استانا كۇنىنە وراي وتكەن «ەلوردا بايگەسىنىڭ» جەڭىمپازى انىقتالدى
6 شىلدە 21:13

استانا كۇنىنە وراي وتكەن «ەلوردا بايگەسىنىڭ» جەڭىمپازى انىقتالدى

نۇر- سۇلتان. قازاقپارات - استانا كۇنىنە وراي «قازانات» يپپودرومىندا «ەلوردا بايگەسى» رەسپۋبليكالىق تۋرنيرى ءوتتى، دەپ حابارلايدى قازاقپارات ءتىلشىسى.

«قازاق حالقىنىڭ رۋحىن كوتەرىپ، ارقاسىن قوزدىراتىن ۇلتتىق سپورتىمىزدىڭ ءبىرى - بايگە بولسا، سول بايگەنىڭ ءسانىن كەلتىرەتىن، وسىناۋ ۇلانعايىر دالاعا يەلىك ەتۋىمىزگە ەرەسەن ەڭبەك سىڭىرگەن ۇلتتىق برەندىمىز - قازاقتىڭ قازاناتى. ەلوردا كۇنىنە وراي وسىنداي الامان بايگە ۇيىمداستىرىپ، مەرەكەنىڭ ءسانىن اسىرىپ جاتقانىمىزدىڭ ءوزى ۇلكەن مەرەي. بارشاڭىزدى قالا كۇنىمەن قۇتتىقتايمىن»، - دەدى پرەمەر- ءمينيستردىڭ ورىنباسارى ەرالى توعجانوۆ بايگەنىڭ اشىلۋ سالتاناتىندا.


ەلوردانىڭ 24 جىلدىق مەرەيتويىنا ارنالىپ وتكەن رەسپۋبليكالىق بايگەدە نۇر- سۇلتان، الماتى، شىمكەنت قالالارى مەن ەلىمىزدىڭ بارلىق وڭىرىنەن 150-دەن استام سايگۇلىك باعىن سىنادى. جارىستىڭ جالپى جۇلدە قورى - 20 ميلليون تەڭگە. ات جارىسى ۇشقىر بايگە (1400 جانە 2400 مەتر)، قۇنان بايگە (7000 جانە 9000 مەتر)، كىشى الامان (16 شاقىرىم) جانە الامان بايگە (20 جانە 21 شاقىرىم) سىندى 7 ءتۇر بويىنشا ءوتتى.

20 شاقىرىمدىق الامان بايگەدە 8 سايگۇلىك جارىس جولىنا شىعىپ، قوستاناي وبلىسىنان كەلگەن مۇرات يسماعامبەتوۆتىڭ «ريبا» ەسىمدى تۇلپارى مارە سىزىعىن العاش بولىپ كەستى.


ايتا كەتسەك، اتالعان شارا نۇر- سۇلتان قالاسى اكىمدىگى قولداپ، قالالىق دەنە شىنىقتىرۋ جانە سپورت باسقارماسىنىڭ ۇيىمداستىرۋىمەن ءوتتى.


جاڭالىقتار