استانا كۇنىنە وراي وتشاشۋ بولمايدى – اكىمدىك
5 شىلدە 12:03

استانا كۇنىنە وراي وتشاشۋ بولمايدى – اكىمدىك

نۇر- سۇلتان. قازاقپارات - بيىل نۇر- سۇلتاندا استانا كۇنىنە وراي وتشاشۋ بولمايدى. بۇل تۋرالى قازاقپارات اكىمدىككە سىلتەمە جاساپ حابارلايدى. ءبىراق قالانىڭ 24 جىلدىعىنا وراي كونسەرتتەردەن باستاپ سپورتتىق فەستيۆالدەرگە دەيىن ونداعان ءتۇرلى ءىس - شارالار وتكىزىلەدى.

استانا كۇنىندە قالادا ءبىرقاتار الەۋمەتتىك نىسانداردىڭ (كەزەكتە تۇرعاندارعا پاتەر كىلتتەرىن تاپسىرۋ)، زاۋىتتىڭ، سكۆەرلەردىڭ، قوعامدىق كەڭىستىكتەردىڭ، 80-نەن استام اۋلا اۋماقتارىنىڭ جانە ت. ب. اشىلۋى وتەدى. سونىمەن قاتار وسى كۇنگە وراي قالانىڭ ءبىرقاتار ۆەدومستۆولىق باعىنىستى ۇيىمدارى كونسەرتتەر، سپورتتىق تۋرنيرلەر، كورمەلەر جانە ت. ب. ۇيىمداستىرادى. 1-6 -شىلدە ارالىعىندا «اتامەكەن» ەتنو- مەموريالدىق كەشەنىندە «ەلوردا پەيزاجدارى» اتتى ارت- كورمە جۇمىس ىستەيدى.

بىرىككەن مۋزەيلەر ديرەكسياسى مەرەكەگە وراي بىردەن بىرنەشە ەكسپوزيتسيا ۇيىمداستىرادى:

1-8 -شىلدە ارالىعىندا - «ەل تىرەگى - ەلوردا» كورمەسى، 1-5 شىلدە ارالىعىندا - «كيەلى مەنىڭ ەلوردام» فوتوكورمەسى. 5- شىلدە كۇنى «الەم كارتاسىنداعى جاڭا ەلوردا» اشىق ەسىك كۇنى وتەدى. 4-6 -شىلدە ارالىعىندا ورتالىق ساياباقتا «Mereke Street» قالالىق مادەنيەت فەستيۆالى وتەدى.

5- شىلدە كۇنى ساعات 19:00-دە فيلارمونيانىڭ كونسەرت زالىندا «ءازىل الەمى» ءازىل كەشى ۇيىمداستىرىلادى. وسى ۋاقىتتا «استانا وپەرا» وپەرا جانە بالەت تەاترى «شوپەنيانا» جانە «شەحرەزادا» كۇمىس ءداۋىرىنىڭ بالەتتەرىن ۇسىنادى. 5-9- شىلدە ارالىعىندا «استانا بالەت» تەاترى «ورفەي جانە ەۆريديكا» بالەتىنىڭ پرەمەراسىنا شاقىرادى. استانا كۇنى، 6 -شىلدەدە ساعات 11:00-دە «قازانات» يپپودرومىندا شاباندوزدار «ەلوردا كۋبوگى» ءۇشىن بايگە تۇرلەرىنەن باق سىنايدى. كەشكە، ساعات 21:00 - دە امفيتەاتر ساحناسىندا ۇلىقپان جولداسوۆ «اق قانات- اق قۇسىم» باعدارلاماسىمەن ونەر كورسەتەدى.

ساعات 18:00-دەن 22:00-گە دەيىن «استانا- ارەنا» ستاديونىنىڭ تۇراعىندا ءداستۇرلى Open air «حالىقپەن بىرگە» وتەدى. سول كۇنى كەشكە «قازاقستان» و ك ز «دوس- مۇقاسان» ءانسامبلىنىڭ شىعارماشىلىعىنا ارنالعان «دالام مەنىڭ» كونسەرتى ۇيىمداستىرىلادى. 8- شىلدەدە امفيتەاتردا «مەن سەنى سۇيەمىن، مەنىڭ استانام» اتتى كونسەرتتىك قويىلىم وتەدى. «بارىس ارەنا» مۇز سارايىنىڭ جانىندا 12 ساعاتتىق Open air «You Fest» شاراسىن وتكىزۋ 20- شىلدەگە اۋىستىرىلدى.

ايتا كەتەيىك، استانا كۇنىنە ارنالعان ءىس- شارالار ماۋسىم ايىندا باستالدى. ماسەلەن، ەرمۇرات ۇسەنوۆتىڭ 70 جىلدىعىنا ارنالعان «ءومىر داستان» كونسەرتى، ەرلەر مەن ايەلدەر اراسىنداعى بوكستان «ەلوردا كۋبوگى» حالىقارالىق تۋرنيرى، كورمەلەر، سونداي- اق ۇلتتىق دومبىرا كۇنىن مەرەكەلەۋ ۇيىمداستىرىلدى.

جاڭالىقتار