18:29, 05 - شىلدە 2022 | GMT +6
استانا كۇنىن مەرەكەلەۋ كەزىندە ساقتىق شارالارىنا جاۋاپكەرشىلىكپەن قاراعان ءجون - ەرجان بايتانايەۆ
نۇر-سۇلتان. قازاقپارات - استانا كۇنىن مەرەكەلەۋ قارساڭىندا سانيتاريالىق-ەپيدەميولوگيالىق باقىلاۋ كوميتەتى ازاماتتاردى ساقتىق شارالارىن جاۋاپكەرشىلىكپەن ورىنداۋعا شاقىردى، دەپ حابارلايدى قازاقپارات.
كوميتەتتىڭ رەسمي وكىلى ەرجان بايتانايەۆ كوپشىلىككە ادامدار جاپپاي جينالعان ورىنداردا ماسكا كيۋدى، قولدى انتيسەپتيكتەرمەن وڭدەۋ مەن الەۋمەتتىك قاشىقتىقتى ساقتاۋدى ۇسىندى.
«سونداي-اق، ءوزىڭىزدى جانە جاقىندارىڭىزدى ىندەتتەن قورعاۋ ماقساتىندا ءاربىر قازاقستاندىق تۇرعىننان COVID-19-عا قارسى ۆاكسيناتسيا مەن ريەۆاكتسيناتسيادان ۋاقىتىلى ءوتۋدى سۇرايمىز. اۋرۋدىڭ الدىن الۋداعى ەڭ ءتيىمدى جول - ۆاكسيناتسيا. الايدا بەلگىلى ۋاقىتتان كەيىن ەكپەنىڭ قورعانىس كۇشى تومەندەپ، انتيدەنەلەر جويىلا باستايدى. ولاردىڭ ينفەكسيامەن كۇرەسۋگە جەتكىلىكتى دەڭگەيى ساقتالۋى ءۇشىن التى ايدان كەيىن ريەۆاكسيناتسيادان ءوتۋ اسا ماڭىزدى»، - دەدى كوميتەت وكىلى.