قازاقستاندىق تەننيسشى العاش رەت ۋيمبلدون تۋرنيرىنىڭ شيرەك فينالىنا شىقتى
ۇلى بريتانيا اشىق چەمپيوناتىنىڭ 17-راكەتكاسى بولىپ تىركەلگەن ە. رىباكينا ءتورتىنشى اينالىمدا دۇنيەجۇزىلىك رەيتينگتە 80-ورىندا تۇرعان حورۆاتيالىق پەترا مارتيچپەن شەبەرلىك بايقاستى.
ءبىرىنشى پارتيا بارىسىندا پ. مارتيچ العا كەتكەنىمەن، ەلەنا ەسەسىن جىبەرمەدى.
ەسەپ 5:5 بولعان مەزەتتە ءوز گەيمىن الىپ، سەتتى برەيكپەن ءتامامدادى - 7:5.
ەكىنشى پارتيادا ە. رىباكينا سول قارقىنىن باسەڭدەتكەن جوق - 6:3.
1 ساعات 22 مينۋتقا سوزىلعان باسەكە بارىسىندا قازاقستاندىق سپورتشى 6 ەيس جاساپ، 7 برەيك- پوينتتىڭ 4-ەۋىن پايدالانا ءبىلدى.
ە. رىباكينا جارتىلاي فينالعا شىعۋ ءۇشىن الەمنىڭ 37-راكەتكاسى، فرانسيالىق اليزە كورنە نەمەسە رەيتينگتە 44-ساتىدا تۇرعان اۋستراليالىق ايلا تومليانوۆيچتىڭ بىرەۋىمەن تالاسادى.
ا. كورنە مۇنىڭ الدىندا وسىعان دەيىن 37 ماتچ بويى جەڭىلمەگەن الەمنىڭ 1-راكەتكاسى، پولشا وكىلى يگا سۆەنتەكتى ۇتىپ كەتكەن بولاتىن - 6:4، 6:2.
ەسكە سالا كەتەيىك، بۇدان بۇرىن ەلوردادا پرەزيدەنت كۋبوگى ءۇشىن تەننيستەن حالىقارالىق تۋرنيرلەر وتەتىنىن جازعان بولاتىنبىز. سونداي-اق قازاقستاندىق جاس تەننيسشىلەر حالىقارالىق تۋرنيرلەردە جاقسى ناتيجە كورسەتتى.