وزبەكستان كونستيتۋتسياسىنىڭ قاراقالپاقستانعا قاتىستى باپتارى وزگەرمەيتىن بولدى
2 شىلدە 23:57

وزبەكستان كونستيتۋتسياسىنىڭ قاراقالپاقستانعا قاتىستى باپتارى وزگەرمەيتىن بولدى

نوكىس. قازاقپارات - وزبەكستان پرەزيدەنتى شاۆكات ميرزيەيەۆ ەل كونستيتۋتسياسىنا قاراقالپاقستان ەگەمەندىگىن جويۋعا قاتىستى وزگەرىستەردى كەرى قايتاردى.

پرەزيدەنت باسپا ءسوز قىزمەتىنىڭ Telegram ارناسىنداعى حابارعا قاراعاندا، مەملەكەت باسشىسى قاراقالپاقستاندا زيالى قاۋىم وكىلدەرىمەن كەزدەسۋدە وسىنداي پىكىر ايتقان، دەپ حابارلايدى قازاقپارات.

پرەزيدەنت بۇگىن نوكىس قالاسىنا بارىپ، قاراقالپاقستان جوقارعى كەڭەسىنىڭ دەپۋتاتتارى جانە قوعام بەلسەندىلەرىمەن كەزدەسكەن. ونىڭ ايتۋىنشا، ەل كونستيتۋتسياسىنا وزگەرىستەر ەنگىزۋ تۋرالى زاڭ جوباسى ءالى دە حالىق تالقىسىندا.

«ەرەكشە ايتارىم، «وزبەكستان رەسپۋبليكاسىنىڭ كونستيتۋتسياسىنا وزگەرتۋلەر مەن قوسىمشالار ەنگىزۋ تۋرالى» كونستيتۋتسيالىق زاڭ جوباسى جالپى حالىق تالقىسىنان تولىق وتەدى. سودان كەيىن ازاماتتار بىلدىرگەن پىكىرلەر نەگىزىندە زاڭ شىعارۋ پالاتاسى (وزبەكستان پارلامەنتىنىڭ تومەنگى پالاتاسى) ونى جەتىلدىرە تۇسەدى»، - دەدى شاۆكات ميرزيەيەۆ.

پرەزيدەنت نەگىزگى زاڭعا حالىقتىڭ پىكىرىن ەسكەرە وتىرىپ وزگەرىس ەنگىزىلەتىنىن ايتتى. «قاراقالپاقستان رەسپۋبليكاسىنىڭ وزىنە ءتان ەتنيكالىق، مادەني ەرەكشەلىكتەرى، ۇلتتىق ادەت- عۇرىپتارى مەن قۇندىلىقتارى، ايرىقشا قۇقىقتىق مارتەبەسىن ەسكەرە وتىرىپ، جوباداعى قاراقالپاقستان رەسپۋبليكاسىنىڭ قۇقىقتىق مارتەبەسىنە قاتىستى نورمالاردى وزگەرىسسىز قالدىرۋ قاجەت دەپ ەسەپتەيمىن. ياعني، كونستيتۋتسيانىڭ 70 ، 71، 72، 74، 75-باپتارى وزگەرتىلمەيدى»، - دەپ مالىمدەدى وزبەكستان پرەزيدەنتى.

فوتو: ءو ر پرەزيدەنتىنىڭ باسپا ءسوز قىزمەتى


جاڭالىقتار