جەتىسۋلىق كوپ بالالى انا ەكوتۋريزمدى اۋىلدا دامىتىپ جاتىر

جەتىسۋ وبلىسى. قازاقپارات - بۇگىنگى كۇنى تۋريزم سالاسى جاقسى دامىپ كەلەدى. سونىڭ ىشىندە ەكوتۋريزم تانىمال بولا باستادى، وندا ادامدار قورشاعان ورتانى ساقتاۋ ءۇشىن جايلى قوناقۇيلەردەن، اۆتوكولىكتەردەن جانە وركەنيەتتىڭ باسقا دا ارتىقشىلىقتارىنان باس تارتادى.

قازاقستاننىڭ ەكولوگيالىق تۋريزمىن دامىتۋعا ۇلەس قوسىپ جۇرگەن قىز- كەلىنشەكتەر وتە كوپ. سولاردىڭ ءبىرى جەتىسۋلىق اسەم اۋعانبايەۆا، دەپ حابارلايدى قازاقپارات ءتىلشىسى.

وسىدان ءبىر جىل بۇرىن 36 جاستاعى اسەم اۋعانبايەۆا تالدىقورعان قالاسىنان 180 شاقىرىم جەردە ورنالاسقان باسشي اۋىلىنان قوناق ءۇي اشتى.

«جولداسىم ەكەۋمىز اۋىلدان قوناق ءۇي اشۋدى بۇرىنان ارماندايتىنبىز. الدىمىزعا ماقسات قويىپ ەدىك. وكىنىشكە وراي، ەكى جىل بۇرىن كۇيەۋىم قايتىس بولىپ كەتتى»، - دەدى اسەم اۋعانبايەۆا.

كەيىپكەرىمىزدىڭ ايتۋىنشا، جولداسىنان ايىرىلىپ قالعان سوڭ جەكە قوناق ءۇي اشۋ تۋرالى يدەياسىن تۋىستارى مەن جاقىن دوستارى قولداپ، كومەكتەسكەن.

«مەنىڭ ماماندىعىم - فەلدشەر. ەكى قىز، ەكى ۇل تاربيەلەپ وتىرمىن. ۇلكەنىم - 14 جاستا. «كامەلەتكە تولماعان بالالارى بار جەسىر ايەل كاسىپكەرلىكپەن اينالىسا المايدى» دەگەندەر دە بولدى. ءبىراق مەن بالالارىمدى ءوسىرىپ، ەر جەتكىزەمىن. ەكوتۋريزمى دامىتۋعا ءوز ۇلەسىمدى قوسامىن. بالالارىم ماعان ۇلكەن قولداۋ كورسەتۋدە. سول ماعان كۇش- جىگەر بەرەدى، العا قاراي جەتەلەيدى»، - دەيدى ول.

2021 -جىلى اسەم اۋىل كاسىپكەرلەرىنە ەرەكشە قورعالاتىن تابيعي اۋماقتار ماڭىندا ءوز ءىسىن اشۋ جانە دامىتۋ ءۇشىن قارجىلاندىرۋدى قاراستىراتىن «ەكو دامۋ» نەسيە باعدارلاماسى تۋرالى ءبىلدى. ايتا كەتەيىك، قازاقستاندا جوبانى بىرىككەن ۇلتتار ۇيىمىنىڭ دامۋ باعدارلاماسى (ب ۇ ۇ د ب) جۇزەگە اسىرادى.

«9 ميلليون تەڭگە نەسيە الىپ، ەكى كيىز ءۇي، قاجەتتى جيھازدار، ىدىس- اياق پەن تۇرمىستىق تەحنيكا ساتىپ الدىم. جالدامالى ءۇيدىڭ اۋلاسىنا كيىز ءۇي تىگۋگە كومەكتەسكەن تۋعان- تۋىستارىم مەن قامقور جانداردىڭ قولداۋىنىڭ ارقاسىندا مەن بيزنەسىمدى باستادىم»، - دەيدى كەيىپكەرىمىز.

اسەمنىڭ ۇلتتىق ناقىشتاعى قوناق ءۇيى «التىن- ەمەل» ۇلتتىق پاركىنىڭ جانىندا ورنالاسقان.

«كيىز ءۇيدى تاڭداعاندا، ەڭ الدىمەن، ولاردىڭ ەكولوگيالىق تازالىعىنا ءمان بەردىم. تازا اعاشتان جاسالعان. ءىشىن ۇلتتىق ناقىشتا بەزەندىردىك. ىدىستاردى شەبەرگە تاپسىرىس بەرىپ ارنايى جاساتتىم. ولاردىڭ بارلىعى ەكولوگيالىق تازا ماتەريالدان جاسالعان، قورشاعان ورتاعا زيانى جوق»، - دەپ ءبولىستى اسەم.

كاسىبىن جاڭا باستاعان اسەمنىڭ ايتۋىنشا، تۋريستەرگە بارلىق جاعداي جاسالعان.

«دەمالۋشىلاردىڭ باسىم بولىگى الماتى، تالدىقورعان جانە جاقىن ماڭداعى ەلدى مەكەندەردىڭ تۇرعىنى. سونىمەن قاتار گەرمانيا، تۇركيا جانە ۋكراينادان كەلگەن تۋريستەر دە قازاق مادەنيەتىنە ەرەكشە قىزىعۋشىلىق تانىتىپ جاتىر. قوناقتارىما قازاقتىڭ ناعىز قوناقجايلىعىن كورسەتەمىن. الداعى ۋاقىتتا اۋىل تۇرعىندارىن جۇمىسپەن قامتۋدى جوسپارلاپ وتىرمىن، - دەپ تۇيىندەدى اڭگىمەسىن كەيىپكەرىمىز.

اۆتور: الما مۇقانوۆا