بۇگىن - ەلوردا كۇنى
6 شىلدە 08:07

بۇگىن - ەلوردا كۇنى

نۇر- سۇلتان. قازاقپارات – 6 - شىلدەدە قازاقستاندىقتار استانامىز - نۇر- سۇلتان قالاسى كۇنىن مەرەكەلەيدى، دەپ حابارلايدى قازاقپارات ءتىلشىسى.

بيىل اقمولا قالاسىنىڭ استانا اتاۋىن الىپ، ەلوردا بولعانىنا 24 جىل. بۇگىندە نۇر- سۇلتان قالاسى - ەلىمىزدەگى ماڭىزدى وقيعالاردىڭ ورداسى. سونىمەن قاتار، ەلوردادا رەسپۋبليكالىق جانە حالىقارالىق ايتۋلى ءىس- شارالار مەن كەزدەسۋلەر ءوتىپ تۇرادى.

سولاردىڭ بىرەگەيى - ءار ءۇش جىل سايىن وتەتىن الەمدىك جانە ءداستۇرلى دىندەر كوشباسشىلارىنىڭ سەزى، 2011 -جىلى وتكەن قىسقى ازيادا ويىندارى، سيريا ماسەلەسىنە ارنالعان «استانا پروتسەسى» جانە ەكسپو-2017 حالىقارالىق كورمەسى. بۇعان دەيىن ەلوردامىز يۋنەسكو- نىڭ شەشىمىمەن «بەيبىتشىلىكتىڭ قالاسى» اتاعىنا يە بولدى.

تاريحقا كوز جۇگىرتسەك...

1997 -جىلى 20 -قازاندا استانانى اۋىستىرۋ تۋرالى جارلىققا قول قويىلدى. 1998 -جىلى 6 -مامىردا اقمولا قالاسىنىڭ اتاۋى استانا بولىپ وزگەردى. 1998 -جىلى 10- ماۋسىمدا ەلوردامىز - استانا قالاسىنىڭ حالىقارالىق تۇساۋكەسەر ءراسىمى ءوتتى.

2008 -جىلى 6 -شىلدە «استانا كۇنى» مەملەكەتتىك مەرەكە رەتىندە تىزىمگە ەندى. 2019 -جىلى 23 -ناۋرىزدا استانا قالاسىنىڭ اتاۋى نۇر- سۇلتان بولىپ وزگەردى.

«استانا كۇنى» جىل سايىن مەملەكەتتىك دەڭگەيدە كەڭىنەن اتالىپ وتەدى. بيىل دا ەلوردا اكىمدىگى قالا كۇنىنە وراي ءبىرقاتار ءىس- شارا ۇيىمداستىردى. اتاپ ايتساق، 4-6- شىلدە كۇندەرى ساعات 12:00-دەن كەشكى 22:00-گە دەيىن ورتالىق ساياباقتا «Mereke Street» فەستيۆالى وتەدى. شارا بارىسىندا قالا تۇرعىندارى مەن قوناقتارىنىڭ «بارىس»، «استانا» فۋتبول كلۋبى جانە «استانا» باسكەتبولشىلار كومانداسىنىڭ تانىمال سپورتشىلارىمەن سۋرەتكە ءتۇسىپ، اۆتوگراف الۋ مۇمكىندىگى بار. سونداي- اق، ونەر جۇلدىزدارىنىڭ قاتىسۋىمەن كونسەرتتىك باعدارلاما قاراستىرىلعان.

مەرەكە كۇنى ەسىل جاعالاۋىندا «Creative Summer» جوباسى ۇيىمداستىرىلادى. اتالعان شارادا شىعارماشىلىق ۇجىمدار، ۆوكاليستەر مەن انيماتورلار ونەر كورسەتەدى. 6- شىلدە كۇنى ەلورداداعى «قازانات» يپپودرومىندا «ەلوردا بايگەسى» رەسپۋبليكالىق ات جارىسى وتەدى. قالا كۇنىنە وراي ۇيىمداستىرىلعان جارىسقا ەلىمىزدىڭ بارلىق وڭىرىنەن 150-دەن استام سپورتشى قاتىسادى.

ايتا كەتسەك، بيىل قالا كۇنىنە وراي مەرەكەلىك وتشاشۋ بولمايدى. ول تۋرالى ەلوردا اكىمدىگى حابارلادى.


جاڭالىقتار