رەسەي اسكەرى ۋكراينانىڭ ستراتەگيالىق ءمانى زور زمەينىي ارالىنان كەتتى
1 شىلدە 10:55

رەسەي اسكەرى ۋكراينانىڭ ستراتەگيالىق ءمانى زور زمەينىي ارالىنان كەتتى

نۇر-سۇلتان. قازاقپارات - رەسەي اسكەرى ۋكراينانىڭ زمەينىي ارالىنان كەتتى. بۇل تۋرالى پرەزيدەنت ۆلاديمير زەلەنسكي ءداستۇرلى بەينەۇندەۋىندە مالىمدەدى.

ونىڭ ايتۋىنشا، ارالعا باقىلاۋ ورناتۋ ارقىلى رەسەيدەن قارا تەڭىز پورتتارىن ازات ەتۋگە بولادى. ءبىراق بۇل ايماقتا تولىق قاۋىپسىزدىك ورناتۋ ءۇشىن ءالى دە جەتكىلىكسىز دەدى زەلەنسكي.

«بۇگىنگى باستى جاڭالىق - زمەينىي ارالى. رەسەي كەمەسى كىرگەن ساتتەن باستاپ ءبىز ول جاقتى ۇنەمى تالقىلاۋمەن بولدىق. ولار ەندى ول جەردەن كەتتى»، دەدى ۋكراينا پرەزيدەنتى ۆلاديمير زەلەنسكي.

زمەينىي ارالىنىڭ ستراتەگيالىق ءمانى زور. ول جەر قارا تەڭىزدەگى بۇكىل جاعدايعا اسەر ەتە الادى. اسكەرىنىڭ ارالدان كەتكەنىن رەسەيدىڭ قورعانىس مينيسترلىگى راستادى. وسىلايشا كرەمل بىرىككەن ۇلتتار ۇيىمىنىڭ ۋكراينا اۋماعىنان اۋىل شارۋاشىلىعى ونىمدەرىن شىعارۋ ءۇشىن گۋمانيتارلىق ءدالىز قۇرۋ ارەكەتىنە كەدەرگى كەلتىرمەيتىنىن كورسەتكىسى كەلەدى.

«وسى شەشىمنەن كەيىن كيەۆ رەسەيدى قارا تەڭىزدىڭ سولتۇستىك- باتىسىنداعى استىقتى ەكسپورتتاۋعا كەدەرگى كەلتىرىپ، ازىق-تۇلىك داعدارىسىن تۋدىرىپ وتىر دەپ كىنالاي المايدى. ەندىگى كەزەك ۋكراينا جاعىندا. ولار قارا تەڭىز جاعاسىن مينالاردان تازارتۋى قاجەت»، ر ف قورعانىس مينيسترلىگىنىڭ وكىلى يگور كوناشەنكوۆ.

جاڭالىقتار