اتىراۋدا جامبىل اقىننىڭ جەكە بۇيىمدارى كوشپەلى كورمەگە قويىلدى
4 شىلدە 09:01

اتىراۋدا جامبىل اقىننىڭ جەكە بۇيىمدارى كوشپەلى كورمەگە قويىلدى

اتىراۋ. قازاقپارات - اتىراۋدا دومبىرا كۇنىنە وراي جامبىل اقىننىڭ تۇتىنعان بۇيىمدارى كوشپەلى كورمەگە قويىلدى. ونىڭ ىشىندە ەكى دومبىراسى بار، دەپ حابارلايدى قازاقپارات.

اتىراۋ وبلىستىق تاريحي- ولكەتانۋ مۋزەيىندە جامبىل جابايەۆتىڭ ادەبي- مەموريالدى مۋزەيىنىڭ ۇيىمداستىرۋىمەن «ۇلى جىراۋدىڭ اسىل مۇراسى» اتتى كوشپەلى كورمە ءوتتى.

«جامبىل اقىننىڭ شىعارماشىلىعىنىڭ 75 جىلدىعىنا وراي 92 جاسىندا 12 بولمەلى ءۇي بەرىلگەن ەدى. اتامىز ومىردەن وتكەنگە دەيىن سول ۇيدە تۇردى. اتامىز ومىردەن وتكەنىنە ەكى جىلدان سوڭ سول ءۇي جامبىل مۋزەيىنە اينالدى. اتىراۋ جۇرتشىلىعىنىڭ نازارىنا ۇسىنىلعان كورمەگە اقىن اتامىزدىڭ پايدالانعان جەكە بۇيىمدارىن، دومبىراسى مەن كيگەن شاپانىن، وتباسىلىق سۋرەتتەردى، وزگە دە قۇندى جادىگەرلەردى اكەلدىك. ءۇش كۇن بويى اتىراۋلىق جۇرتشىلىعىنا جامبىل اقىننىڭ ءومىرى مەن شىعارماشىلىعىنان مول ماعلۇمات ۇسىندىق»، - دەيدى ۇلى اقىننىڭ نەمەرەسى سالتانات جامبىلوۆا.

ونىڭ ايتۋىنشا، اقىننىڭ ادەبي مەموريالدىق مۋزەيى الماتى وبلىسىنىڭ جامبىل اۋدانىنداعى جامبىل اۋىلىندا ورنالاسقان. ال، اتىراۋداعى كورمەگە قويىلعان كونە جادىگەردىڭ ءبىرى - جامبىل اقىننىڭ جاس كەزىندە ۇستاعان دومبىراسى. ۇلتتىق اسپاپتىڭ شەگى ەشكىنىڭ ىشەگىنەن جاسالعان.


«قازىر اقىننىڭ ۇرپاقتارى الماتى وبلىسىندا تۇرادى. نەمەرەلەرىنىڭ ءبىرى - مەن جامبىل جابايەۆ اتىنداعى ادەبي- مەموريالدى مۋزەيىنىڭ ديرەكتورى بولسام، شوبەرەسىنىڭ ءبىرى وسى مۋزەيدە قور ساقتاۋشىسى بولىپ جۇمىس ىستەيدى. ءبىز ءۇشىن اتامىزدىڭ ەڭ قۇندى جادىگەرى - دومبىراسى مەن شىعارماشىلىعى. اتامىز دومبىراسىن قولىنان تاستاماي، قازاقتىڭ ۇلتتىق اسپابى رەتىندە قادىر تۇتتى»، - دەيدى سالتانات جامبىلوۆا.


كورمەنى تاماشالاعان جۇرتشىلىققا «دارىن» ونەر مەكتەبى ستۋدياسىنىڭ ونەرپازدارى «دومبىرا» ءبيىن ورىنداپ بەردى. وبلىستىق ارداگەرلەر كەڭەسىنىڭ ءتوراعاسى مۇرات وتەشوۆ، قازاقستان جازۋشىلار وداعى اتىراۋ وبلىستىق فيليالىنىڭ ديرەكتورى قويشىعۇل جىلقىشيەۆ، ح. دوسمۇحامەد ۇلى اتىنداعى اتىراۋ ۋنيۆەرسيتەتىنىڭ پروفەسسورى، فيلولوگيا عىلىمدارىنىڭ دوكتورى قادىر ءجۇسىپ، جامبىل شىعارماشىلىعىن زەرتتەۋشى عالىم ايكۇمىس قىدىربايەۆا اقىننىڭ تاعىلىمدى ءومىر جولى، جىراۋدىڭ دۇنيەتانىمى مەن مۇراسى تۋرالى اڭگىمەلەدى.


«قازاقتىڭ ەجەلدەن كەلە جاتقان ۇلتتىڭ ونەرىنىڭ ءبىرى - ايتىس. جامبىل اقىن ءدال وسى ونەردى كەيىنگى ۇرپاققا جەتكىزىپ، ونى مەيلىنشە كەڭىنەن ناسيحاتتادى. سول سەبەپتەن، اقىننىڭ شىعارماشىلىعى ءالى دە سان قىرىنان زەرتتەلۋى كەرەك»، - دەيدى قازاقستاننىڭ ەڭبەك سىڭىرگەن قايراتكەرى قويشىعۇل جىلقىشيەۆ.

ەسكە سالا كەتەلىك، بۇدان بۇرىن اتىراۋ مۋزەيىندە قوس مەرەكە قارساڭىندا ەكسپوزيتسيالىق زالدار اشىلعان بولاتىن.

اۆتور: بەك مۇستافا


جاڭالىقتار