ماعزۇم مىرزاعاليەۆ پرەزيدەنتكە جاڭاوزەندەگى احۋالعا قاتىستى باياندادى
4 شىلدە 16:03

ماعزۇم مىرزاعاليەۆ پرەزيدەنتكە جاڭاوزەندەگى احۋالعا قاتىستى باياندادى

نۇر- سۇلتان. قازاقپارات - «قازمۇنايگاز» ۇ ك ا ق باسقارما ءتوراعاسى ماعزۇم مىرزاعاليەۆ پرەزيدەنت قاسىم- جومارت توقايەۆقا جاڭاوزەندەگى احۋالعا قاتىستى باياندادى، دەپ حابارلايدى قازاقپارات ءتىلشىسى.

«مەن قازىر مەملەكەت باسشىسىنا جاڭاوزەندەگى احۋالعا قاتىستى دا باياندادىم. ءبىز ەكى اپتا بۇرىن اقتاۋ قالاسىندا «قازمۇنايگازدىڭ» وكىلدىگىن ارنايى اشقان ەدىك. بۇل كەڭسەنىڭ نەگىزى باعىتى مەن ماقساتى - حالىقپەن جۇمىس ىستەۋ، حالىقتىڭ، سونىمەن قاتار كاسىپورىنداردىڭ ساۋالدارىن قاراستىرۋ، وندىرىستىك كورسەتكىشتەردى كۇشەيتۋ. وكىنىشكە وراي، جىل باسىنان بەرى وزەن كەن ورنىنداعى مۇناي ءوندىرۋ كولەمى جوسپارلى كورسەتكىشتەردەن كەم بولىپ وتىر. ياعني، ءبىزدىڭ كۇن سايىن ءوندىرۋ كولەمىمىز 1000-1200 تونناعا تومەن. سوندىقتان وسى باعىتتا جۇمىستى كۇشەيتە باستادىق»، - دەدى ماعزۇم مىرزاعاليەۆ پرەزيدەنت قابىلداۋىنان كەيىن.

سونىمەن قاتار ول مەملەكەت باسشىسىنا مۇناي- گاز حيمياسى كەشەنىن دامىتۋ جايىندا جەتكىزگەنىن ايتتى.

«تامىزدىڭ 20 سىنا قاراي اتىراۋ قالاسىنداعى ءىرى پوليپروپيلەن شىعاراتىن زاۋىت اشىلادى. قازىرگى ۋاقىتتا سوڭعى جۇمىستارى جۇرگىزىلۋدە. بۇل زاۋىت اشىلعاننان كەيىن 500 دەن استام جاڭا جۇمىس ورنى قۇرىلادى. بۇل وسى وڭىردەگى ەڭ ءىرى زاۋىتتاردىڭ ءبىرى سانالادى. ونىڭ وندىرىستىك قۋاتى جىلىنا 500 توننا پروپيلەندى قۇرايدى»، - دەدى ول.

ماعزۇم مىرزاعاليەۆتىڭ اتاپ وتۋىنشە، «قازمۇنايگاز» قازىرگى ۋاقىتتا ەكى جوبامەن اينالىسىپ جاتىر.

«ءبىرىنشىسى - پوليەتيلەن شىعاراتىن زاۋىت. بۇل زاۋىتتىڭ جىلدىق قۋاتى 1 ملن 250 مىڭ توننا پوليەتيلەندى قۇرايدى. ول دا اتىراۋ قالاسىندا ورنالاسقان. ەكىنشى جوبا - بۋتاديەن شىعاراتىن زاۋىت. بۇل جوبا دا كومپانيانىڭ ستراتەگيالىق سەرىكتەستەرىمەن پىسىقتالىپ جاتىر»، - دەدى كومپانيا باسشىسى.


جاڭالىقتار