تاراز بەن شىمكەنتتە ۇيىمداسقان قىلمىستىق توپتى ۇستالدى
5 شىلدە 21:46

تاراز بەن شىمكەنتتە ۇيىمداسقان قىلمىستىق توپتى ۇستالدى

نۇر- سۇلتان. قازاقپارات - ۇلتتىق قاۋىپسىزدىك كوميتەتى ارنايى وپەراتسيا اياسىندا ەلىمىزدىڭ وڭتۇستىك وڭىرلەرىندەگى كريمينوگەندىك جاعدايعا تەرىس اسەر ەتىپ كەلگەن ۇيىمداسقان قىلمىستىق توپتى ۇستادى، دەپ حابارلايدى قازاقپارات ۇ ق ك باسپا ءسوز قىزمەتىنە سىلتەمە جاساپ.

«30- ماۋسىمدا ۇقك ىشكى ىستەر مينيسترلىگىمەن بىرگە تاراز جانە شىمكەنت قالالارىندا ءبىر مەزگىلدە «ا» جانە «بۇركىت» ارنايى ماقساتتاعى بولىمشەلەرىنىڭ جۇمىلدىرىلۋىمەن ەلىمىزدىڭ وڭتۇستىك وڭىرلەرىندەگى كريمينوگەندىك جاعدايعا تەرىس اسەر ەتىپ كەلگەن، قوعام ءۇشىن ءقاۋىپتى ۇيىمداسقان قىلمىستىق توپتىڭ زاڭسىز ءىس- ارەكەتىنىڭ جولىن كەسۋ بويىنشا ارنايى وپەراتسيانى جۇزەگە اسىردى. بۇل ماقساتتا الدىن الا جەدەل- ىزدەستىرۋ جانە ارنايى ءىس- شارالاردىڭ تولىق كەشەنى مۇقيات جۇرگىزىلدى. ناتيجەسىندە قىلمىستىق توپ مۇشەلەرىنىڭ تاۋارلى- ماتەريالدىق قۇندىلىقتاردى اسا ءىرى مولشەردە ۇرلاۋعا جانە كاسىپكەرلەردەن اقشا قاراجاتىن بوپسالاۋعا قاتىسى بار ەكەندىگى تۋرالى دالەلدەر جينالدى. ارنايى وپەراتسيانىڭ ناتيجەسىندە قىلمىستىق توپتىڭ 14 كوشباسشىسى مەن بەلسەندى قاتىسۋشىلارى ۇستالدى» ، - دەلىنگەن كوميتەت اقپاراتىندا.

پروتسەسسۋالدىق ءىس- شارالار بارىسىندا قارۋ- جاراق ارسەنالى، قوماقتى اقشا، سونداي- اق تەرگەۋ مۇددەسىندە قىزىعۋشىلىق تۋدىراتىن قۇجاتتار تاركىلەندى.

سوتقا دەيىنگى تەرگەۋ جۇرگىزىلىپ جاتىر. ۇستالعانداردىڭ باسقا دا قىلمىستارعا قاتىسى بارى تەكسەرىلەدى.


جاڭالىقتار