ماۋسىم ايىندا نۇر-سۇلتاندا كوروناۆيرۋسپەن اۋىرعاندار ەكى ەسە ءوستى
5 شىلدە 17:58

ماۋسىم ايىندا نۇر-سۇلتاندا كوروناۆيرۋسپەن اۋىرعاندار ەكى ەسە ءوستى

نۇر-سۇلتان. قازاقپارات - اعىمداعى جىلدىڭ ماۋسىم ايىنىڭ ءۇشىنشى ون كۇندىگىنەن باستاپ ەلوردادا كوروناۆيرۋستىق ينفەكتسيا جاعدايلارىنىڭ ءوسىمى بايقالادى، دەپ حابارلايدى قازاقپارات قالالىق سانيتاريالىق-ەپيدەميولوگيالىق باقىلاۋ دەپارتامەنتىنە سىلتەمە جاساپ.

ناۋقاستاردىڭ كوبەيۋىنىڭ نەگىزگى سەبەپتەرى - تۇرعىندار اراسىندا بۇرىن اينالىمدا بولعان «وميكرون» شتاممىنىڭ جاندانۋى جانە ۆيرۋستىڭ تارالۋى ءۇشىن وڭتايلى جاعدايدىڭ بولۋى، اتاپ ايتقاندا، حالىقتىڭ يممۋندىق قاباتىنىڭ تومەندەۋى اسەرىنەن، جازعى دەمالىستىڭ باستالۋىنا بايلانىستى تۋريستىك اعىننىڭ ۇلعايۋى.

«ەگەر اۋرۋدىڭ كۇرت تومەندەۋى كەزەڭىندە (ناۋرىز - ماۋسىمنىڭ العاشقى 20 كۇنى) وقشاۋلانعان جاعدايلار تىركەلگەن بولسا، قازىرگى ۋاقىتتا ۆيرۋس جۇقتىرعانداردىڭ سانى 55 كە جەتتى جانە اۋرۋدىڭ تاۋلىكتىك كورسەتكىشى 5-7 ەسە ارتتى (ەڭ جوعارى تاۋلىكتىك تىركەۋ 30- ماۋسىمدا ورىن الدى). تيىسىنشە، ماۋسىم ايىندا سىرقاتتانۋشىلىق دەڭگەيى وتكەن ايدىڭ كورسەتكىشىنەن 3,3 ەسە اسىپ ءتۇستى»، - دەپ جازدى ۆەدومستۆو.

مەكەمەنىڭ مالىمەتىنشە، بيىلعى ماۋسىم ايىندا 269 ناۋقاستان ۆاكتسيناتسيانى تالداۋ كەزىندە 169 ىندا نەمەسە %69 دا COVID-19 عا قارسى يممۋنيتەتتىڭ جوقتىعى انىقتالدى، ياعني بۇل ادامدار ۆاكتسيناتسيا الماعان.

ەكپە قابىلداعان 88 ادامنىڭ 85 ىندە نەمەسە %96 ىندا 2 دوزانى قابىلداعاننان بەرى 6 ايدان استام ۋاقىت ءوتتى جانە ناۋقاستاردىڭ تەك %4,4 ى، ياعني 12 ادام عانا ريەۆاكتسيناتسيا قابىلداعان.

نۇر-سۇلتان قالاسىنىڭ سانيتاريالىق-ەپيدەميالوگيالىق باقىلاۋ دەپارتامەنتى استانالىقتاردى قولدى ۇنەمى تازالاۋ، الەۋمەتتىك قاشىقتىقتى ساقتاۋ، ادامدار كوپ جينالاتىن جەرلەردە بەتپەردە تاعۋ سياقتى ەپيدەمياعا قارسى ءىس-شارالاردى ساقتاۋعا جانە ۆاكتسيناتسيانىڭ، ريەۆاكتسيناتسيانىڭ تولىق كۋرسىنان وتۋگە جانە بۋستەرلىك دوزانى الۋعا شاقىرادى.

«سىرقاتتانعاندار بويىنشا ستاتيستيكاعا نازار اۋدارساق، اۋىرعاندار اراسىندا ۇلكەن ۇلەس ۆاكتسيناتسيالانباعان ازاماتتارعا تيەسىلى. تەك جۇمىلا جانە جاۋاپتى ازاماتتىق ۇستانىممەن ءبىز ۇجىمدىق يممۋنيتەتتى قالىپتاستىرا الامىز، وسىلايشا ينفەكسيانىڭ قوعام اراسىندا ودان ءارى تارالۋىنا جول بەرمەيمىز»، - دەلىنگەن حابارلامادا.


جاڭالىقتار