ۇلتتىق بانك تەڭگە/رۋبل باعامىنا قاتىستى جاعدايدى ءتۇسىندىردى
1 شىلدە 14:10

ۇلتتىق بانك تەڭگە/رۋبل باعامىنا قاتىستى جاعدايدى ءتۇسىندىردى

نۇر-سۇلتان. قازاقپارات - قازاقستان ۇلتتىق بانكى قازىرگى جاعدايدا تەڭگە/رۋبل باعامىنىڭ قالىپتاسۋىنا بايلانىستى ماۋسىم ايىندا رۋبلدىڭ بارلىق ۆاليۋتالارعا، ەڭ الدىمەن ا ق ش دوللارىنا قاتىستى ايتارلىقتاي نىعايعانىن حابارلادى.

«وسىنداي ايتارلىقتاي نىعايۋ ر ف-دا ەنگىزىلگەن كاپيتال قوزعالىسىن باقىلاۋ شارالارى، ەنەرگيا رەسۋرستارىن قوسا العاندا، نەگىزگى ەكسپورتتىق تاۋارلاردىڭ جوعارى باعالارى اياسىندا، يمپورتتىڭ ايتارلىقتاي قىسقارۋىمەن بايلانىستى بولدى. بۇرىن ەنگىزىلگەن ۆاليۋتالىق شەكتەۋلەردىڭ ايتارلىقتاي جەڭىلدەۋىنە قاراماستان، رەسەي رۋبلى مۇناي مەن گازدىڭ جوعارى باعاسى مەن يمپورتتىڭ تومەن كولەمى اياسىندا نىعايا بەردى. بۇل تيىسىنشە تەڭگە/رۋبل باعامىنىڭ رۋبل ءۇشىن ەڭ تومەنگى تاريحي كورسەتكىش - 9-9,1 تەڭگەگە دەيىن السىرەۋىنە اكەلدى»، - دەلىنگەن ۇلتتىق بانكتىڭ حابارلاماسىندا.

سونداي-اق اتالمىش حاباردا رەسەي فەدەراتسياسىندا رۋبل باعامىن قالىپقا كەلتىرۋ شارالارىنا قاتىستى اشىق پىكىرتالاس ءجۇرىپ جاتقانى ايتىلعان. بۇل رەتتە تىكەلەي شارالاردى قابىلداۋدى رف- عا قارسى ەنگىزىلگەن سانكتسيالار قيىنداتىپ تۇر. ءوز كەزەگىندە، تەڭگەنىڭ رەسەي رۋبلىنە قاتىستى ايىرباس باعامى تىكەلەي قالىپتاسپايدى، ول تەڭگە مەن ءرۋبلدىڭ دوللارعا قاتىستى باعامىنا قاراي جەكەلەي قالىپتاسادى.

تەڭگە/رۋبل نارىعى دەربەس قالىپتاستىرۋ ءۇشىن جەتكىلىكتى تۇردە تەرەڭ جانە ءوتىمدى ەمەس، بۇل رف مەن قر اراسىنداعى ساۋدا تەڭگەرىمسىزدىگىنە، سونداي- اق قازاقستاندىق ەكسپورتتاۋشىلاردىڭ ءوز ونىمدەرىن رەسەي فەدەراتسياسىنا تەڭگەگە ساتپاۋىنا بايلانىستى. رەسەيلىك ەكسپورتتاۋشىلاردان ايىرماشىلىعى - رەسەيلىك رۋبلگە ساتاتىن ەكسپورتتاۋشىلارعا قاراعاندا، رەسەي فەدەراتسياسىنداعى تەڭگەگە دەگەن سۇرانىستىڭ تومەندىگى وسىمەن بايلانىستى. ۆاليۋتالىق ساياسات اياسىندا ۇلتتىق بانك قۇبىلمالى ايىرباس باعامى ساياساتىن ۇستانادى.

بۇل - تەڭگەرىمسىزدىكتەردىڭ جيناقتالۋىن بولدىرمايدى جانە ونىمەن قاتار ەلدىڭ التىن- ۆاليۋتا رەزەرۆتەرىن ساقتاۋعا مۇمكىندىك بەرەدى. سوندىقتان رۋبلمەن نەمەسە كەز كەلگەن باسقا ۆاليۋتامەن پاريتەتكە اسەر ەتۋ ماقساتىندا ۇلتتىق ۆاليۋتانىڭ ايىرباس باعامى بويىنشا كەز كەلگەن امالدار جاساۋعا جول بەرىلمەيدى.

«قازاقستان رەسپۋبليكاسىنىڭ ۇلتتىق بانكى ايدىڭ سوڭىندا ۆاليۋتا نارىعىندا جاسالعان بارلىق وپەراتسيالار، ونىڭ ىشىندە التىن- ۆاليۋتا اكتيۆتەرى ەسەبىنەن جاسالعان ينتەرۆەنتسيالار، ۇلتتىق قوردىڭ نەمەسە ب ج ز ق اتىنان جاسالعان وپەراتسيالار تۋرالى اقپاراتتى جاريا ەتەدى. قر ۇب ۆاليۋتا نارىعىنداعى احۋالدى ءتۇسىندىرىپ، كاسىبي قاتىسۋشىلارمەن جانە حالىقپەن اراداعى كوممۋنيكاتسيالىق بايلانىستارعا ءتان جۇمىستى جالعاستىرا بەرەدى»، - دەلىنگەن ۇلتتىق بانكتىڭ اقپاراتىندا.


جاڭالىقتار