قازاقستاننان وزبەكستانعا ەت ونىمدەرىنىڭ ەكسپورتى ۇلعايماق
6 شىلدە 10:45

قازاقستاننان وزبەكستانعا ەت ونىمدەرىنىڭ ەكسپورتى ۇلعايماق

نۇر- سۇلتان. قازاقپارات - قازاقستاننىڭ 19 مال شارۋاشىلىعى ءونىمىن ءوندىرۋشىسى ءوز تاۋارىن وزبەكستانعا ەكسپورتتاۋ قۇقىعىنا يە بولدى.

ءتيىستى كەلىسىمگە اۋىل شارۋاشىلىعى ءمينيسترى ەربول قاراشوكەيەۆتىڭ تاشكەنتكە ساپارى بارىسىندا قول جەتكىزىلدى، دەپ حابارلايدى قازاقپارات ۆەدومستۆو سايتىنا سىلتەمە جاساپ.

«بۇعان دەيىن تىزىلىمگە 37 قازاقستاندىق كاسىپورىن ەنگىزىلگەن بولاتىن. وزبەك تاراپىنا قازاقستاننىڭ ۆەتەريناريا جۇيەسىنە تولىق شولۋ جاساۋ قورىتىندىسى بويىنشا ۆەتەرينارلىق قىزمەتتىڭ كەپىلدىگىمەن تاعى 19 مال شارۋاشىلىعى ءونىمىن ءوندىرۋشى ەكسپورتتاۋ قۇقىقىعىنا يە بولدى. ناتيجەسىندە، قازىرگى وزبەكستاننىڭ تىزىلىمىندە 56 قازاقستاندىق كاسىپورىن بار»، - دەلىنگەن مينيسترلىك مالىمەتىندە.


ايتا كەتسەك، 4-6 -شىلدە ارالىعىندا وزبەكستان استاناسىندا تۇركى اگرو- فورۋمى، تۇركى مەملەكەتتەرى ۇيىمى مەن ەكونوميكالىق ىنتىماقتاستىق ۇيىمىنا مۇشە مەملەكەتتەردىڭ اۋىل شارۋاشىلىعى مينيسترلەرىنىڭ كەڭەسى ءوتىپ جاتىر.

ق ر اۋىل شارۋاشىلىعى ءمينيسترى ەربول قاراشوكەيەۆ وزبەكستاننىڭ اۋىل شارۋاشىلىعى مينيسترلىگىنىڭ وكىلدەرىمەن كەزدەستى. تاراپتار حالىقارالىق كۇن ءتارتىبىنىڭ ماڭىزدى اسپەكتىلەرى، ونىڭ ىشىندە ازىق- تۇلىك قاۋىپسىزدىگى جانە گۋمانيتارلىق داعدارىس ماسەلەلەرى بويىنشا پىكىر الماستى. سونداي- اق، ءوزارا ءتيىمدى ىنتىماقتاستىقتى ودان ءارى نىعايتۋ نيەتتەرىن پىسىقتادى. مينيستر ءمالىم ەتكەندەي، قازاقستان تۇركى مەملەكەتتەرى ۇيىمدارى (ت م ۇ) ەلدەرىنە وتاندىق ءونىمنىڭ ەكسپورتىن ۇلعايتۋعا مۇددەلى.

«بۇگىنگى تاڭدا قازاقستاندا ت م ۇ ەلدەرىنە اۋىل شارۋاشىلىعى ونىمدەرىنىڭ ەكسپورتتىق جەتكىزىلىمىن ايتارلىقتاي ارتتىرۋعا مۇمكىندىك بار. سونداي- اق، ءبىز تەرەڭ قايتا وڭدەۋ تاۋارلارىن جەتكىزۋدى ۇلعايتۋعا قىزىعۋشىلىق تانىتىپ وتىرمىز»، - دەدى ەربول قاراشوكەيەۆ.

فوتو: gov.kz

جاڭالىقتار