قاڭتاردا قازا تاپقانداردىڭ ءتىزىمىن عانا ەمەس، نەدەن ولگەنىن، كىم كىنالى ەكەنىن قوسا جاريالاۋ كەرەك - ءازىموۆا
1 شىلدە 19:58

قاڭتاردا قازا تاپقانداردىڭ ءتىزىمىن عانا ەمەس، نەدەن ولگەنىن، كىم كىنالى ەكەنىن قوسا جاريالاۋ كەرەك - ءازىموۆا

نۇر-سۇلتان. قازاقپارات - بيىل قاڭتاردا بولعان جاپپاي تارتىپسىزدىك كەزىندە قازا بولعان جانە زارداپ شەككەن جانداردىڭ ءتىزىمى شامامەن قاشان جاريالاناتىنى بەلگىلى بولدى، دەپ حابارلايدى قازاقپارات ءتىلشىسى.

«ءبىز قاڭتار وقيعاسىندا قايتىس بولعاندار ماسەلەسىن پروتسەسس باستالا سالا كوتەردىك. بۇگىندە بۇل ماسەلە كۇن تارتىبىنەن تۇسكەن ەمەس. قايتىس بولعانداردىڭ تىزىمىنە كەلسەك، باس پروكۋراتۋرانىڭ مالىمەتىنە سايكەس، تەرگەۋ اياقتالۋى كەرەك، ءتىزىم سودان كەيىن عانا جاريالانادى. ءبىزدىڭ ويىمىزشا، جەكەلەگەن ايماقتار بويىنشا تەرگەۋ ناتيجەسى بەلگىلى ەكەنىن ەسكەرە وتىرىپ، قايتىس بولعاندار مەن زارداپ شەككەندەردىڭ ءتىزىمىن كەزەڭ-كەزەڭىمەن جاريالاعان دۇرىس بولار ەدى. ءبىراق مەن ءۇشىن ماڭىزدىسى ءتىزىم عانا ەمەس. ونداعى ادامداردىڭ مارتەبەسى، ءولىمنىڭ سەبەبى تۋرالى اقپارات بىرگە بەرىلۋى ماڭىزدى. سوندىقتان قۇر ءتىزىمدى جاريالاپ قانا قويماي، ادام ءولىمىنىڭ سەبەبى مەن وعان كىم كىنالى ەكەندىگى تۋرالى دا ايتۋ كەرەك»، - دەدى ادام قۇقىقتارى جونىندەگى ۋاكىل ەلۆيرا ءازىموۆا ورتالىق كوممۋنيكاتسيالار قىزمەتى الاڭىندا وتكەن دوڭگەلەك ۇستەل بارىسىندا.

سونداي-اق، ۋاكىل باس پروكۋراتۋرادان قاڭتار وقيعاسى كەزىندە قايتىس بولعان جانە زارداپ شەككەندەرگە قاتىستى ءتىزىم مەن تولىق اقپاراتتى تالاپ ەتەتىنىن ايتتى.

اتالعان جايتقا قاتىستى ق ر باس پروكۋراتۋراسىنىڭ نورماشىعارماشىلىق قىزمەتتى ۇيلەستىرۋ دەپارتامەنتىنىڭ باسشىسى الماز مۇحامەدجانوۆ تۇسىنىك بەرىپ ءوتتى.

«بىرىنشىدەن، قىلمىستىق ىستەردى تەرگەۋ مەرزىمى شەكتەۋلى. ياعني قىلمىستىق ءىس جۇرگىزۋ كودەكسىندە ءتيىستى شەكتەۋلەر بار. مەنىڭ ويىمشا، قازىر قاڭتار وقيعاسىنا قاتىستى قىلمىستىق ىستەر مارەسىنە جەتىپ قالدى. قاجەتتى ساراپتامالار دا اياقتالۋى كەرەك. كوپكە سوزىلمايدى. مۇمكىن، وسى توقساندا ناقتى اقپارات بولىپ قالار. ول تۋرالى ءبىزدىڭ رەسمي وكىلدەرىمىز قوعامعا جەتكىزەدى. اقپارات تەك قازا تاپقاندار مەن زارداپ شەككەندەرگە عانا ەمەس، بارلىق قىلمىستىق ىسكە قاتىستى»، - دەيدى ول.

بۇعان دەيىن ادام قۇقىقتارى جونىندەگى ۋاكىل ەلۆيرا ءازىموۆا قاڭتار وقيعاسىنان كەيىن ۇستالىپ، ازاپتاۋدان ولگەن ادام سانىنا قاتىستى ءوز ءۋاجىن ايتقان ەدى.


جاڭالىقتار