالعانىنا نالىپ جۇرەدى. اقىرى جان ازابىنا شىداماعان جىگىت سول ءبىر ءۇيلى جاندى قايتا ىزدەپ تاۋىپ، ءوز ايىبىن مويىنداپ، ەسەلەپ تولەم تولەۋدى ءجون كورىپ، جولعا شىعادى.

باياعى ورمان ىشىندەگى الاقانداي اۋماققا قايتا بارعاندا، بۇل ارانىڭ وزگەرىسىنە قاتتى تاڭ قالادى. توزىعى جەتكەن ءۇيدىڭ تۋرا ورىنىندا ساۋلەتتى ساياجاي سالىنعان. ءۇيدىڭ اۋلاسىنا ەگىلگەن گۇلدەردىڭ قوش ءيىسى مۇرىن جارادى. ءتىپتى، ءۇي ماڭىندا جەڭىل اۆتوكولىك تۇر. اۋلادا ءبىر توپ بالا اسىر سالىپ ويناپ ءجۇر. «ولار كەتىپ قالعان بولدى. كۇن كورىسى اۋىرلاعان سوڭ، بۇل ايماقتان مۇلدە بەزىنىپ كەتكەن بولار» دەپ ءوز ىسىنە قاتتى وپىق جەيدى. نە دە بولسا، ىزدەپ تابۋ كەرەك. ول ساۋلەتتى سارايدىڭ ەسىگىن قاعادى. ۇيدەن ءبىر سىپايى جاس كەلىنشەك شىعادى. شاماسى ءۇي قىزمەتكەرى بولۋ كەرەك.

- ون جىلدىڭ الدىندا وسى جەردە تۇراتىن ءبىر ءۇيدى جان بولۋشى ەدى. سولاردىڭ قايدا كەتكەنىن بىلەسىز بە؟

- مۇندا ون جىلدىڭ الدىندا ونداي ادامدار بولعان ەمەس. بۇل كىسىلەر باعزىدان وسى ماڭدا تۇرىپ كەلەدى. سەنەر- سەنبەسىن بىلمەگەن جىگىت ۇيگە كىرىپ كەلەدى. وتاعاسى دا ونى كورگەن جەردەن تاني كەتەدى.

- الگى قاسىڭداعى وقىمىستى قايدا، ول نەگە كەلمەگەن؟ - دەپ وتاعاسى حال سۇراي باستايدى. جاس جىگىت وتاعاسىنىڭ قالايشا بۇل كۇيگە جەتكەنىن سۇراي باستايدى.

- تەگىندە ءبىزدىڭ جان باعىپ وتىرعان جالعىز عانا سيىرىمىز بولاتىن ەدى. نە قارا باسقانىن كىم ءبىلسىن، جاردان قۇلاپ ءولدى. كەيىن جان باعۋ ءۇشىن ءشوپ ءدارى، ەگىس داقىلدارىن ەكتىم. كۇزگە دەيىن اعاش كەسىپ، وتىن ساتتىم. ارينە، كەسكەندى بىلگەن ادام ەككەندى دە ءبىلۋ كەرەك قوي. سونىمەن، كەسىلگەن اعاش ورنىنا تال وتىرعىزدىم. بالالاردىڭ كيىمى توزعان سوڭ، ماقتا ەكتىم. العاش قاتتى قينالدىق. الايدا كۇز بولا بەرى ءبارى ساتىنە باستى. بۇدان بۇرىن ەگىس الاڭىنان ماعان مۇنشا كوپ پايدا تۇسەتىنىن ويلاماعان ەكەنمىن. ايەلىم كۇزدە ماقتادان كيىم تىگەدى. ال مەن ەگىس شارۋاسىمەن شۇعىلدانامىن. قازىر ءبارى دە جاقسى. الگى بار بولعىر سيىردىڭ جوعالعانىنا قاتتى قۋانىپ ءجۇرمىن، - دەگەن ەكەن.

Massaget.kz