شي جينپيڭ نازاربايەۆتى قۇرمەتتى مەيمان رەتىندە قارسى الاتىنىن ايتتى- مەرەكەلىك حاتتار
6 شىلدە 20:07

شي جينپيڭ نازاربايەۆتى قۇرمەتتى مەيمان رەتىندە قارسى الاتىنىن ايتتى- مەرەكەلىك حاتتار

نۇر- سۇلتان. قازاقپارات - نۇرسۇلتان نازاربايەۆتىڭ اتىنا ەلوردا كۇنىنە جانە ءوزىنىڭ تۋعان كۇنىنە وراي مەرەكەلىك حاتتار مەن جەدەلحاتتار كەلىپ تۇسۋدە، دەپ حابارلايدى قازاقپارات تۇڭعىش پرەزيدەنتتىڭ رەسمي سايتىنا سىلتەمە جاساپ.

رەسەي فەدەراتسياسىنىڭ پرەزيدەنتى ۆلاديمير پۋتين ءوز جەدەلحاتىندا قازاقستاننىڭ قازىرگى تاريحىنداعى اسا ماڭىزدى بەلەستەردىڭ بارلىعى نۇرسۇلتان نازاربايەۆتىڭ ەسىمىمەن تىعىز بايلانىستى ەكەنىن اتاپ ءوتتى.

ۆلاديمير پۋتين قازاقستاننىڭ تۇڭعىش پرەزيدەنتى ءوزىنىڭ ۇزاق جىلدار بويى اتقارعان مەملەكەتتىك قىزمەتىندە وتانداستارىنىڭ قۇرمەتىنە بولەنىپ، حالىقارالىق ابىرويعا يە بولعانىن جەتكىزدى. رەسەي فەدەراتسياسىنىڭ پرەزيدەنتى سونداي- اق نۇرسۇلتان نازاربايەۆتىڭ ينتەگراتسيالىق باستامالاردى جۇزەگە اسىرۋداعى رولىنە توقتالدى.

«ەلدەرىمىز اراسىندا وداقتاستىق قاتىناستار مەن ستراتەگيالىق ىنتىماقتاستىق ورناتۋعا، سونىمەن قاتار ەۋرازيا كەڭىستىگىندەگى ينتەگراتسيالىق پروتسەستەردى ىلگەرىلەتۋگە ءسىزدىڭ قوسقان ۇلەسىڭىز زور»، دەلىنگەن ۆلاديمير پۋتيننىڭ جەدەلحاتىندا.

قىتاي حالىق رەسپۋبليكاسىنىڭ ءتوراعاسى شي جينپيڭ ەكى ەل حالىقتارىنىڭ اراسىنداعى جان- جاقتى ىنتىماقتاستىقتى تەرەڭدەتۋگە نۇرسۇلتان نازاربايەۆتىڭ قوسقان ۇلەسىنە توقتالدى. ول قازاقستان مەن قىتاي اراسىنداعى قازىرگى مەملەكەتارالىق قاتىناس تاتۋ كورشىلىكتىڭ ۇلگىسى ەكەنىن اتاپ ءوتتى. «ءسىزدىڭ ەكىجاقتى قارىم- قاتىناستى ىلگەرىلەتۋ مەن دامىتۋعا قوسقان ۇلەسىڭىزدى جوعارى باعالايمىن»، دەگەن شي جينپيڭ قازاقستاننىڭ تۇڭعىش پرەزيدەنتىن كەز كەلگەن ۋاقىتتا قىتاي ەلىنىڭ قۇرمەتتى مەيمانى رەتىندە قارسى الاتىنىن جەتكىزدى.

جىلى لەبىزىن ءبىلدىرىپ جەدەلحات جولداعان، نۇرسۇلتان نازاربايەۆتىڭ ەل پرەزيدەنتى قىزمەتىندەگى رولىنە جوعارى باعا بەرگەن باسقا دا شەتەل مەملەكەتتەرى مەن ۇكىمەتتەرى باسشىلارىنىڭ قاتارىندا وزبەكستان رەسپۋبليكاسىنىڭ پرەزيدەنتى شاۆكات ميرزيەۆ، تاجىكستان رەسپۋبليكاسىنىڭ پرەزيدەنتى ەمومالي راحمون، بەلارۋس رەسپۋبليكاسىنىڭ پرەزيدەنتى الەكساندر لۋكاشەنكو، قىرعىز رەسپۋبليكاسىنىڭ پرەزيدەنتى سادىر جاپاروۆ، رەسەي فەدەراتسياسى ۇكىمەتىنىڭ ءتوراعاسى ميحايل ميشۋستين جانە باسقالارى بار.

