باپكەر تريلوگيادا «كانەلونىڭ» جوسپارىن اشىپ ايتتى

نۇر-سۇلتان. قازاقپارات - ەكىنشى ورتا سالماقتاعى ابسوليۋت چەمپيون ساۋل كانەلو الۆارەستىڭ (57-2-2، 39 ك و) باپكەرى ەددي رەينوسو گەننادي گولوۆكينمەن (42-1-1، 37 ك و) ءۇشىنشى كەزدەسۋدە قازاقستاندىق بوكسشىنى نوكاۋت كۇتىپ تۇرعانىن ايتتى، - دەپ حابارلايدى Vesti.kz.

باپكەر الداعى ايقاستا كانەلو ستيلىن تۇبەگەيلى وزگەرتپەيتىنىن ايتتى.

«ءبىز گولوۆكيندى بۇعان دەيىنگى كەزدەسۋلەردە دە نوكاۋتپەن جەڭگىمىز كەلگەن. ءبىراق قۇلاتا المادىق. الداعى جەكپە-جەككە جاقسىلاپ دايىندالامىز. سوسىن نوكاۋتپەن جەڭەمىز. ءبىز بۇعان دەيىنگى ەكى كەزدەسۋدەگىدەي جۇدىرىقتاسامىز.

قورعانىستا مىقتى بولىپ، قارسى شابۋىلعا يەك ارتامىز. ولار ءبىر-ءبىرىن وتە جاقسى بىلەدى. مەنىڭ ويىمشا، العاشقى راۋندتار قيىن بولادى»، - دەپ كەلتىرەدى رەينوسونىڭ ءسوزىن fightnews.info پورتالى.