كانيكۋلعا شىققان دەپۋتاتتار قايدا دەمالادى؟

نۇر-سۇلتان. قازاقپارات - پارلامەنتتىڭ قوس پالاتاسىنىڭ دەپۋتتاتارى كەشە كانيكۋلعا شىقتى.

وسى ورايدا، قازاقپارات ءتىلشىسى ولاردىڭ ءبىرقاتارىنا حابارلاسىپ، دەمالىستارىن قايدا وتكىزەتىندىگىن سۇراپ كوردى.

سونىمەن، سەنات دەپۋتاتى مۇرات باقتيار ۇلى دەمالىسىن الماتىدا وتكىزبەك. ول ءوزىنىڭ 2014-جىلدان بەرى شەتەلدە دەمالماعانىن دا ايتتى.

«مەن كەيىنگى 7 جىلدا سىرتتا دەمالعان ەمەسپىن. دەمالىسىمدى تەك ەلدە وتكىزەمىن. كوبىنە كاتونقاراعاي، وقجەتپەس، قىزىلوردا جانە الماتىعا بارامىن. بۇل مەكەندەردىڭ ماعان تۇمسا تابيعاتى ۇنايدى. اسىرەسە، وقجەتپەس پەن كاتونقاراعايدىڭ سۇلۋلىعى، اۋاسىنىڭ تازالىعى شۆەيتساريادان اسىپ تۇسپەسە، كەم ەمەس. وعان قوسا، ءوزىڭنىڭ تۋىپ-وسكەن جەرىڭە ەشتەڭە جەتپەيدى. وكىنىشكە قاراي، باعالارى ءسال قىمباتتاۋ. سەرۆيس جاعى تومەن. جەتىلدىرۋ كەرەك. سوندىقتان، اتقارۋشى ورگاندار اينالىسىپ، ۇكىمەت كاسىپكەرلەرگە سۋبسيديا بولسە، وندا ءوزىمىزدىڭ جەردەن ارتىعى جوق. مەن سوڭعى رەت 2014-جىلى شەتەلدە دەمالدىم. ودان كەيىن مۇلدە شىقپاپپىن. بيىل دا سولاي، ەلدە بولامىن. الماتىعا بارۋدى جوسپارلاپ وتىرمىن. سوسىن سەنبى جانە جەكسەنبى كۇندەرى كولگە بارىپ، بالىق اۋلايمىن. مەنىڭ حوببيىم وسى»، - دەدى مۇرات باقتيار ۇلى.

ءماجىلىس دەپۋتاتى بەرىك بەكجانوۆ بولسا، دەمالىستا ەل ارالاپ، حالىقپەن كەزدەسۋدى جوسپارلاپ وتىر. سونداي-اق، ول كانيكۋلعا شىققانىمەن، بارلىق دەپۋتتاتار جاز بويى سايلاۋشىلارمەن جۇمىس ىستەيتىنىن ءمالىم ەتتى.

«بىرىنشىدەن، دەمالىسقا ەرتەلەۋ بولىپ تۇر ءالى. سەبەبى، سايلاۋشىلارمەن كەزدەسۋ كەرەك. سوندىقتان، وسى دەمالىسىمىز اياسىندا حالىقپەن جۇزدەسىپ، ەل اراسىندا بولساق دەگەن وي بار. ال، جالپى مەنىڭ ءجيى باراتىن جەرىم - سارىاعاش. نەگىزى وڭتۇستىك وڭىرلەردە جاقسى دەمالىس ورىندارى جەتەرلىك. اسىرەسە، تاۋ بوكتەرىندەگى اقسۋ-جاباعىلى - تاماشا جەر. بيىل دا وسى جەرلەرگە بارۋدى جوسپارلايتىن شىعارمىن. دەگەنمەن، ءبىر ماسەلەنى ايتا كەتۋ كەرەك. دەپۋتاتتار كانيكۋلعا كەتتى دەپ اتالادى. ءبىراق، ول ەل ويلايتىنداي كانيكۋل ەمەس. ءبىز بۇل كەزەڭدە دەپۋتاتتىق جۇمىسىمىزدى وڭىرلەردە جالعاستىرامىز»، - دەپ جوسپارىمەن ءبولىستى دەپۋتات.

تاعى ءبىر ءماجىلىس دەپۋتاتى ءىلياس بۇلاروۆ بىردەن ەكى ايعا ارنالعان جوسپارىن جاريالادى. ول جاز ماۋسىمىندا قورداي مەن الماتىدا ەم الماق.

«دەمالىسىمىزدىڭ العاشقى كۇنى الماتى قالاسىنداعى الاتاۋ اۋدانىندا كەزدەسۋ وتكىزدىم. وندا مەملەكەتتىك ءتىلدى دامىتۋ ماسەلەلەرىن تالقىلادىق. ەندى جامبىل وبلىسىنىڭ قورداي اۋدانىنا كەتىپ بارا جاتىرمىن. وزدەرىڭىزگە ءمالىم، ول جاقتا سەل ءجۇرىپ، تۇرعىندار زارداپ شەكتى. ەتنومادەني ورتالىقتاردىڭ وكىلدەرى جانە سەلولىق وكرۋگ اكىمدەرىمەن بىرلەسىپ، 3 ميلليون تەڭگەدەن استام قارجى جينادىق. سول قاراجاتتى سەلدەن زارداپ شەككەن ادامدارعا بەرەمىز. ال، 4- شىلدەدەن باستاپ ءبىر اپتا كولەمىندە قوردايدا ەم الامىن. سودان كەيىن 19-29- شىلدە ارالىعىندا الماتىداعى ق ر پرەزيدەنتىنىڭ ءىس باسقارماسىنا قاراستى ساناتوريدە ەمدەلەمىن، دەمالامىن. ال، ايدىڭ سوڭىنا قاراي ءۇشارال قالاسىنا بارامىن. ول جەردە ۇمىتىلعان بىرنەشە اۋىل بار. سولاردىڭ تىنىس-تىرشىلىگىمەن تانىسىپ قايتپاقپىن. سونداي-اق، تامىزدا جاركەنتكە بارىپ، ەلدى مەكەننىڭ احۋالىن كورۋدى جوسپارلاپ وتىرمىن»، - دەپ الداعى ساپارلارىن باياندادى ءىلياس بۇلاروۆ.