ۆولەيبول سپورتىنىڭ كەڭىنەن دامۋى ءۇشىن ءار وڭىردە جاعداي جاساۋ قاجەت - اماندىق باتالوۆ
1 شىلدە 09:55

ۆولەيبول سپورتىنىڭ كەڭىنەن دامۋى ءۇشىن ءار وڭىردە جاعداي جاساۋ قاجەت - اماندىق باتالوۆ

نۇر-سۇلتان. قازاقپارات - جۋىردا مەملەكەتتىك قىزمەتتىڭ ارداگەرى، قازاقستاننىڭ ەڭبەك سىڭىرگەن سپورت قايراتكەرى ەرسۇلتان بەكتۇرعانوۆتىڭ 70 جىلدىق مەرەيتويىنا وراي ەلورداداعى «استانا» سپورت كەشەنىندە ۆولەيبولدان ارداگەرلەر اراسىندا حالىقارالىق تۋرنير وتكەن ەدى.

وسى جارىسقا ءوز كومانداسىن جاساقتاپ، الىپ كەلگەن ازاماتتىڭ ءبىرى - مەملەكەت قايراتكەرى، ۆولەيبولدان سپورت شەبەرى، الماتى وبلىسىنىڭ بۇرىنعى اكىمى اماندىق باتالوۆ.

ول قازاقپارات تىلشىسىنە وتاندىق سپورتتى دامىتۋدىڭ جولدارى تۋرالى اڭگىمەلەپ بەردى.

- اماندىق عابباس ۇلى، ەل سپورتىن وركەندەتۋدىڭ ماڭىزى تۋرالى ايتساڭىز؟

- ماڭىزى وتە زور. ءوزىم جاۋاپتى مەملەكەتتىك قىزمەتتى اتقارىپ جۇرگەن كەزىمدە، قولىمنان كەلگەنشە سپورتتى دامىتۋعا بار كۇش- جىگەرىمدى سالدىم. جەتىسۋ وڭىرىندە كاسىبي سپورتتىڭ جانە بۇقارالىق سپورت تۇرلەرىنىڭ كەڭ قانات جايۋىنا جان- جاقتى ءمان بەرۋگە تىرىستىم. الماتى وبلىسىنىڭ اكىمى قىزمەتىنە كەلمەي تۇرىپ-اق ۆولەيبول كوماندالارىن قۇرعان ەدىم. سونىڭ ىشىندە ءوزىمنىڭ باستامام بويىنشا «راحات»، «جەتىسۋ» جانە «ايقاراكوز» كوماندالارى قۇرىلدى.

بىلىكتى باپكەرلەردىڭ تىڭعىلىقتى جاتتىقتىرۋىنىڭ ارقاسىندا ولار ۇزدىك ناتيجەلەرگە قول جەتكىزدى. ءار اۋدان مەن ءار اۋىلدا كىشكەنتاي بالالاردان باستاپ سپورتپەن شۇعىلدانۋىنا مۇمكىندىك بولۋى كەرەك. وسى ماقساتتا ءبىراز ىستەر اتقارىلدى. جاتتىقتارۋشىلار شاقىرىلدى، ولارعا ءتيىستى ەڭبەكاقى تولەندى، جاتاتىن جەرلەرى جانە باسقا ماسەلەلەرىن دە شەشكەن ەدىك. جاقسى ناتيجە كورسەتكەن بالالارعا گرانتتار بەرىلدى. كىشكەنتاي كۇنىنەن جاقسى باپكەردەن ءتالىم الىپ، جان-جاقتى شىڭدالىپ، وزدەرىن جەتىلدىرە بىلگەن جاس سپورتشىلار وسە كەلە شەبەرلىكتەرىن كورسەتتى. حالىقارالىق دارەجەدەگى سپورت شەبەرى دارەجەسىنە جەتتى، قازىر قازاقستاننىڭ قۇراما كومانداسىندا ويناپ ءجۇر. ەل ازاماتتارىنىڭ سپورتتا ۇلكەن تابىستارعا جەتۋىنە مۇمكىندىكتەر مول. الايدا، بارلىق وبلىستا سپورت جاقسى دامىپ كەتتى دەپ ايتا المايمىن. سول سەبەپتى ەلىمىزدىڭ بارلىق وڭىرىندە سپورت سەكسيالارى اشىلۋى جانە جاڭا كوماندالاردىڭ قۇرىلۋى وتە ماڭىزدى. اۋىل مەن اۋدانداردا جارىستار وتسە، باسەكەلەستىك ارتا تۇسەدى. سونداي تارتىستى دودالار وتكەن سايىن مىقتى سپورتشىلار شىعادى.