ءتۇرلى مەملەكەتتەردىڭ كوشباسشىلارى قازاقستاننىڭ تۇڭعىش پرەزيدەنتىنىڭ ەلدەر اراسىندا تاتۋ كورشىلىك، ستراتەگيالىق ىنتىماقتاستىق جانە دوستىق بايلانىستاردى دامىتۋعا قوسقان ۇلەسىن جوعارى باعالادى.

مەرەكەلىك قۇتتىقتاۋلاردا نۇرسۇلتان نازاربايەۆتىڭ باسشىلىعىمەن قازاقستان تاۋەلسىزدىك جىلدارىندا ساياسي، ەكونوميكالىق جانە الەۋمەتتىك سالالاردا ماڭىزدى جەتىستىكتەرگە جەتىپ، حالىقارالىق قوعامداستىقتا لايىقتى ورىنعا يە بولعانى ايتىلعان. رەسەي فەدەراتسياسىنىڭ جانە الىس- جاقىن شەتەلدەردىڭ مەملەكەت جانە قوعام قايراتكەرلەرىنەن كوپتەگەن حاتتار كەلىپ ءتۇستى. وندا قازاقستاننىڭ تۇڭعىش پرەزيدەنتىنىڭ ەۋرازيا كەڭىستىگىندە ىنتىماقتاستىقتى، تۇراقتىلىق پەن قاۋىپسىزدىكتى نىعايتۋعا قوسقان زور ۇلەسى اتاپ وتىلگەن.

جىلداعى ءداستۇر بويىنشا قازاقستاندىق ساياسي قايراتكەرلەردەن، وتاندىق جانە شەتەلدىك ىسكەر توپتار وكىلدەرىنەن قۇتتىقتاۋلار كوپ بولدى. ولار نۇرسۇلتان نازاربايەۆتىڭ ەلىمىزدە ساياسي تۇراقتىلىق پەن الەۋمەتتىك- ەكونوميكالىق دامۋدى قامتاماسىز ەتۋ جولىنداعى ەڭبەگىنە توقتالدى. قازاقستاننىڭ كورنەكتى قوعام قايراتكەرلەرى، عىلىم مەن شىعارماشىلىق ينتەلليگەنتسيا وكىلدەرى قازاقستاننىڭ تۇڭعىش پرەزيدەنتىن ەلوردا كۇنىمەن قۇتتىقتاپ، زور دەنساۋلىق تىلەگەن جىلى لەبىزدەرىن جەتكىزدى. بۇل قاتاردا مادەنيەت قايراتكەرى، وپەرا ءانشىسى م. مۋدرياك ەلىمىزدىڭ گۇلدەنۋىنە، حالىقتىڭ ءال- اۋقاتىنىڭ جاقسارۋى جولىندا ۇلكەن ىستەر اتقارعان قازاقستاننىڭ تۇڭعىش پرەزيدەنتىن ماقتان تۇتاتىنىن ايتتى.

ەلىمىزدىڭ جانە تاياۋ شەتەل ازاماتتارىنان نۇرسۇلتان نازاربايەۆتىڭ اتىنا زور دەنساۋلىق پەن سارقىلماس كۇش- قۋات تىلەپ، جىلى لەبىزدەرىن جولداعان حات- حابارلار كوپتەپ كەلدى. ءتۇرلى بۋىن وكىلدەرى مەن كاسىپ يەلەرى نۇرسۇلتان نازاربايەۆقا قازاقستان پرەزيدەنتى كەزىندە اتقارعان قىزمەتى ءۇشىن العىس ءبىلدىردى. ولاردىڭ ىشىندە نۇر- سۇلتان قالاسىندا تۇراتىن اپالى- ءسىڭلىلى ايجان مەن ءاليا ايتحوجينالار تۇڭعىش پرەزيدەنتتى تۋعان كۇنىمەن قۇتتىقتاپ، وسىنداي اسەم قالا ءۇشىن شىنايى العىس سەزىمدەرىن ءبىلدىردى.

ال الماتى وبلىسىنىڭ تۇرعىنى ن. ەدىگەيەۆا ءوزىنىڭ جىلى لەبىزى مەن شىنايى تىلەكتەرىن ولەڭ جولدارى ارقىلى جەتكىزدى. نۇرسۇلتان نازاربايەۆ كەلىپ تۇسكەن حات- حابارلارمەن تانىسىپ، بارلىق قۇتتىقتاۋ حاتتاردىڭ اۆتورلارىنا جىلى سوزدەرى مەن ىستىق تىلەكتەرى ءۇشىن ريزاشىلىعىن بىلدىرەدى.

فوتو: elbasy.kz

جاڭالىقتار