الداعى وقۋ جىلىنا مۇعالىمدەردى قابىلداۋ جاڭا تارتىپپەن جۇرگىزىلەدى
5 شىلدە 15:20

الداعى وقۋ جىلىنا مۇعالىمدەردى قابىلداۋ جاڭا تارتىپپەن جۇرگىزىلەدى

نۇر-سۇلتان. قازاقپارات - مۇعالىمدەردى جۇمىسقا قابىلداۋ جاڭا تارتىپپەن جۇرگىزىلەدى.

بۇل تۋرالى ق ر وقۋ-اعارتۋ ءبىرىنشى ۆيتسە-ءمينيسترى شولپان كارينوۆا ايتتى، دەپ حابارلايدى قازاقپارات ءتىلشىسى.

«وتكەن جىلى 19- قاراشادا ءبىلىم جانە ەڭبەك مينيسترلىكتەرىنىڭ بىرلەسكەن بۇيرىعى قابىلداندى. بيىلعى وقۋ جىلىنا مۇعالىمدەردى قابىلداۋ وسى جاڭارتىلعان بۇيرىقتىڭ نەگىزىندە جۇزەگە اسىرىلادى. پەداگوگتاردى جۇمىسقا قابىلداۋدىڭ نەگىزگى ماقساتى - وسى پەداگوگتاردى جۇمىسقا قابىلداۋ كەزىندە اشىقتىق پەن ادىلدىكتى قامتاماسىز ەتۋ، وقۋ جۇكتەمەسىن ءبولۋ بارىسىندا زاڭسىزدىقتاردى بولدىرماۋ جانە پەداگوگيكالىق بەكىتىلگەن جۇكتەمەن قامتاماسىز ەتۋ»، - دەدى ول مينيسترلىكتىڭ اپپارات جينالىسىندا.

ونىڭ اتاپ وتۋىنشە، بوس جۇمىس ورنى شىققان كەزدە ءاربىر جۇمىس بەرۋشى، ياعني، مەكتەپ ديرەكتورى جۇمىس ورنىنىڭ بوساعانىن بەس كۇننىڭ ىشىندە ەڭبەك جاعدايلارى مەن جالاقىسىن كورسەتە وتىرىپ، حالىقتى جۇمىسپەن قامتۋ ورنىنا اقپارات بەرۋى ءتيىس.

مالىمەتتەر جازباشا نەمەسە ەلەكتروندى ەڭبەك بيرجاسى مەملەكەتتىك اقپاراتتىق پورتالىندا بەرىلەدى.

«بۇل رەتتە حالىقتى جۇمىسپەن قامتۋ تۋرالى زاڭنامانى بۇزعانى ءۇشىن جاۋاپكەرشىلىكتىڭ قاراستىرىلعانىن ەستەرىڭىزگە سالعىم كەلەدى. سوندىقتان بوساعان بارلىق ورىنعا قاتىستى اقپاراتتى مەكتەپ، باسقا ءبىلىم مەكەمەلەرىنىڭ باسشىلارى ۋاقىتىلى ۇسىنۋى ءتيىس»، - دەدى شولپان كارينوۆا.

جاڭالىقتار