ەكى وبلىس سارى ايماققا وتكەن جاعدايدا عانا شارا قولدانىلادى - ە. سىدىمانوۆ
5 شىلدە 18:57

ەكى وبلىس سارى ايماققا وتكەن جاعدايدا عانا شارا قولدانىلادى - ە. سىدىمانوۆ

تالدىقورعان. قازاقپارات - بۇگىن وڭىرلىك كوممۋنيكاتسيالار قىزمەتىنىڭ الاڭىندا الماتى وبلىسى سانيتارلىق-ەپيدەميولوگيالىق باقىلاۋ دەپارتامەنتىنىڭ باسشىسى ەرعالي سىدىمانوۆ الماتى وبلىسى مەن جەتىسۋ وبلىسىنداعى ەپيدەميولوگيالىق جاعداي تۋرالى بايانداپ بەردى، - دەپ حابارلايدى قازاقپارات ءتىلشىسى.

ايتۋىنشا، بۇگىندە ەكى وبلىستا دا كوروناۆيرۋستىق ينفەكسيانىڭ ءوسۋ قارقىنى بايقالادى. ياعني، وتكەن اپتامەن سالىستىرعاندا جەتىسۋ وبلىسىندا 0,0004 تەن 0,003 كە دەيىن ءوستى، ال الماتى وبلىسىندا بۇل كورسەتكىش 0,001 دەن 0,02 گە دەيىن جەتكەن.

«پاندەميا باستالعالى ەكى وڭىردە كوروناۆيرۋستىق ينفەكتسيانىڭ 69606 جاعدايى تىركەلدى. وتكەن تاۋلىكتە قاراساي جانە ىلە اۋداندارىندا 3 جاعداي جانە سارقان اۋدانىندا 1 جاعداي تىركەلدى. وبلىستار «جاسىل» ايماقتا. حالىقتى ۆاكسيناتسيالاۋ جۇمىستارى دا جالعاسۋدا»، - دەدى ەرعالي جاقسىباي ۇلى.

سپيكەردىڭ مالىمەتتەرىنە سۇيەنسەك، بۇگىنگى تاڭدا وڭىرلەردە 366 ەگۋ پۋنكتى جانە 67 جىلجىمالى پۋنكت جۇمىس ىستەيدى.

ەكى وبلىستىڭ تۇرعىندارى ءۇشىن ۆيرۋسقا قارسى پرەپاراتتاردىڭ ءۇش ءتۇرى قولجەتىمدى: QazCovid-in, SinopharmVeroCell جانە Comirnaty (Pfizer).

ەگەر، ەپيدەميولوگيالىق احۋالدىڭ ودان ءارى ناشارلاعانى بايقالاتىن بولسا، كەلەسى شارالار قولدانىلماق:

- ناۋقاسپەن تىعىز قارىم-قاتىناستا بولعانداردى قاشىقتان جۇمىس ىستەۋ فورماتىنا كوشىرۋ؛

- COVID-19 ۆاكسيناسىنا تۇبەگەيلى قارسى كورسەتىلىمدەرى بار قىزمەتكەرلەر مەن جۇكتى ايەلدەردى قاشىقتان جۇمىس ىستەۋ فورماتىنا اۋىستىرۋ؛

- جابىق جەرلەر مەن قوعامدىق كولىكتە مىندەتتى تۇردە ماسكا تاعۋ؛

- 10 ادامنان استام قاتىسۋشىسى بار جينالىستاردى ونلاين فورماتتا وتكىزۋدى ۇسىنۋ.

سونداي-اق ەپيدەميولوگيالىق قاۋىپتىلىك ايماعىنا قاراماستان، اۋە، ت ج كولىكتەرى مەن حالىقارالىق اۆتوبۋس تاسىمالدارىندا ماسكا تاعۋ ۇسىنىلادى.

جاڭالىقتار