قازاق ديپلوماتياسىنىڭ تاريحى عاسىرلاردان تامىر الادى - جوزەپ بوررەل
1 شىلدە 17:30

قازاق ديپلوماتياسىنىڭ تاريحى عاسىرلاردان تامىر الادى - جوزەپ بوررەل

نۇر-سۇلتان. قازاقپارات - ۇلى دالانىڭ داناگوي ديپلوماتياسىنىڭ مۇراگەرى قازاق ديپلوماتياسىنىڭ تاريحى عاسىرلاردان تامىر الادى.

مۇنداي پىكىردى «حالىقارالىق قاتىناستاردىڭ قازىرگى زامانعى جۇيەسىندەگى قازاقستان رەسپۋبليكاسى» اتتى حالىقارالىق كونفەرەنسيا بارىسىندا ەۋروپالىق وداقتىڭ سىرتقى ىستەر جانە قاۋىپسىزدىك ساياساتى جونىندەگى جوعارى وكىلى جوزەپ بوررەل ءبىلدىردى، دەپ حابارلايدى قازاقپارات ءتىلشىسى.

«بۇگىن قازاقستاننىڭ ديپلوماتيالىق قىزمەتى ءوزىنىڭ وتىز جىلدىعىن اتاپ وتۋدە. قازاق ديپلوماتياسىنىڭ عاسىرلىق تامىرى بار. ولار - ۇلى دالانىڭ دانا ديپلوماتياسىنىڭ مۇراگەرلەرى. وسى تامىرلاردىڭ ارقاسىندا ەۋروپا مەن ازيانىڭ توعىسقان جەرىندەگى الەمدەگى ەڭ ءىرى ەلدەردىڭ ءبىرىن ساقتاپ قالۋعا مۇمكىندىك تۋدى»، - دەدى جوسەپ بوررەل.

ە و وكىلى وتاندىق ديپلوماتتاردىڭ قازاقستاندى ەگەمەن، بەيبىت جانە اشىق مەملەكەتكە اينالدىرۋ جولىندا ايانباي ەڭبەك ەتكەنىن باسا ايتتى.

«بۇل گەوساياسي تۇرعىدا جانە تەڭىزگە شىعا المايتىن گەوگرافيالىق جەردە ءجيى قيىن. سوڭعى 30 جىل ىشىندە قازاقستان ءوزىن حالىقارالىق قوعامداستىقتىڭ بەلسەندى جانە بەدەلدى مۇشەسى رەتىندە نىق تانىتتى. قازاقستان - يادرولىق قارۋدى تاراتپاۋ جانە يادروسىز الەم ءۇشىن قوزعالىستى بەلسەندى قولداۋشىلاردىڭ ءبىرى، ورتالىق ازياداعى جەتەكشى مەملەكەت، ەۋروپالىق وداقتىڭ سەنىمدى جانە دوستاس سەرىكتەسى. ە و اتىنان قازاقستاندى جانە ونىڭ ديپلوماتتارىن شىن جۇرەكتەن قۇتتىقتايمىن جانە سىزدەرگە تابىس، وركەندەۋ جانە الداعى ۇزاق جىلدار بويى بەيبىت دامۋ تىلەيمىن»، - دەپ اتاپ ءوتتى ول.

جاڭالىقتار