قايتىس بولعان ادامنىڭ مۇراسى مەن مىندەتى مۇراگەرلىكپەن بەرىلە مە
7 شىلدە 16:45

قايتىس بولعان ادامنىڭ مۇراسى مەن مىندەتى مۇراگەرلىكپەن بەرىلە مە

نۇر- سۇلتان. قازاقپارات - جەكە تۇلعالاردىڭ بانكروتتىعىن قاراستىراتىن زاڭ جوباسىندا بورىشكەر قايتىس بولعان جاعدايدا، ونىڭ مىندەتىن مۇراگەرلىك ەتۋ ءتارتىبى قاراستىرىلماعان، دەپ حابارلايدى قازاقپارات ءتىلشىسى.

«زاڭ جوباسىندا مىندەتتەمەلەردى مۇراعا الۋ ءتارتىبى كوزدەلمەگەنىن ەسكەرە وتىرىپ، جەكە تۇلعا بانكروت دەپ جاريالانعان جاعدايدا، ونىڭ مۇلكى مەن مىندەتىن ازاماتتىق كودەكسكە سايكەس مۇراگەرى قابىلدايدى»، - دەپ جازىلعان قارجى مينيسترلىگىنىڭ قازاقپاراتتىڭ رەسمي ساۋالىنا بەرگەن جاۋابىندا.

قارجى مينيسترلىگى تۇسىندىرگەندەي، ازاماتتىق كودەكسكە سايكەس مىندەتتەمەلەرگە كرەديت بويىنشا بورىشتار دا جاتادى. ياعني وسيەت نەمەسە زاڭ بويىنشا مۇرانى قابىلداۋعا وزدەرى كەلىسىم بەرسە، وندا بارلىق مىندەت مۇراگەرلەرگە كوشەدى. قازاقستاندىق ساقتاندىرۋ كومپانيالارىنىڭ ءبىرى حابارلاعانداي، نەسيە ساقتاندىرىلعان جاعدايدا ونى وتەمەۋگە بولادى. دەگەنمەن ەسكەرەتىن جايتتار بار. ساقتاندىرۋ كومپانياسىمەن جاسالعان شارتتا ساقتاندىرۋ جاعدايىنىڭ بولۋى، ياعني قارىز الۋشىنىڭ قايتىس بولۋىنا قاتىستى ارنايى تارماق بولۋى ءتيىس.

تۇلعا قايتىس بولعان جاعدايدا ساقتاندىرۋ ءپوليسى بولۋ قاجەت. ەگەر بارلىق پروتسەسس ۋاقىتىندا جاسالسا، وندا قارىز تولىق كولەمدە جابىلۋى مۇمكىن. رەسمي اقپاراتتا بەرىلگەندەي قارىزدى جابۋ بىرنەشە فاكتورعا بايلانىستى. اتاپ ايتقاندا، تۇلعانىڭ قايتىس بولۋ سەبەبى، قۇجاتتاردىڭ تولىق ءتىزىمىنىڭ بولۋى جانە تاعى باسقا. مينيسترلىكتىڭ دەرەگىنشە، ەكىنشى دەڭگەيدەگى بانكتەر قارىز الۋشىنى ساقتاندىرۋ شارتىن جاساسۋعا مىندەتتەي الادى. دەگەنمەن بانك قارىز الۋشى مەن كەپىل بەرۋشىنى ساقتاندىرۋشىنى تاڭداۋدا شەكتەي المايدى. سونداي- اق، بانكتىك قارىز شارتى ارقىلى قارىز الۋشىعا ءوز ءومىرىن نەمەسە دەنساۋلىعىن ساقتاندىرۋ مىندەتى جۇكتەلمەيدى.

ەسكە سالا كەتسەك، بۇعان دەيىن ەلىمىزدە تولەم جاساۋعا مۇمكىندىگى بولماي قالعان جەكە كاسىپكەرلەردى، مەكەمەلەردى، كاسىپورىنداردى بانكروت دەپ تانۋ تۋرالى زاڭنىڭ ءتارتىبى مەن راسىمىنە قاتىستى جازعان ەدىك.

جاڭالىقتار