قازاقستانعا «جىبەك جولى» كەمەسىنە بايلانىستى سانكسيا سالىنبايدى – وسكەنبايەۆ
5 شىلدە 12:55

قازاقستانعا «جىبەك جولى» كەمەسىنە بايلانىستى سانكسيا سالىنبايدى – وسكەنبايەۆ

نۇر- سۇلتان. قازاقپارات – ق ر يندۋستريا جانە ينفراقۇرىلىمدىق دامۋ ءمينيسترى قايىربەك وسكەنبايەۆ ۋكراينا تارابىنىڭ شاعىمىن تۋدىرعان «جىبەك جولى» كەمەسىنىڭ ارەكەتىنەن قازاقستانعا سانكسيا سالىنبايدى دەدى، دەپ حابارلايدى قازاقپارات ءتىلشىسى.

«ول كەمە رەسەي كومپانيالارىنا جالعا بەرىلگەن. جالعا العان رەسەي كومپانياسىنا ەشقانداي سانكسيا سالىنعان جوق. ولارعا ەشقانداي شەكتەۋ جوق. سول سەبەپتى ءبىزدىڭ كاسىپكەرلەر، ياعني ق ت ج- عا قاراستى KTZ Express Shipping كومپانياسى ونى جالعا بەردى. ولار نە تاسىعانىن وزدەرىڭىز دە كورىپ وتىرسىزدار عوي. ول بىزگە دە جاڭالىق بولىپ تۇر. زاڭدى تۇردە تاسيتىن تاۋار بولسا، ەشقانداي شەكتەۋ جوق. ال ءبىراق شارت بويىنشا ءبىر ەلدىڭ زاڭىن بۇزاتىنداي جاعداي بولسا، وندا ءبىزدىڭ كاسىپكەرلەر ماسەلە كوتەرىپ، ول كەمەنى كەرى قايتارۋعا قۇقىعى بار»، - دەدى مينيستر.

ب ا ق وكىلدەرى «اتالعان كەمەنىڭ ارەكەتىنەن قازاقستانعا سانكسيا سالىنۋى مۇمكىن بە» دەپ سۇرادى.

«بۇل جاعداي سانكسيا سياقتى سالدارعا اپارىپ سوقپايدى. ءبىز جالعا بەرگەندە ول كاسىپكەر سانكسيادا بولسا، باسقا دا شەكتەۋلەرگە الىنسا، بىزگە ءۋاج ايتۋعا قۇقىعى بار بولاتىن ەدى. ءبىراق ول كومپانياعا ەشقانداي شەكتەۋ قويىلعان جوق. سول سەبەپتى زاڭدى تۇردە شاعىم بەردى. ءبىراق ول جاقتان زاڭبۇزۋشىلىق بولسا، تۇركيا نەمەسە ۋكراينا بىزگە رەسمي تۇردە بايانداما بەرسە، وندا ءبىز دە زەرتتەپ، ءتيىستى شارا قابىلداپ، ءوز شەشىمىزدى بەلگىلەيمىز»، - دەدى مينيستر.

قازاقستان «جىبەك جولى» كەمەسىن جالعا العان رەسەيلىك كومپانيامەن كەلىسىمشارتتى بۇزۋى مۇمكىن. بۇعان دەيىن بەلگىلى بولعانداي تۇركياداعى ۋكراينا ەلشىسى ۆاسيلي بودنار قازاقستاندىق «جىبەك جولى» كەمەسىمەن تاسىمالدانعان استىق جونىندە جەرگىلىكتى بيلىككە جۇگىنگەنى حابارلانعان بولاتىن.

«قازاقستان تەمىر جولى» ۇلتتىق كومپانياسى قازاقستاندىق «جىبەك جولى» كەمەسىمەن ۋكراينادان استىق ەكسپورتتالىپ جاتقانىنا قاتىستى پىكىر ءبىلدىردى. سونىمەن بىرگە ق ت ج كەمەنى جالعا الۋشىدان ءمان- جايدى جەدەل ءارى ەگجەي- تەگجەيلى ءتۇسىندىرۋدى سۇرادى.

جاڭالىقتار