پاتەرىن ارەنداعا بەرگەن كىسى تۇرعىنداردى ۋاقىتشا تىركەۋگە مىندەتتى - پوليتسيا

وسكەمەن. قازاقپارات - شىعىس قازاقستان پوليتسەيلەرى ازاماتتاردى تۇرعىلىقتى جەرگە تىركەۋ تالاپتارىن ءتۇسىندىردى، دەپ حابارلايدى قازاقپارات.

ىشكى كوشىپ- قونۋشىلاردى تىركەۋ قاعيدالارىنا سايكەس قازاقستاننىڭ ءاربىر ازاماتى تۇرعىلىقتى جەرىندە تىركەلۋگە ءتيىس.

14 جاستان باستاپ ازاماتتار ءبىر مەكەنجايدا تۇراقتى ەسەپكە الىنادى. تىركەۋدىڭ ەكى ءتۇرى بار: - تۇراقتى تىركەۋ - ازاماتتىڭ 1 ايدان استام ۋاقىت تۇراتىن جەرىندە ۋاقىتشا تىركەلۋى (وقۋى، جۇمىسى، ەمدەلۋى، مۇقتاجدارعا كۇتىم جاساۋى جانە باسقا).

ەگەر ادامنىڭ ءبىر مەكەنجايدا تۇراقتى تىركەۋى بار، ءبىراق ءىس جۇزىندە باسقا مەكەنجايدا ءبىر ايدان استام ۋاقىت تۇراتىن بولسا، وندا ول سول جەرگە ۋاقىتشا ەسەپكە تۇرۋى قاجەت. مەرزىم اياقتالعاننان كەيىن ۋاقىتشا تىركەۋ اۆتوماتتى تۇردە جويىلادى، تۇراقتى تىركەۋ مەكەنجايى وزگەرىسسىز قالادى. ءبىر ايدان استام مەرزىمگە ۋاقىتشا باسپانا بەرەتىن تۇرعىن ءۇيدىڭ مەنشىك يەسى سوندا تۇراتىن ازاماتتى ۋاقىتشا تىركەۋگە مىندەتتى. ولاي بولماعان جاعدايدا ەكى تاراپ تا اكىمشىلىك جاۋاپقا تارتىلادى: تىركەۋسىز ادامدار اكىمشىلىك قۇقىق بۇزۋ كودەكسىنىڭ 492-بابى بويىنشا، ال ءۇيدىڭ يەسى وسى كودەكستىڭ 493-بابى بويىنشا.

«تۇرعىلىقتى جەرى بويىنشا تىركەۋ» مەملەكەتتىك قىزمەتىن حالىققا قىزمەت كورسەتۋ ورتالىعىندا، سونداي- اق ەلەكتروندى ۇكىمەت پورتالى، eGov-mobile, Halyk Homеbank موبيلدى قوسىمشاسىندا الۋعا بولادى. ح ق و- عا جۇگىنگەن كەزدە تۇرعىلىقتى جەرى بويىنشا تىركەلۋ ءۇشىن مىناداي قۇجاتتار قاجەت:

- جەكە باسىن كۋالاندىراتىن قۇجات (تۋۋ تۋرالى كۋالىك، قازاقستان رەسپۋبليكاسى ازاماتىنىڭ جەكە كۋالىگى).

- تۇرعىن ءۇي يەسىنىڭ نەمەسە سەنىم بىلدىرىلگەن ادامنىڭ جەكە باسىن، تۇرعىن ءۇي يەسىنىڭ نەمەسە سەنىم بىلدىرىلگەن ادامنىڭ جەكە قاتىسۋىن كۋالاندىراتىن قۇجات. عيماراتتار مەن ءۇي- جايعا تىركەۋ كەزىندە ۇيىم اكىمشىلىگىنىڭ تىركەۋ تۋرالى قولداۋحاتى قاجەت. اكىمشىلىك قۇقىق بۇزۋ كودەكسىنىڭ 492-بابىنا سايكەس كۇنتىزبەلىك ون كۇننەن ءبىر ايعا دەيىن تىركەۋسىز تۇرعانى ءۇشىن ەسكەرتۋ جاسالادى، ءبىر ايدان استام مەرزىم تىركەۋسىز جۇرسە 7 ا ە ك مولشەرىندە ايىپپۇل سالىنادى.

اۆتور: جانات قاپالبايەۆا