پەتروپاۆلدا بالىقشىنىڭ قارماعىنا مىلتىق ىلىكتى
5 شىلدە 22:47

پەتروپاۆلدا بالىقشىنىڭ قارماعىنا مىلتىق ىلىكتى

پەتروپاۆل. قازاقپارات - سولتۇستىك قازاقستان وبلىسىندا وزەننەن بالىق اۋلايمىن دەپ، قارماعىنا مىلتىق ىلىكتىرگەن تۇرعىن قارۋدى پوليسياعا تاپسىردى. ءتارتىپ ساقشىلارى ونىڭ بۇل ارەكەتىن وڭ باعالادى، دەپ حابارلايدى قازاقپارات ءتىلشىسى.

س ق و پوليتسيا دەپارتامەنتى باسپا ءسوز قىزمەتىنىڭ مالىمەتىنشە، پەتروپاۆلدىق بالىقشىنىڭ قارماعىنا ەرەكشە «ولجا» تۇسكەن. ماۋسىم ايىنىڭ سوڭىندا قالانىڭ 26 جاستاعى تۇرعىنى بوركي كەنتىندە ەسىل وزەنىنەن بالىق اۋلاۋعا بارادى. ايتۋىنشا، قارماعىنا ءبىر اۋىر نارسە ىلىككەن. ول مىلتىق بولىپ شىعىپتى. بۇل تۋرالى جىگىت «102» نومىرىنە حابارلاپ، قاۋىپتى «ولجانى» پوليسەيلەرگە تاپسىرادى.

«جىگىتتىڭ قارۋدى تاۋىپ العاننان كەيىن بىردەن پوليسياعا حابارلاعانى دۇرىس بولدى. تىركەلمەگەن قارۋدى ساقتاۋعا تىيىم سالىنعانى تۋرالى ەستەرىڭىزگە سالامىز. قارۋدى ىشكى ىستەر ورگاندارىنا ءوز ەركىمەن تاپسىرۋ، تاپسىرعان ادامنىڭ ارەكەتىندە باسقا قىلمىستىق قۇرام بولماعان جاعدايدا، زاڭسىز ساقتاعانى ءۇشىن جاۋاپكەرشىلىكتەن بوساتادى» ، - دەيدى سقو پد اكىمشىلىك پوليسيا باسقارماسى باستىعىنىڭ مىندەتىن اتقارۋشى ەرلان ماديەۆ.

ال، تابىلعان مىلتىق ساراپتاماعا جىبەرىلدى. ناتيجەسىندە، ونىڭ تىركەلمەگەن 12 كاليبرلى قوس ۇڭعىلى «توز-34» اڭشى مىلتىعى ەكەنى انىقتالدى. زەرتتەۋ اياقتالعان سوڭ، قارۋ جويىلادى.


جىل باسىنان بەرى س ق و- دا تۇرعىندار ءوز ەركىمەن تىركەلمەگەن 9 قارۋدى تاپسىرعان. پوليتسيا قىزمەتكەرلەرى تىركەلگەن قارۋدىڭ دۇرىس ساقتالۋىن قاداعالاپ، سونىمەن قاتار زاڭسىز ساقتالعان قارۋدى الۋ بويىنشا جۇمىستار جۇرگىزەدى. جالپى وبلىستا قاڭتار ايىنان بەرى زاڭسىز اينالىمنان 53 قارۋ الىنعان.

اۆتور اقەركە داۋرەنبەك قىزى

جاڭالىقتار