قازاقستاننىڭ ساياسي جاڭعىرۋعا بەتبۇرىسىن حالىقارالىق قاۋىمداستىققا تانىتۋعا ءمان بەرىلەدى
1 شىلدە 15:24

قازاقستاننىڭ ساياسي جاڭعىرۋعا بەتبۇرىسىن حالىقارالىق قاۋىمداستىققا تانىتۋعا ءمان بەرىلەدى

نۇر-سۇلتان. قازاقپارات - حالىقارالىق قاۋىمداستىققا قازاقستاننىڭ اۋقىمدى رەفورمالار جۇرگىزىپ، ساياسي جاڭعىرۋ جولىنا بەت بۇرعان ەل رەتىندە تانىتۋعا ايرىقشا ءمان بەرىلەدى.

بۇل تۋرالى «حالىقارالىق قاتىناستاردىڭ قازىرگى زامانعى جۇيەسىندەگى قازاقستان رەسپۋبليكاسى» اتتى حالىقارالىق كونفەرەنتسيا بارىسىندا ق ر سىرتقى ىستەر ءمينيسترى مۇحتار تىلەۋبەردى ايتتى، دەپ حابارلايدى قازاقپارات ءتىلشىسى.

«وزدەرىڭىزگە ءمالىم، وتاندىق ديپلوماتيانىڭ 30 جىلدىعى مەملەكەت باسشىسى جاريالاعان جاڭا قازاقستان قۇرۋ جونىندەگى ەل تاريحىنداعى جاڭا كەزەڭمەن تۇسپا-تۇس كەلىپ وتىر. سىرتقى ىستەر مينيسترلىگى قازاقستاننىڭ حالىقارالىق ارەناداعى بەدەلىن ودان ءارى نىعايتۋ، ونىڭ سىرتقى قاۋىپسىزدىگىن قامتاماسىز ەتۋ، شەتەلدەگى ازاماتتارىمىزدىڭ قۇقىقتارى مەن مۇددەلەرىن مەيلىنشە قورعاۋ جولىنداعى قىزمەتىن ودان ءارى جالعاستىرا بەرمەك»، - دەدى مينيستر.

ونىڭ اتاپ وتۋىنشە، ەلىمىزدى وڭىردەگى بەدەلى مەن بەلسەندىلىگىن ساقتاي، كوپۆەكتورلى سىرتقى ساياسات قاعيداتىنىڭ نەگىزىندە شەتەلدىك سەرىكتەستەرمەن ساياسي، ينۆەستيتسيالىق جانە ساۋدا بايلانىستارىن ودان ءارى دامىتۋ ماسەلەسى دە مينيسترلىكتىڭ اسا ماڭىزدى مىندەتتەرىنىڭ ءبىرى بولماق.

«حالىقارالىق قاۋىمداستىققا قازاقستاننىڭ اۋقىمدى رەفورمالار جۇرگىزىپ، ساياسي جاڭعىرۋ جولىنا بەت بۇرعان ەل رەتىندە تانىتۋعا ايرىقشا ءمان بەرىلەتىن بولادى. ديپلوماتتارىمىزدىڭ وسى مىندەتتەردى مۇلتىكسىز ورىنداپ، جاڭا قازاقستاننىڭ سىرتقى ساياساتىنىڭ الدىنا قويىلعان جاڭا ماقساتتارعا قول جەتكىزەتىنىنە، ەلىمىزدىڭ الەمدىك ساحناداعى بەدەلى مەن ىقپالىن ودان ءارى نىعايتا بەرەتىنىنە كامىل سەنەمىن»، - دەدى مۇحتار تىلەۋبەردى.

مينيستر ءسوزىن قورىتىندىلاي كەلە، بۇگىن الەم كوروناۆيرۋستىق پاندەميادان كەيىن گەوساياسي شيەلەنىستىڭ وسۋىنە بايلانىستى ەكونوميكالىق قيىندىقتارعا جالعاسىپ وتىرعان جوعارى تۋربۋلەنتتىك داۋىرگە ەنگەنىن اتاپ ءوتتى.

«ساۋدا قاتىناستارىنىڭ وزگەرۋى ناتيجەسىندە لوگيستيكالىق جانە ەنەرگەتيكالىق باعىتتاردىڭ ترانسفورماتسياسى، سونداي-اق الەمدەگى بۇرىن-سوڭدى بولماعان سانكتسيالىق تەكەتىرەس جاڭا تاۋەكەلدەر مەن قاۋىپ-قاتەرلەردى تۋىنداتۋدا. وسى جاعدايدا وتاندىق ديپلوماتيانىڭ كۇش-جىگەرى جاڭا قازاقستاندى قۇرۋعا ارنالعان پرەزيدەنت قاسىم-جومارت كەمەل ۇلى توقايەۆتىڭ اۋقىمدى ساياسي جانە ەكونوميكالىق رەفورمالارىن قولداۋعا باعىتتالاتىن بولادى»، - دەدى ول.

جاڭالىقتار