اتىراۋ وبلىسىندا وعىز- قىپشاق داۋىرىندەگى بالبال تاس تابىلدى
بالبال تاس قىزىلقوعا اۋدانىنداعى ساعىز اۋىلىنىڭ ماڭىنداعى «تاسقارا» قورعانىنان تابىلعان. ارحەولوگتار بالبال تاستى شامامەن 9-11- عاسىرعا تيەسىلى دەگەن بولجام جاساپ وتىر. ارحەولوگيالىق ولجا سانالاتىن بالبال تاستىڭ بيىكتىگى - 1 مەتر 20 س م، ال، ەنى - 50 س م. بۇرىن اتىراۋ وبلىسىندا ءدال مۇنداي بالبال تاس تابىلماعان.
«بالبال تاستى وعىز- قىپشاق داۋىرىنەن قالعان دەپ بولجاۋعا بولادى. كونە تۇركى عۇرپىنان سىر شەرتەتىن كونە جادىگەرمەن بىرگە تابىنۋعا ارنالعان قۇرالدار تابىلدى. مۇنداي بالبالتاستار IX عاسىردان باستاپ يسلام ءدىنى تاراۋىنا بايلانىستى دالامىزدان جويىلا باستادى. ويتكەنى يسلام دىنىندە ادام بەينەسىن سالۋعا رۇقسات ەتىلمەيدى»، - دەيدى تاريح ماگيسترى سەيىلحان ميراش.
قىزىلقوعا اۋدانىندا كونە قورعاندار كوپ. بۇرىن بۇل اۋداننىڭ اۋماعىندا ءبىزدىڭ زامانىمىزعا دەيىنگى Ⅱ عاسىر مەن ءبىزدىڭ زامانىمىزدىڭ Ⅺ عاسىرى ارالىعىن قامتيتىن ميالى قورعانى بار. بۇل قورعاندى 2017 -جىلى وبلىستىق تاريحي- ولكەتانۋ مۋزەيى انىقتاعان ەدى. قورعاننىڭ جوعارعى قاباتى 10-11 -عاسىرلاردان، تومەنگى قاباتى ءبىزدىڭ زامانىمىزعا دەيىنگى Ⅱ عاسىرداعى تەمىر داۋىرىنەن سىر شەرتەدى. ال، 2020 -جىلى وسىنداعى ءۇش قورعاندا جۇرگىزىلگەن قازبا جۇمىستارى كەزىندە 560 ءتۇرلى جادىگەر تابىلدى. ونىڭ ىشىندە التىن مەن كۇمىستەن سوعىلعان اشەكەي بۇيىمدار مەن ات ابزەلدەرى، قولادان سوعىلعان قارۋ- جاراقتىڭ، كەراميكالىق قۇمىرالار مەن قايشى دا بار.
قابىردىڭ بىرىنە جەرلەنگەن ادام قاڭقاسىنىڭ جامباسىندا قادالىپ تۇرعان جەبە سىنىعى بولعان. «بۇل جەرلەگەن ادامنىڭ سوعىستا قازا تاپقانىنىڭ بەلگىسى بولۋى مۇمكىن. ونى عۇن نەمەسە وعىز تايپاسىنىڭ وكىلى دەپ توپشىلاپ وتىرمىز. سەبەبى، قورعاننان تابىلعان مولا سول كۇيى ساقتالعان»، - دەپ ەدى سول كەزدە مۋزەي ديرەكتورى راشيدا حاريپوۆا.
ەسكە سالا كەتەلىك، بۇدان بۇرىن اتىراۋداعى ميالى قورعانىنان 560 جادىگەر تابىلعانىن جازعان ەدىك.