قاسىم- جومارت توقايەۆ قورعانىس مينيسترىنە ءبىرقاتار تاپسىرما بەردى
5 شىلدە 13:02

قاسىم- جومارت توقايەۆ قورعانىس مينيسترىنە ءبىرقاتار تاپسىرما بەردى

نۇر- سۇلتان. قازاقپارات - پرەزيدەنت قاسىم- جومارت توقايەۆ قورعانىس ءمينيسترى رۋسلان جاقسىلىقوۆتى قابىلدادى، دەپ حابارلايدى اقوردا.

مەملەكەت باسشىسى - قازاقستان قارۋلى كۇشتەرىنىڭ جوعارعى باس قولباسشىسىنا قورعانىس مينيسترلىگىنىڭ بيىلعى ءبىرىنشى جارتىجىلدىقتا اتقارعان جۇمىستارىنىڭ قورىتىندىسى جونىندە ەسەپ بەرىلدى.

رۋسلان جاقسىلىقوۆ قاسىم- جومارت توقايەۆقا ارميا بولىمشەلەرىنىڭ جاۋىنگەرلىك ازىرلىگى جونىندە باياندادى. قازىرگى ۋاقىتتا نەگىزگى كۇش- جىگەر باسقارۋ ورگاندارى مەن جەكە قۇرامدى داعدارىس جاعدايى كەزىندە ءتيىمدى ارەكەت ەتۋگە، ورتالىق جانە جەرگىلىكتى بيلىك ورگاندارىمەن اراداعى ءىس- قيمىلداردى ۇيلەستىرۋگە وقىتۋ ماسەلەسىنە باعىتتالعان. پرەزيدەنتكە جاۋىنگەرلىك دايىندىقتى قامتاماسىز ەتۋ جونىندەگى، سونىڭ ىشىندە ءبىرقاتار اۋقىمدى وقۋ- جاتتىعۋ جيىنىنا قاتىستى ەكىنشى جارتىجىلدىققا جوسپارلانعان شارالار تۋرالى مالىمەت بەرىلدى.

سونىمەن قاتار ەلىمىزدىڭ ساربازدارى حالىقارالىق اسكەري ويىندارعا قاتىسادى. قورعانىس ءمينيسترى ارناۋلى وپەراتسيالارعا قاتىساتىن كۇشتەردى دامىتۋ، وق- دارىلەردىڭ قاۋىپسىز ساقتالۋىن قامتاماسىز ەتۋ، وتاندىق قورعانىس- ونەركاسىپ كەشەنىنىڭ الەۋەتىن پايدالانا وتىرىپ، ارميانى زاماناۋي قارۋ- جاراقپەن جانە اسكەري تەحنيكا تۇرلەرىمەن جابدىقتاۋ، اسكەري ينفراقۇرىلىمدى جەتىلدىرۋ جونىندەگى پرەزيدەنت تاپسىرمالارىنىڭ ورىندالۋ بارىسى تۋرالى ەسەپ بەردى. سونداي- اق كەزدەسۋدە ساربازداردىڭ قاۋىپسىزدىگىن قامتاماسىز ەتۋگە جانە اسكەري قىزمەتشىلەر اراسىندا الىمجەتتىك ارەكەتتەردى بولدىرماۋ ماسەلەسىنە ەرەكشە نازار اۋدارىلدى.

كەزدەسۋ سوڭىندا پرەزيدەنت قارۋلى كۇشتەردى كەشەندى ءارى جۇيەلى تۇردە جەتىلدىرۋدى قامتاماسىز ەتۋ جانە ولاردىڭ جاۋىنگەرلىك دايىندىعىن جوعارى دەڭگەيدە ۇستاپ تۇرۋ قاجەتتىگىن اتاپ ءوتتى. مەملەكەت باسشىسى ەلىمىزدىڭ قورعانىس قابىلەتىن ودان ارى ارتتىرۋعا باعىتتالعان ءبىرقاتار تاپسىرما بەردى.

جاڭالىقتار