اقمولا وبلىسىندا ءبىر-بىرىمەن قاقتىعىسقان قارۋلى ەكى توپ قولعا ءتۇستى
وبلىستىق پ د باسپا ءسوز قىزمەتىنىڭ مالىمەتىنشە، ماۋسىمنىڭ 28-دە دەپارتامەنتتىڭ كريمينالدىق پوليتسيا باسقارماسىنىڭ قىزمەتكەرلەرىنە «قاراساي تاس جولى» اينالما جولى بويىنداعى اۆتودرومدا قارۋلى توپتاردىڭ قاقتىعىسى ورىن العاندىعى تۋرالى حابار ءتۇستى.
«وقيعا ورنىنا كريمينالدىق پوليتسيا باسقارماسىنىڭ ارنايى ماقساتتاعى بولىمشە جەدەل- تەرگەۋ توبىنىڭ قىزمەتكەرلەرى دەرەۋ جەتتى. الدىن الا تەرگەۋ بارىسىندا قاقتىعىسقا قاتىسۋشىلار - كوكشەتاۋ جانە قاراعاندى قالالارىنىڭ 22 جاستان 40 جاسقا دەيىنگى 15 تۇرعىنى ەكەنى انىقتالدى. ولاردان Tranfoglio جانە «ستراجنيك» ماركالى جاراقات تاپانشالارى، وق- ءدارى، بۇرىش بۇرىككىشتەرى، پىشاقتار مەن كاستەتتەر تاركىلەندى»، - دەدى ۆەدومستۆودان.
پوليتسيا دەپارتامەنتى باسپا ءسوز قىزمەتىنەن اتاپ وتكەندەي، قازىرگى كەزدە وسى وقيعاعا بايلانىستى ءىس قوزعالىپ، وقيعانىڭ ءمان-جايى انىقتالىپ جاتىر.
«قارۋلى قاقتىعىسقا بايلانىستى قىلمىستىق كودەكستىڭ 287-بابىنىڭ 3-بولىگى - قارۋدى زاڭسىز ساقتاۋ جانە تاسىمالداۋ بويىنشا سوتقا دەيىنگى تەرگەۋ باستالدى. كەلۋ تۋرالى مىندەتتەمە تۇرىندە پروتسەسسۋالدىق ماجبۇرلەۋ شاراسى تاڭدالدى. ساراپتاما تاعايىندالدى»، - دەپ تولىقتىردى ۆەدومستۆودان.
