جەكە كاسىپكەرلەردى مۇمكىندىگى شەكتەۋلى جانداردى جۇمىسقا الۋعا ىنتالاندىرۋ كەرەك – سمايىلوۆ
5 شىلدە 16:41

جەكە كاسىپكەرلەردى مۇمكىندىگى شەكتەۋلى جانداردى جۇمىسقا الۋعا ىنتالاندىرۋ كەرەك – سمايىلوۆ

نۇر-سۇلتان. قازاقپارات - مۇگەدەكتىگى بار ادامداردىڭ تۇرمىس ساپاسىن جاقسارتۋ ماسەلەسى مەملەكەتتىك ورگانداردىڭ ءبىرىنشى باسشىلارىنىڭ ۇدايى باقىلاۋىندا بولۋى كەرەك.

بۇل تۋرالى ق ر پرەمەر-ءمينيسترى ءاليحان سمايىلوۆ ايتتى، دەپ حابارلايدى قازاقپارات ءتىلشىسى.

«ءبىزدىڭ مىندەتىمىز - مۇگەدەكتىگى بار ادامدار ءۇشىن ءومىر سۇرۋگە قولايلى ورتا قالىپتاستىرۋ. ول ءۇشىن مەملەكەت تاراپىنان ۇنەمى قولداۋ كورسەتىلىپ كەلەدى. ءتيىستى زاڭنامالىق تۇزەتۋلەر قابىلدانىپ، مۇگەدەكتىگى بار ادامدار مەن ولاردىڭ وتباسىلارىنىڭ تابىسىن ارتتىرۋ، ءومىر ساپاسىن جاقسارتۋ باعىتىندا اۋقىمدى جۇمىس اتقارىلدى. ەندى جەكە كاسىپكەرلىك سۋبەكتىلەرىن مۇمكىندىگى شەكتەۋلى ازاماتتاردى جۇمىسقا الۋى ءۇشىن ىنتالاندىرامىز»، - دەدى ءا. سمايىلوۆ ۇكىمەتتىڭ بۇگىنگى وتىرىسىندا.

پرەمەر-مينيستر مەملەكەت باسشىسىنىڭ مۇگەدەكتىكتى بەلگىلەۋ ءراسىمىن جەڭىلدەتۋدى تاپسىرعانىن ەسكە سالدى.

«جىل باسىنان بەرى مۇگەدەكتىكتى سىرتتاي بەلگىلەۋ پيلوتتىق جوباسى بۇكىل رەسپۋبليكا بويىنشا كەڭەيتىلدى. الەۋمەتتىك قىزمەتتەر پورتالى ارقىلى تەحنيكالىق قۇرالدار مەن ەمدىك-ساۋىقتىرۋ قىزمەتتەرىن الۋ مەرزىمى 8 ايدان 30 كۇنگە دەيىن قىسقاردى. بيىل جىل سوڭىنا دەيىن 17 ەرتە وڭالتۋ-ارالاسۋ ورتالىعى اشىلادى. ولار جاڭا تۋعان نارەستەلەردەگى پاتولوگيانى دەر كەزىندە انىقتاۋعا جانە ەمدەۋدى قامتاماسىز ەتۋگە مۇمكىندىك بەرەدى. وڭىرلەردە مۇگەدەكتىگى بار ادامدارعا ارنالعان 12 ساۋىقتىرۋ ورتالىعى سالىنۋدا. بۇل الەۋمەتتىك قورعاۋ جۇيەسىندە قوسىمشا 25 مىڭ ادامدى ەمدىك-ساۋىقتىرۋ شارالارىمەن قامتۋعا مۇمكىندىك بەرەدى»، - دەدى ءاليحان سمايىلوۆ.

سونىمەن بىرگە، ۇكىمەت باسشىسى مەملەكەتتىك ورگاندارعا مۇمكىندىگى شەكتەۋلى ادامداردى قولداۋدىڭ كەشەندى شارالارىن جالعاستىرۋى قاجەتتىگىن ايتتى.

«ەڭبەك مينيسترلىگى دەنساۋلىق ساقتاۋ جانە سيفرلىق دامۋ مينيسترلىكتەرىمەن بىرگە سىرتتاي كۋالاندىرۋدى ەنگىزۋ ءۇشىن اقپاراتتىق جۇيەلەردى ينتەگراتسيالاۋ مەن الەۋمەتتىك قىزمەتتەر پورتالىن جەتىلدىرۋ جۇمىستارىن جالعاستىرسىن. ءوڭىر اكىمدىكتەرى جىل سوڭىنا دەيىن مۇقتاج ادامداردى تەحنيكالىق قۇرالدارمەن جانە ساۋىقتىرۋ قىزمەتتەرىمەن قامتۋ كورسەتكىشىن %90 كە جانە 2023-جىلدىڭ سوڭىنا قاراي %100 جەتكىزسىن. مۇگەدەكتىگى بار ادامداردى كۇندىز قابىلدايتىن بولىمشەلەر جەلىسىن كەڭەيتىپ، الەۋمەتتىك قىزمەت كورسەتەتىن شاعىن ۇيلەر قۇرۋ قاجەت»، - دەدى ول.

دەنساۋلىق ساقتاۋ مينيسترلىگى اكىمدىكتەرمەن بىرگە ناۋقاستاردى ەرتەرەك دياگنوستيكالاۋعا جانە مۇگەدەكتىكتىڭ الدىن الۋ ءۇشىن ەرتە وڭالتۋعا ەرەكشە نازار اۋداۋى كەرەك.

«جالپى يندۋستريا، ساۋدا، دەنساۋلىق ساقتاۋ، ەڭبەك مينيسترلىكتەرى اكىمدىكتەرمەن بىرلەسىپ، مۇگەدەكتىگى بار ادامدار ءۇشىن بەيىمدەۋ جانە قولجەتىمدى ورتا قالىپتاستىرۋدىڭ ۇلتتىق ءبىرىڭعاي ستاندارتىن ازىرلەۋى كەرەك دەپ سانايمىن. مۇگەدەكتىگى بار ادامداردىڭ تۇرمىس ساپاسىن جاقسارتۋ ماسەلەلەرى ورتالىق جانە جەرگىلىكتى مەملەكەتتىك ورگانداردىڭ ءبىرىنشى باسشىلارىنىڭ ۇدايى باقىلاۋىندا بولۋى ءتيىس»، - دەدى ءاليحان سمايىلوۆ.

جاڭالىقتار