قاسىم- جومارت توقايەۆ ەۋروپا وداعىنىڭ پرەزيدەنتىن قازاقستانعا شاقىردى
4 شىلدە 16:16

قاسىم- جومارت توقايەۆ ەۋروپا وداعىنىڭ پرەزيدەنتىن قازاقستانعا شاقىردى

نۇر- سۇلتان. قازاقپارات - مەملەكەت باسشىسى قاسىم- جومارت توقايەۆ ەۋروپا وداعىنىڭ پرەزيدەنتى شارل ميشەلمەن تەلەفون ارقىلى سويلەستى، دەپ حابارلايدى قازاقپارات اقوردانىڭ رەسمي سايتىنا سىلتەمە جاساپ.

قازاقستان پرەزيدەنتى بىلتىر قاراشا ايىندا وتكەن بريۋسسەلدەگى جەكە كەزدەسۋدىڭ جانە قول جەتكىزىلگەن ۋاعدالاستىقتاردى جۇزەگە اسىرۋدىڭ ماڭىزدى ەكەنىن ايتتى.

مەملەكەت باسشىسى قازاقستاننىڭ ەۋروپا وداعىمەن كەڭەيتىلگەن سەرىكتەستىك جانە ىنتىماقتاستىق جونىندە كەلىسىمگە قول قويعان ءبىرىنشى ەل ەكەنىن اتاپ ءوتتى. بۇل قارىم- قاتىناستارىمىزدى جاڭا دەڭگەيگە كوتەردى. قاسىم- جومارت توقايەۆ قازاقستاننىڭ ەڭ ءىرى ساۋدا سەرىكتەسى سانالاتىن ەۋروپا وداعىمەن ورنىقتى بايلانىستى دامىتۋعا بەيىلدى ەكەنىنە نازار اۋداردى. اڭگىمە بارىسىندا وڭىرلىك جانە جاھاندىق كۇن تارتىبىندەگى ماسەلەلەر جان- جاقتى تالقىلاندى. ولار ازىق- تۇلىك داعدارىسىنىڭ كۇردەلەنە تۇسكەنىنە الاڭداۋشىلىق ءبىلدىردى. قاسىم- جومارت توقايەۆ حالىقارالىق احۋالدى جاقسارتۋ، ەڭ وزەكتى دەگەن ماسەلەلەر بويىنشا سەنىمدى ديالوگ ورناتۋ ءۇشىن كۇش بىرىكتىرۋدىڭ ماڭىزدى ەكەنىنە توقتالدى.

«قازاقستان شىعىس پەن باتىس، وڭتۇستىك پەن سولتۇستىك اراسىندا «ارالىق نارىق» ءرولىن اتقارا وتىرىپ، بۇل ىسكە ءوز ۇلەسىن قوسا الار ەدى، - دەدى مەملەكەت باسشىسى. بۇدان بولەك قاسىم- جومارت توقايەۆ ەۋروپا وداعىن بالاما ترانسقۇرلىقتىق دالىزدەردى، سونىڭ ىشىندە ترانسكاسپي حالىقارالىق كولىك باعىتىن دامىتۋ ىسىندە ىنتىماقتاستىق ورناتۋعا شاقىردى. پرەزيدەنت الەمدەگى ەنەرگەتيكالىق قاۋىپسىزدىككە تونەتىن قاتەرگە الاڭدايتىنىن جەتكىزدى. ونىڭ ايتۋىنشا، قازاقستان الەم جانە ەۋروپا نارىعىنداعى احۋالدى تۇراقتاندىرۋ ءۇشىن ءوزىنىڭ كومىرسۋتەگى الەۋەتىن پايدالانۋعا دايىن ەكەنىن مالىمدەدى. مەملەكەت باسشىسى قازاقستاننىڭ اۋعانستانداعى تۇراقتىلىققا جانە وسى ەلگە كومەك بەرۋگە قاتىستى حالىقارالىق قوعامداستىقتىڭ كۇش- جىگەرىن قولدايتىنىن ناقتىلادى. اڭگىمە سوڭىندا پرەزيدەنت قاسىم- جومارت توقايەۆ شارل ميشەلدى قازاقستانعا ساپارمەن كەلۋگە شاقىردى.

جاڭالىقتار