تەڭىز كەن ورنىندا جارىلىس بولىپ، ەكى ادام قازا تاپتى
6 شىلدە 14:42

تەڭىز كەن ورنىندا جارىلىس بولىپ، ەكى ادام قازا تاپتى

اتىراۋ. قازاقپارات - اتىراۋ وبلىسىندا ورنالاسقان تەڭىز كەن ورنىندا جارىلىس بولدى. جارىلىستان ەكى ادام قازا تاپتى. ال، ءۇش ادام ءارتۇرلى دەنە جاراقاتىن العان، دەپ حابارلايدى قازاقپارات ءتىلشىسى.

بۇل دەرەكتى اتىراۋ وبلىستىق پوليتسيا دەپارتامەنتىنىڭ باسپا ءسوز قىزمەتى راستادى. تەڭىز كەن ورنىنداعى جارىلىس بۇگىن، 6 -شىلدەدە جەرگىلىكتى ۋاقىتپەن ساعات 09:55 شاماسىندا بولعان. بىزگە ءمالىم دەرەككە قاراعاندا، كەن ورنىنداعى اتموسفەرالىق گازى بار قۇبىردا گيدروتەست جۇرگىزىلگەن. قىسىمعا توتەپ بەرە الماعان قۇبىر جارىلىپ كەتكەن. جارىلىستىڭ سالدارىنان وقيعا ورنىندا ەكى جۇمىسشى كوز جۇمدى. ال، ءۇش ادام ءارتۇرلى دەنە جاراقاتىن الىپ، مەديتسينا قىزمەتكەرلەرىنە جۇگىنگەن.

«جىلىوي اۋدانىندا ورنالاسقان تەڭىز قالاشىعىندا قۇبىر جارىلىپ، سونىڭ سالدارىنان 1985 -جىلى تۋعان ەكى قىزمەتكەر قايتىس بولدى. ءۇش ادام جاراقاتتاندى. زارداپ شەككەن 3 قىزمەتكەرگە مەديتسينالىق كومەك كورسەتىلىپ جاتىر»، - دەپ ءمالىم ەتتى پوليتسيا دەپارتامەنتىنىڭ باسپا ءسوز قىزمەتىنەن.

قازىر اتالعان فاكتى بويىنشا ق ر قىلمىستىق كودەكسى 156-بابىنىڭ 3-بولىمىمەن سوتقا دەيىنگى تەرگەۋ امالدارى باستالدى. وزگە اقپارات ق ر قىلمىستىق- پروتسەستىك كودەكسىنىڭ 201-بابىنا سايكەس جاريالاۋعا جاتپايدى. كەن ورنىنداعى جارىلىسقا بايلانىستى اتموفەرالىق گازى بار قۇبىردا گيدروتەست جۇرگىزۋ جۇمىستارى تولىعىمەن توقتاتىلدى. ءتيىستى ورگاندار تەحنيكالىق قاۋىپسىزدىك تالابىنىڭ ساقتالۋىنا بايلانىستى تەكسەرۋدى باستادى.

ەسكە سالا كەتەلىك، بۇدان بۇرىن تەڭىز كەن ورنىندا مەردىگەر مەكەمەنىڭ سەحى ورتەنگەنىن حابارلاعان ەدىك.

فوتو: businesswire.com

جاڭالىقتار