توعجانوۆ ايەلدەردىڭ زەينەت جاسىن تومەندەتۋ تۋرالى: حالىقارالىق تاجىريبەنى ەلگە ءتۇسىندىرىپ جاتىرمىز
5 شىلدە 14:01

توعجانوۆ ايەلدەردىڭ زەينەت جاسىن تومەندەتۋ تۋرالى: حالىقارالىق تاجىريبەنى ەلگە ءتۇسىندىرىپ جاتىرمىز

نۇر- سۇلتان. قازاقپارات – ق ر پرەمەر- ءمينيسترىنىڭ ورىنباسارى ەرالى توعجانوۆ ايەلدەردىڭ زەينەت جاسىن تومەندەتۋگە قاتىستى پىكىر ءبىلدىردى، دەپ حابارلايدى قازاقپارات ءتىلشىسى.

ۇكىمەت وتىرىسىنان كەيىن جۋرناليستەردىڭ ساۋالىنا جاۋاپ بەرگەن ۆيتسە- پرەمەر ەرالى توعجانوۆ ايەلدەردىڭ زەينەت جاسىن نەشەگە دەيىن تومەندەتۋدى ۇسىنىپ جۇرگەنىن ايتتى.

«ايەلدەردىڭ زەينەت جاسىن 58-گە دەيىن ءتۇسىرۋدى ۇسىنۋشىلار، ونىڭ ىشىندە 55- ءتى ايتىپ جاتقاندار دا بار. مەنىڭ جەكە پىكىرىم، دۇنيەجۇزىلىك تاجىريبەنى الاتىن بولساق، مۇنىڭ ءبارى زەينەت جاسىن وسىرۋگە باعىتتالعان. سوندىقتان حالىقارالىق ناقتى تاجىريبەلەردىڭ ءبارىن ەسكەرەمىز. بۇل - ءبىر. ەكىنشىدەن، ناقتى ازاماتتاردىڭ بولاشاقتا قارجىسىن، زەينەتاقىسىن قامتاماسىز ەتۋ ءۇشىن وعان، ءسوز جوق، الدىمەن ەڭبەك ءوتىلى كەرەك. ياعني، ەرتەڭ الاتىن زەينەتاقىڭىزدىڭ مولشەرى سول ەڭبەك وتىلىنە بايلانىستى بولادى. سونىڭ ءبارىن جانە ازاماتتاردىڭ الەۋمەتتىك جاعدايىن جاقسارتاتىن ماسەلەلەردى ەسكەرۋىمىز قاجەت. وسى باعىتتا ازاماتتارعا تۇسىندىرمە جۇمىستارىن جۇرگىزەمىز»، - دەدى ەرالى توعجانوۆ.

ۆيتسە- پرەمەر بۇل ماسەلەنى تالقىلاۋ ءۇشىن ءتۇرلى توپتارمەن كەزدەسۋلەر ۇيىمداستىرىلىپ جاتقانىن اتادى. «ەشكىم زەينەت جاسىن تومەندەتۋگە بارعالى وتىرعان جوق. ءبىز تالقىلاپ جاتىرمىز. سونىڭ اياسىندا ءتۇرلى توپتارمەن كەزدەسىپ جاتىرمىز. سونىڭ ىشىندە وسىنداي باستاما كوتەرىپ جۇرگەن توپتارمەن دە كەزدەسىپ جاتىرمىز. ونى سىزدەر جاقسى بىلەسىزدەر»، - دەگەن ۆيتسە- پرەمەر ناقتى شەشىم الەۋمەتتىك كودەكس اياسىندا بيىل كۇزدە شىعاتىنىن ەسكە سالدى.

اۆتور: ەسىمجان ناقتىباي

جاڭالىقتار