قىتاي كوكونىستى قۇنارلى تاۋلى ايماقتاردا ءوسىرىپ جاتىر

None
None
نۇر- سۇلتان. قازاقپارات - ءبىر ميللياردتان استام حالقى بار قىتاي ازىق- تۇلىك قاۋىپسىزدىگى ماسەلەسىنە الاڭداۋلى. ەلدە ىشكى ءوندىرىس ارتىپ، استىق پەن وزگە دە داقىلدار يمپورتىنىڭ ۇلەسى ازايىپ جاتقانى بايقالادى.

بۇعان پاندەميا سالدارىنان لوگيستيكانىڭ ءۇزىلۋى اسەر ەتتى. ال ەلدە شىعارىلاتىن ونىمدەردىڭ ساپاسى مۇقيات باقىلانادى. قىرىققابات، ءسابىز، پياز بەن كوكونىستىڭ الۋان ءتۇرىن وسىرەتىن بازا تاۋلى ايماقتا 2 جارىم مىڭ مەتر بيىكتە ورنالاسقان. جەرگىلىكتى شارۋالاردىڭ ايتۋىنشا، تازا اۋا مەن قۇنارلى توپىراقتىڭ ارقاسىندا ءدامى دە ءتىل ۇيىرەدى.

بۇرىن مۇندا شاعىن جەكە شارۋاشىلىقتار بولاتىن. ال 2000 -جىلداردىڭ اياعىندا ولار ءىرى كاسىپورىندارمەن بىرلەسىپ، ءبىرىڭعاي برەند قۇردى. ەندى 5 كومپانيا، 70 كووپەراتيۆ پەن 17 مىڭ فەرمەر ارنايى ماماندىرىلعان ساياباقتار مەن اۋىلداردا سۋىققا ءتوزىمدى كوكونىس ءوسىرىپ جاتىر.

گو شانلين، بازا قىزمەتكەرى:

- ناۋرىز ايىنان قاراشاعا دەيىن كوكونىستى اشىق توپىراقتا جانە جىل بويى جىلىجايدا وسىرەمىز. سوڭعىسى وتە ىڭعايلى، ويتكەنى ونەتىن مەرزىمىن رەتتەپ، قولايلى باعامەن ساتۋعا بولادى. ادەتتە مۇندا 4 مىڭداي ادام جۇمىس ىستەيدى، قىسقى ماۋسىمدا سانى ازايادى. قىستا اۋا- رايى مينۋس 20 گرادۋسقا دەيىن سۋيدى، ال جازدا 29 گرادۋسقا دەيىن جىليدى.

ساپاسىنا بايلانىستى ءونىمىن قىمباتتىراق ساتادى. نەگىزگى تۇتىنۋشىلارى - شاڭحاي، گۋاڭجوۋ، شىنجىن، چۇڭشين سەكىلدى قىتايدىڭ ءىرى شاھارلارى. اۋدانى 13 مىڭ گەكتاردان اساتىن ەگىستە جىلىنا 900 مىڭ توننا كوكونىس وسەدى. پايدا تابۋمەن قاتار، جەرگىلىكتى تۇرعىنداردى جۇمىسپەن قامتىپ وتىر.

بەي شەنحو، تەحنولوگ:

- وسى بازادا جاڭا سۇرىپتاردى وسىرەمىز. ءوزىن جاقسى كورسەتسە، كەلەسى جىلى ەگىس اۋدانىن كەڭەيتەمىز. اۋا تەمپەراتۋراسىنىڭ ۇلكەن ايىرماشىلىعى، تازا سۋ، اۋا مەن توپىراق ارقاسىندا ءونىمنىڭ دە ساپاسى جاقسى. سۋعا كەلەتىن بولساق، جەر استى سۋىن تولىعىمەن پايدالانامىز. ول بىردەن ارنايى قۇبىرعا تۇسەدى. بۇل سۋدى 80 پروتسەنتكە ۇنەمدەيدى.

تۇرمىسى جاقسارعان قىتاي تۇرعىندارى ەكولوگيالىق تازا ءونىمدى ءجيى تاڭدايتىن بولدى. بولجام بويىنشا، ەكى جىلدان كەيىن بۇل نارىق 13 ميلليارد دوللاردان اساتىن ءتۇرى بار. سونداي- اق، قىتاي اۋرۋلار مەن زيانكەستەرگە ءتوزىمدى ءارى قاۋىپسىز گەنەتيكالىق جەتىلدىرىلگەن داقىلداردى شىعارۋعا تىرىسىپ جاتىر. بۇل تەحنولوگيا ءوندىرىس كولەمىن ارتتىرىپ، شىعىندى ازايتادى. ىشكى سۇرانىستىڭ ارتۋى مەن كليمات وزگەرۋىنە بايلانىستى ازىق- تۇلىك قاۋىپسىزدىك ماسەلەسىنىڭ ماڭىزى زور بولىپ تۇر.

www.24.kz


سوڭعى جاڭالىقتار