07:55, 01 - شىلدە 2022 | GMT +6
جەلىدە الماتى پوليتسياسى باستىعىنىڭ ورىنباسارى اتىنان جالعان اككاۋنتتار كوبەيگەن
الماتى. قازاقپارات - الماتى قالالىق پوليتسيا دەپارتامەنتى باستىعىنىڭ ورىنباسارى رۋستام ءابدىراحمانوۆ الەۋمەتتىك جەلىدە ءوزىنىڭ اتىنان جالعان پاراقشالاردىڭ كوبەيگەنىن مالىمدەدى، دەپ حابارلايدى قازاقپارات ءتىلشىسى.
پوليتسەي الەۋمەتتىك جەلىدە، ونىڭ ىشىندە Instagram-دا ونىڭ اتىنان جالعان پاراقشالاردىڭ اشىلعانى جانە پروفيلگە شىنىمەن ونىڭ اككاۋنتىنان كوشىرىلگەن فوتو، دەرەكتەردىڭ قويىلعانى تۋرالى Facebook پاراقشاسىنا جازدى.
«بۇل ءوز كەزەگىندە جالعان پاراقشانى «شىنايى» ەتىپ كورسەتەدى. وسى فاكتىلەردىڭ ءارقايسىسى ەگجەي-تەگجەيلى زەرتتەۋدى قاجەت ەتەدى. بۇل - ۋاقىت ماسەلەسى. مەن جەلىنى پايدالانۋشىلار مەن جازۋشىلاردى ساق بولۋعا، كۇماندى جاريالانىمدارعا سەنبەۋگە، تەك وسى اككاۋنتىمداعى اقپاراتتى باسشىلىققا الۋعا، اقپاراتتىق قاۋىپسىزدىك شارالارىن ساقتاۋعا شاقىرامىن»، - دەپ جازدى رۋستام ابدراحمانوۆ.
ەسكە سالايىق، سونداي-اق رۋستام ابدراحمانوۆ بۇعان دەيىن الماتىدا ءوزىن پوليتسيا قىزمەتكەرى رەتىندە تانىستىراتىن الاياقتاردىڭ كوبەيگەنىن ايتقان بولاتىن.