قازاق ءتىلى امەريكالىقتارعا نە ءۇشىن قاجەت؟
4 شىلدە 20:58

قازاق ءتىلى امەريكالىقتارعا نە ءۇشىن قاجەت؟

نۇر-سۇلتان. قازاقپارات - بۇگىنگى تاڭدا الەمدەگى كەز كەلگەن ج و و- دا اعىلشىن ءتىلى نەگىزگى ماماندىق رەتىندە دە، ماماندىقتى يگەرۋ ءتىلى رەتىندە دە وقىتىلادى.

ال اعىلشىن ءتىلى ءوز انا ءتىلى بولعان ەل ازاماتتارى قاي تىلدەردى يگەرەدى؟ ا ق ش، مەكسيكا جانە كانادامەن ىرگەلەس جاتقاندىقتان، يسپان جانە فرانسۋز تىلدەرىن شەت ءتىلى رەتىندە وقيدى.

ودان بولەك، الەمنىڭ وزگە دە حالىقارالىق دەڭگەيدەگى تىلدەرى يگەرىلىپ جاتىر. ال ا ق ش- تىڭ كەيبىر ۋنيۆەرسيتەتتەرى قازاق ءتىلىن دە وقىتادى ەكەن. سونىمەن امەريكالىق ستۋدەنتتەر قازاق ءتىلىن نەلىكتەن مەڭگەرىپ جۇرگەنىن انىقتاپ كورەلىك.

ا ق ش- تىڭ ينديانا ۋنيۆەرسيتەتى (ينديانا شتاتى) قازاق ءتىلىن باكالاۆر دەڭگەيىندە ۇيرەنگىسى كەلەتىن امەريكالىقتارعا ارنايى وقۋ باعدارلاماسىن ۇسىنادى. ال ۋنيۆەرسيتەتتىڭ رەسمي سايتىندا باعدارلامانى ۇگىتتەۋ ءۇشىن مىناداي تۇسىندىرمە جاسالىپتى:

«قازاقستاننىڭ ا ق ش ءۇشىن قانداي ماڭىزى بار؟

قازاقستان - مۇناي مەن تابيعي گازعا باي ەل. امەريكالىقتار بىلمەۋى دە مۇمكىن، قازاقستان تەرريتورياسى بويىنشا الەمدەگى توعىزىنشى ورىندا تۇر. ا ق ش- تىڭ مۇنايلى شتاتى تەحاستان 4 ەسە ۇلكەن. دەمەك مۇناي دا سايكەسىنشە سول شامادا كوپ. سونىمەن قاتار، اتالعان ەل رەسەي مەن قىتايدىڭ اراسىندا ورىن تەپكەن. بۇل - گەوساياسي جاعدايدى باقىلاۋدا ءتيىمدى ايماق.

قازاقتار كىمدەر جانە قازاقستان تۋرالى نە بىلەسىز؟

ەگەر ءسىز «بورات» فيلمىن كورگەن بولساڭىز، ونى ۇمىتىڭىز. ونىڭ قازاقتار مەن قازاقستانعا ەش قاتىسى جوق. دەگەنمەن «موڭعول» فيلمى قازاقتاردىڭ وتكەندەگى كوشپەندى ءومىرىن سۋرەتتەيدى. تاۋەلسىز مەملەكەتتىڭ ورتالىعى استانا قالاسىنا اۋىسقان. ەل جىلدام دامىپ كەلەدى.

قازاق ءتىلىن نە ءۇشىن وقيمىز؟

قازاقستان 1991-جىلى ءوز تاۋەلسىزدىگىن العاننان كەيىن قازاق ءتىلىنىڭ ستاتۋسىن مەملەكەتتىك دەڭگەيگە كوتەردى. قازاق ءتىلىن مەڭگەرۋ ارقىلى تاريحى مەن مادەنيەتى باي ۇلتپەن تانىساسىز. قازاقتار قازاق ءتىلىن بىلەتىن شەتەلدىكتەردى وتە قۇرمەتتەيدى!

قازاق ءتىلىن مەڭگەرگەن امەريكالىقتار ورتالىق ينتەلليگەنتسيا اگەنتتىگى (CIA) نەمەسە فەدەرالدى تەرگەۋ بيۋروسى (FBI) سىندى مەملەكەتتىك ورگانداردا جۇمىس ىستەي الادى».

ودان بولەك ا ق ش- تىڭ ديۋك، ستەنفورد، ۆيسكونسين-مەديسون، بوستون، گارۆارد، ميچيگان، اريزونا سىندى ۋنيۆەرسيتەتتەرىنىڭ شىعىستانۋ فاكۋلتەتى مەن ءتىل وقىتۋ كۋرستارىندا قازاق ءتىلى وقىتىلادى.

massaget.kz

جاڭالىقتار