قازاقستان كوپجاقتى ىنتىماقتاستىقتى دامىتۋ قاعيداتتارىنا ادال – ب ۇ ۇ جەنيەۆا بولىمشەسىنىڭ باسشىسى
«قازاقستان رەسپۋبليكاسىنىڭ بارلىق ديپلوماتيالىق كورپۋسىن وسى ايتۋلى مەرەيتويمەن شىن جۇرەكتەن قۇتتىقتايمىن. تاۋەلسىزدىك جىلدارىندا قازاقستان بەيبىتشىل، تۇراقتى جانە دايەكتى دامىپ كەلە جاتقان مەملەكەت رەتىندەگى بەدەلىن نىعايتتى، سونداي-اق حالىقارالىق جانە وڭىرلىك ىنتىماقتاستىققا بەرىك ۇستانىمىن راستادى. قازاقستاننىڭ قارۋسىزدانۋ جانە يادرولىق قارۋدى تاراتپاۋ جونىندەگى جاھاندىق كۇن تارتىبىنە قوسقان ۇلەسىن ەرەكشە اتاپ وتكىم كەلەدى»، - دەدى ول «حالىقارالىق قاتىناستاردىڭ قازىرگى زامانعى جۇيەسىندەگى قازاقستان رەسپۋبليكاسى» اتتى حالىقارالىق كونفەرەنسيا بارىسىندا.
سونىمەن قاتار بولىمشە باس ديرەكتورى قازاقستان يادرولىق سىناقتارعا جاپپاي تىيىم سالۋ تۋرالى شارتتى دايىنداۋدا ماڭىزدى ءرول اتقارعانىن، 29- تامىزدى حالىقارالىق يادرولىق سىناقتارعا قارسى ءىس-قيمىل كۇنى دەپ جاريالاۋ تۋرالى باستاما كوتەرگەنىن اتاپ ءوتتى.
«كوپتەگەن جىل بۇرىن ءدال وسى كۇنى سەمەي يادرولىق پوليگونى رەسمي تۇردە جابىلعان بولاتىن. قازاقستان ازاماتتارى يادرولىق سىناقتاردىڭ دەنساۋلىق پەن قورشاعان ورتاعا تيگىزەتىن زيانىن جاقسى بىلەدى. الەمدەگى بارلىق يادرولىق قارۋ سىناقتارىنىڭ تورتتەن ءبىرى سەمەي پوليگونىندا جۇرگىزىلدى. ءبىر ميلليوننان استام قازاقستاندىق زارداپ شەگۋشى دەپ تانىلدى. بىرنەشە جىل وتكەننەن كەيىن قازاقستان ورتالىق ازيادا يادرولىق سىناقتان ازات ايماق قۇرۋ تۋرالى ماڭىزدى باستاما كوتەردى. ورتالىق ازياداعى يادرولىق قارۋسىز ايماق تۋرالى كەلىسىمگە 200-جىلدىڭ 8- قىركۇيەگىندە بۇرىنعى سەمەي پوليگونى اۋماعىندا قول قويىلعانىنىڭ نىشاندىق ءمانى بار. قازاقستان تاۋەلسىزدىگىن جاريالاعان ساتىنەن بەرى كوپجاقتى ىنتىماقتاستىقتى دامىتۋ قاعيداتتارىنا ادال بولىپ كەلەدى»، - دەدى تاتيانا ۆالوۆايا.