وسى جىلدىڭ سوڭىندا سيفرلىق تەڭگەنىڭ پلاتفورماسى سىناقتان وتكىزىلمەك
1 شىلدە 16:29

وسى جىلدىڭ سوڭىندا سيفرلىق تەڭگەنىڭ پلاتفورماسى سىناقتان وتكىزىلمەك

نۇر-سۇلتان. قازاقپارات - «سيفرلىق تەڭگە» جوباسىنىڭ كونسۋلتاتيۆتىك كەڭەسى قۇرىلدى.

بۇل تۋرالى قازاقپارات ۇلتتىق بانككە سىلتەمە جاساپ حابارلايدى.

قازاقستان ۇلتتىق بانكى مەن تولەم جانە قارجىلىق تەحنولوگيالاردى دامىتۋ ورتالىعى «سيفرلىق تەڭگەنى ەنگىزۋ بويىنشا شەشىم قابىلداۋ مودەلى» بايانداماسىن جاريالادى.

وسى مودەل بويىنشا الىنعان زەرتتەۋ ناتيجەلەرىنىڭ نەگىزىندە 2022-جىلدىڭ سوڭىنا دەيىن قازاقستاندا ورتالىق بانكتىڭ سيفرلىق ۆاليۋتاسىن ەنگىزۋ تۋرالى قورىتىندى شەشىم ازىرلەنەدى.

«سيفرلىق تەڭگەنى ىسكە قوسۋ تۋرالى شەشىم قابىلداۋداعى باسىمدىق تولەم قىزمەتتەرىن تۇتىنۋشىلار ءۇشىن ايقىن ناتيجە بولادى. تالداۋ قۇرالدارى رەتىندە تەحنولوگيالىق ەكسپەريمەنتتەر، ەكونوميكالىق مودەلدەۋ، مۇددەلى تاراپتارمەن ديزاين-سەسسيالار قاراستىرىلعان. 2022-جىلدىڭ 4-توقسانىندا نارىققا قاتىسۋشىلارمەن جانە تۇتىنۋشىلارمەن سيفرلىق تەڭگەنىڭ تەحنولوگيالىق پلاتفورماسىن وتپەلى تەستىلەۋ جوسپارلانعان. زەرتتەۋ ناتيجەلەرىن وبەكتيۆتى ءتۇسىندىرۋ ماقساتىندا تاۋەلسىز حالىقارالىق ساراپشىلار مەن حالىقارالىق قارجى ۇيىمدارى قىزمەتكەرلەرىنىڭ قاتىسۋىمەن «سيفرلىق تەڭگە» جوباسىنىڭ كونسۋلتاتيۆتىك كەڭەسى قۇرىلدى. قارجى نارىعىنىڭ قاتىسۋشىلارىمەن سيفرلىق تەڭگەنىڭ ەكوجۇيەسىن قۇرۋ دا جوبانى دامىتۋداعى تابىستىلىقتىڭ ماڭىزدى فاكتورى بولىپ تابىلادى. وسى ماقساتتار ءۇشىن كوللابوراتيۆتى الاڭ - Digital Tenge Hub قۇرىلدى. وعان نارىق قاتىسۋشىلارى، ينفراقۇرىلىمدىق ويىنشىلار، حالىقارالىق سەرىكتەستەر قاتىسادى»، - دەلىنگەن بانك حابارلاماسىندا.

سيفرلىق تەڭگەنى ەنگىزۋ، ونىڭ ىشىندە وفلاين تولەۋ مۇمكىندىگى ارقىلى تولەم مەن قارجىلىق قىزمەتتەردىڭ قولجەتىمدىلىگىن ارتتىرادى.

جاڭالىقتار