قازاقستان ورتالىق ازياداعى مەديتسينالىق تۋريزمنىڭ ورتالىعىنا اينالىپ كەلەدى - پرەزيدەنت
1 شىلدە 12:55

قازاقستان ورتالىق ازياداعى مەديتسينالىق تۋريزمنىڭ ورتالىعىنا اينالىپ كەلەدى - پرەزيدەنت

نۇر-سۇلتان. قازاقپارات - ەلوردادا ءوتىپ جاتقان حالىقارالىق نەيروحيرۋرگيا فورۋمىنىڭ قاتىسۋشىلارىنا ق ر پرەزيدەنتى قاسىم-جومارت توقايەۆ قۇتتىقتاۋ حات جولدادى، دەپ حابارلايدى قازاقپارات ءتىلشىسى.

مەملەكەت باسشىسىنىڭ قۇتتىقتاۋىن فورۋمعا قاتىسۋشىلارعا ق ر پرەمەر-ءمينيسترىنىڭ ورىنباسارى ەرالى توعجانوۆ وقىپ بەردى.

«قۇرمەتى فورۋمعا قاتىسۋشىلار! سىزدەردى حالىقارالىق نەيروحيرۋرگيا فورۋمىنىڭ جانە وسىعان وراي ۇيىمداستىرىلعان تاقىرىپتىق كينوفەستيۆالدىڭ اشىلۋىمەن قۇتتىقتايمىن. الەمگە تانىمال اكادەميك ا. كونوۆالوۆ باستاعان بىلىكتى عالىمداردىڭ بۇگىنگى باسقوسۋى وتاندىق دەنساۋلىق ساقتاۋ ءىسىن دامىتۋعا تىڭ سەرپىن بەرەرى ءسوزسىز»، - دەپ جازىلعان پرەزيدەنتتىڭ قۇتتىقتاۋ لەبىزىندە.

سونداي-اق، قاسىم-جومارت توقايەۆ حاتىندا اتالمىش شارانى ۇيىمداستىرىپ وتىرعان ۇلتتىق نەيروحيرۋرگيا ورتالىعى قازاقستاندا نەيروحيرۋرگيا سالاسىنىڭ العا باسۋىنا زور ۇلەس قوسىپ كەلە جاتقانىن اتاپ ءوتتى.

«بۇل مەكەمە ورتالىق ازياداعى ۇزدىك مەديتسينا ۇيىمدارىنىڭ قاتارىنا كىرەدى. بىلتىر وڭىردە العاشقىلاردىڭ ءبىرى بولىپ وسىندا «گامما- پىشاق» قوندىرعىسى ورناتىلدى. سوڭعى ءبىر جىل ىشىندە 500-گە جۋىق اسا كۇردەلى وپەراتسيا جاسالدى. ەلىمىزدە دۇنيەجۇزىنە ايگىلى ماماندارمەن تىعىز قارىم- قاتىناس ورناتىپ، تاجىريبە الماسۋعا، سونداي-اق، وتاندىق نەيروحيرۋرگياعا وزىق تەحنولوگيالاردى ەنگىزۋگە بارلىق جاعداي جاسالعان. 2025 -جىلعا دەيىنگى ۇلتتىق دامۋ جوسپارىندا دەنساۋلىق ساقتاۋ جۇيەسىن دامىتۋ باستى باسىمدىقتىڭ ءبىرى رەتىندە بەلگىلەنگەن. ءبىزدىڭ دارىگەرلەرىمىز حالىققا جوعارى ساپالى قىزمەت كورسەتۋدە. قازاقستان ايماقتاعى مەديتسنالىق ءتۋريزمنىڭ ورتالىعىنا اينالىپ كەلەدى. بۇگىنگى جيىندا قازىرگى زامانعى عىلىمي جاڭالىقتاردى ەل يگلىگىنە باعىتتايتىن كوپتەگەن تىڭ يدەيالار ايتىلادى دەپ سەنەمىن»، - دەلىنگەن پرەزيدەنت قۇتتىقتاۋىندا.

جاڭالىقتار