- ءوزىڭىز الماتى وبلىسىنا باسشىلىق جاساعان كەزدە بالالار سپورتىن دامىتۋعا قانداي قادامدار جاسالدى؟

- بالدىرعاندار ارنايى كەلىپ اينالىسسىن دەپ الماتى وبلىسىندا 14 سپورت كەشەنىن سالىپ بەردىك. بۇل مەكتەپتەگى سپورتزالداردان بولەك. ونىڭ ىشىندە بالالار كۇرەس، بوكس، گيمناستيكا، فۋتبول، ۆولەيبول، باسكەتبول جانە باسقا دا سپورت تۇرلەرىمەن شۇعىلدانادى. سپورت كەشەندەرىنە بارعان بالالاردىڭ اراسىنان ەرتەڭ- اق جاقسىلىق ۇشكەمپىروۆتەر مەن سەرىك قوناقبايەۆتار شىعادى.

- ءبىراز جاسقا كەلسەڭىز دە، سپورتتان قول ۇزبەۋ، ارداگەرلەر اراسىنداعى جارىستارعا قاتىسۋ وزىڭىزگە كۇش- قۋات بەرە مە؟

- ارينە. ءار ادام ءوزىنىڭ دەنە بىتىمىنە ءمان بەرۋى كەرەك. سالاۋاتتى ءومىر سالتىن ۇستانۋ ىزگى ويلارعا جەتەلەيدى جانە ماعىنالى ءارى ۇزاق ءومىر ءسۇرۋدىڭ كەپىلى. كەيدە جۇمىستان قولىمىز بوساماي، ۆولەيبول ويناماي قالساق، سپورتزالعا بارعىمىز كەلىپ تۇرادى. قيمىل-قوزعالىستى، ويىننان الاتىن اسەردى ادامنىڭ ساناسى مەن دەنەسىنىڭ ءوزى قاجەت ەتەدى. كەيدە مەن ءىسساپاردا بولىپ، ۇزاق جول ءجۇرىپ، سپورتزالعا شارشاپ كەلەمىن. ال ءبىر كىشكەنە ويناپ، دەنەمىز قىزعان سوڭ، شارشاعانىمىزدى ۇمىتىپ كەتەمىز. سەرگىپ، سەرپىلىپ قالامىز. اسىرەسە، جاۋاپكەرشىلىگى جوعارى مەملەكەتتىك قىزمەتتە جۇرگەن جانە باسقا سالاداعى ميمەن كوبىرەك جۇمىس ىستەيتىن ادامدار ءۇشىن سپورتتىڭ بەرەر پايداسى وتە مول. كۇنى بويى ۇستەلدە وتىرىپ جۇمىس ىستەگەن ادامنىڭ دەنەسى جاتتىعۋ جاساماسا، تازا اۋادا ءجۇرىپ-تۇرماسا، جىل سايىن سالماق قوسا بەرەدى. اس قورىتۋ پروتسەسى دە بۇزىلادى. ءتىپتى سپورتزالدا جاتتىققاندا ميدىڭ شارشاعانى باسىلادى. جينالىپ قالعان ءتۇرلى كەرەك ەمەس ويلاردان، اقپاراتتاردان ارىلاسىڭ. تىڭ يدەيالار پايدا بولادى.

- اڭگىمەڭىزگە راقمەت.

اماندىق باتالوۆ تاۋەلسىز ەلىمىزگە سىڭىرگەن ەڭبەگى ءۇشىن بىرنەشە وردەنمەن، مەدالدارمەن ماراپاتتالعان. 20 جىلدان استام ۋاقىت الماتى قالاسى جانە الماتى وبلىسى ۆولەيبول فەدەراتسياسىنىڭ پرەزيدەنتى قىزمەتىن اتقاردى.

«قازاقستان رەسپۋبليكاسىنىڭ قۇرمەتتى سپورت قايراتكەرى» اتاعىنا يە بولدى. حالىقارالىق اقپاراتتاندىرۋ اكادەمياسىنىڭ اكادەميگى. قازىر زەينەتكەرلىك دەمالىستا.

ەسكە سالا كەتەيىك، بۇدان بۇرىن ۆولەيبولدان ارداگەر سپورتشىلار اراسىندا حالىقارالىق تۋرنير وتكەنىن جازعان بولاتىنبىز.

جاڭالىقتار